Արմինֆո. ՀՀ քննչական կոմիտեին կառավարության պահուստային ֆոնդից 396 հազար դոլարին համարժեք գումար կհատկացվի «Ամուլսար՚ հանքավայրի շրջանում հետազոտություններ անցկացնելու համար: Այդ մասին որոշում է կայացվել կառավարության այսօրվա նիստում:
Նախագիծը ներկայացնող ֆինանսների նախարար Ատոմ Ջանջուղազյանն ասել է, որ գումարը Քննչական կոմիտեին կփոխանցվի Ամուլսարի հանքի շահագործման ազդեցությունների գնահատման քրեական գործի շրջանակում նշանակված փորձաքննությունների ծառայություն ձեռք բերելու համար։ Նախարարի ասելով, նշանակված են բնապահպանական, տնտեսական, հիդրոլոգիական, քիմիական այլ բազմաթիվ փորձաքննություններ։
Քննչական կոմիտեի նախագահ Հայկ Գրիգորյանն, իր հերթին, հաղորդել է, որ նման գործընթացները սովորաբար տևում են վեցից ութ ամիս, սակայն գործընթացները հնարավորինս արագացվել են, և փորձաքննության վերջնական եզրակացությունը կներկայացվի 12-ից 16 շաբաթվա ընթքացքում: ՔԿ նախագահն ընդսմին հավաստիացրել է, որ յուրաքանչյուր երկու շաբաթը մեկ ընթացիկ հաշվետվություն է ներկայացվելու ու մայիսին արդեն նախնական արդյունք կներկայացվի։
Հիշեցնենք, որ փետրվարի 18-ին «Ամուլսարի՚ հանքավայրի յուրացմամբ զբաղվող «Լիդիան Արմենիա՚ ընկերությունը հանդես էր հայտարարությամբ, որում նախազգուշացրել էր, որ շրջակա միջավայրի, ջրի և օդի որակի վատթարացման հետ կապված ցանկացած խնդրի առաջացման ողջ պատասխանատվությունը կրում է Հայաստանի Հանրապետության կառավարությունը:
Ընկերության մամուլի ծառայության հաղորդման համաձայն, 2018թվի հունիսից ի վեր Ամուլսարի ճանապարհների շրջափակման հետևանքով Լիդիանը հնարավորություն չի ունեցել վերսկսել աշխատանքները հանքի տեղամասում՝ չկարողանալով իրականացնել ոչ միայն շինարարական աշխատանքներ, այլ նաև կառուցել բնապահպանական պաշտպանիչ համակարգեր՝ առատ տեղումների և գարնանային ձնհալքի հետևանքով էրոզիան և մակերևութային ջրերում նստվածքները կառավարելու նպատակով, Ընկերության ունեցած պարտավորությունների և թույլտվությունների պայմանների համաձայն:
Լիդիանը տեղեկացրել է Կառավարությանը, որ Ընկերությունը պատասխանատվություն չի կրում բնապահպանական որևէ խնդրի, այդ թվում՝ մակերևութային ջրերի որակազրկման համար, որը 2018 թվականի հունիսից ի վեր կառավարության կողմից ապօրինի շրջափակման վերացման ուղղությամբ միջոցներ չձեռնարկելու հետևանք է:
Լիդիանը բազմիցս դիմել է կառավարությանը՝ իրականացնել անհրաժեշտ գործողություններ։
Այս ձմեռ Ամուլսարի տեղամասում արձանագրվել են ձյան առատ տեղումներ։ Ապօրինի շրջափակման պայմաններում հնարավոր չէր իրականացնել մակերևութային ջրերում նստվածքների առաջացումը վերահսկելու համակարգի կառուցման աշխատանքները, որը պետք է իրականցվեր նախքան ձյան տեղումները:
Ընկերության կողմից աշխատանքները վերսկսելու պարագայում ամիսներ կպահանջվեն ջրերի կառավարման համակարգերի կառուցման աշխատանքները ավարտին հասցնելու համար։ Մինչ այդ, շրջակա միջավայրի, ջրի և օդի որակի վատթարացման հետ կապված ցանկացած խնդրի առաջացման ողջ պատասխանատվությունը կրում է Հայաստանի Հանրապետության կառավարությունը՚, - ասվում էր ընկերության հայտարարությունում: