Արմինֆո.Քաղաքական ուժերը շարունակում են բողոքել մի շարք նախարարությունների լուծարման վերաբերյալ կառավարության որոշման դեմ: Համապատասխան հայտարարությամբ հանդես է եկել ՕԵԿ քաղաքական խորհուրդը: «Պետական որոշ մարմինների չհիմնավորված և հապճեպ վերակազմավորման կամ լուծարման սպասվող գործընթացը հղի է անխուսափելի վտանգներով։
Եթե դրանք ժամանակին անփույթ կառավարման պատճառով չեն կարողացել իրենց առջև դրված առաքելությունը իրականացնել, դեռևս չի արդարացնում այն միտքը, որ այդ կառույցները անպայման պետք է լուծարվեն։ Վերջինիս այլընտրանքը մենք համարում ենք կառավարման արդյունավետության բարձրացումը, աշխատանքի ճիշտ գնահատման ուղիների սահմանումը՝ յուրաքանչյուրի ունակություններին և կարողություններին համապատասխան։ Կառավարման ոլորտում այս տրամաբանությունը պետք է ելակետ դառնա, այլ ոչ թե խնդրից կամայականորեն հրաժարվելու, դրա լուծումը անտեսելու և սոցիալական մարտահրավերներին, արտագաղթին ու գործազրկությանը ընդառաջ նոր աշխատատեղեր կրճատելու գործելաոճը։ Կարծում ենք, որ խիստ հիմնավորված փաստարկներով, առանց ավելորդ շտապողականության և հանրության լայն շրջանակների հետ քննարկման պայմաններում է միայն կարելի այս հույժ կարևոր որոշումները կայացնել», - ասվում է հայտարարությունում։
Ավելի վաղ համանման հայտարարություններով հանդես էին եկել Դեմոկրատական կուսակցությունը եւ ՀՀԿ-ն:
Մինչդեռ, վարչապետի պաշտոնակատար Նիկոլ Փաշինյանը, մեկնաբանելով Մշակույթի նախարարության, Սփյուռքի նախարարության, Սպորտի եւ երիտասարդության հարցերի նախարարության, Գյուղատնտեսության նախարարության եւ Էներգետիկայի ու բնական պաշարների նախարարության լուծարման մասին կառավարության որոշման դեմ բողոքները, ինչպես նաեւ նրանց աշխատակիցների գործադուլի սպառնալիքները, մասնավորապես, ասել է. «Թող Մշակույթի նախարարության աշխատակիցները 6 ամիս շարունակ գործադուլ անեն, և կտեսնենք, թե արդյոք ինչ-որ բան փոխվում է երկրի մշակութային կյանքում: Եվ, ընդհանրապես, դեռ ընտրություններից առաջ մենք խոսել ենք պետական ապարատի օպտիմալացման մասին, եւ ժողովուրդը, այդ մասին իմանալով, մեզ վստահության քվե է տվել՚: Վարչապետի պաշտոնակատարը նաև հավելել է, որ պետական հատվածի մեծ թվով աշխատակիցներ իրենց աշխատանքը ստացել են ժամանակին ընտրություններում ՀՀԿ օգտին մի քանի ձայն ապահովելու դիմաց:
Միեւնույն ժամանակ, նա հավաստիացրել է, որ պետական ապարատի կրճատման միջոցով կառավարությունը դրա աշխատակիցներին հնարավորություն է տալիս զբաղվելու իրենց գործով` եթե նրանք նոր առաջարկներ չստանան: Փաշինյանի ասելով, հարկատուները կարող են ակնկալել, որ իրենց վճարած հարկերը արդյունավետ են օգտագործվում: Նրա հավաստմամբ, կրճատումների արդյունքում խնայված միջոցները կուղղորդվեն աշխատավարձերիի բարձրացմանը, որպեսզի կառավարությունը կարողանա բարձրորակ աշխատանք պահանջել իր աշխատակիցներից: