Կանխատեսում. Հայաստանի եւ Ադրբեջանի արտգործնախարարների և ղեկավարների հերթական հանդիպումները առավելագույնն է, ինչով կարող են շարունակվել Ղարաբաղի շուրջ բանակցությունները

Արմինֆո.Միջնորդների կողմից կազմակերպված Հայաստանի եւ Ադրբեջանի արտգործնախարարների եւ ղեկավարների հերթական հանդիպումներն առավելագույնն են, ինչով կարող են շարունակվել Ղարաբաղի շուրջ բանակցությունները: Նման կարծիք է հայտնել Կովկասագետների գիտական ընկերության նախագահ Ալեքսանդր Կռիլովը։

«Ընդ որում, նման հանդիպումների արդյունքը քիչ բանով կտարբերվի այն արդյունքներից, որոնք մենք տեսնում ենք վերջին տասնամյակներում ։  Բանակցությունների հերթական փուլը կավարտվի արտգործնախարարների և պետությունների ղեկավարների նոր հանդիպումների շուրջ պայմանավորվածության ձեռքբերմամբ։ Գործընթացը առաջ տանելու նախադրյալներ առաջվա պես չկան։ Դրանք կարող են հայտնվել միայն հակամարտության կողմերից գոնե մեկի զիջումների պատրաստակամության ի հայտ գալու դեպքում՚, - նշել է նա։

Մինչդեռ, Կռիլովի գնահատմամբ, այսօր զիջումների պատրաստ չեն ոչ Իլհամ Ալիևը, ոչ էլ Նիկոլ Փաշինյանը։  Իսկ բանակցային սեղանի շուրջ Ղարաբաղի վերադարձի անհրաժեշտության մասին Հայաստանի վարչապետի արտահայտած գաղափարից հետո, որն արմատապես անընդունելի է ադրբեջանցի գործընկերոջ համար, բանակցային գործընթացը, քաղաքագետի կանխատեսումներով, կրկին կհայտնվի սառեցված վիճակում։

Մարտի 29-ին Վիեննայում ԵԱՀԿ Մինսկի խմբի համանախագահների միջնորդությամբ տեղի կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը: Հանդիպման օրակարգում ղարաբաղյան հակամարտության կարգավորման սկզբունքների և տարրերի քննարկումն է։ Մարտի 28-ին Ավստրիայի մայրաքաղաքում տեղի ունեցավ Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի հանդիպումը: Նախարարների հանդիպմանը նախորդել են նրանց առանձին հանդիպումները միջնորդների հետ։

Կռիլովը, ընդհանուր առմամբ, ճիշտ է համարում ղարաբաղցիներին բանակցային սեղանի շուրջ վերադարձնելու անհրաժեշտության գաղափարը` գործըթնացից Ղարաբաղի դուրս բերումը համարելով Երեւանի մեծ սխալը։ Դրանով Հայաստանը, գործնականում, ղարաբաղյան հակամարտությունը հանգեցրեց Բաքվի կողմից ներկայացվող «օկուպացված տարածքների՚ միջպետական խնդրին։ Սակայն, չնայած  գործընթաց Ղարաբաղի վերադարձին միջնորդների համաձայնությանը`  բոլոր կողմերի համաձայնության դեպքում, գործնականում, նրա կարծիքով, դա անհնար է` Բաքվի անհամաձայնության պատճառով:

Ղարաբաղյան հակամարտության կարգավորմամբ 1992 թվականից զբաղվում է ԵԱՀԿ Մինսկի խումբը, որը ներկայացրել են համանախագահները Ռուսաստանից, ԱՄՆ-ից եւ Ֆրանսիայից: Ներկայումս կարգավորման գործընթացն ընթանում է ԵԱՀԿ ՄԽ համանախագահների կողմից 2007 թվականին Մադրիդում առաջադրված եւ 2009 թվականին նորացված «մադրիդյան սկզբունքների՚ հիման վրա, որոնք, ի թիվս այլ բաների, նախատեսում են հակամարտության գոտում խաղաղապահ զորակազմի տեղակայում: