Հարությունյան. Առաջիկա օրերին կառավարող քաղաքական ուժը թիմային որոշում կկայացնի՝ ով կմնա նախարարների կաբինետում, ով կլինի խորհրդարանում

Արմինֆո. ՀՀ կրթության և գիտության նախարարի պաշտոնակատար, <Քաղաքացիական պայմանագիր> կուսակցության վարչության անդամ Արայիկ Հարությունյանը չի բացառել, որ կարող է հայտնվել խորհրդարանում, ինչպես նաև գլխավորել խորհրդարանական խմբակցությունը: Այդ մասին նա հայտարարել է դեկտեմբերի 13-ին կառավարությունում:

Տվյալ փուլում Արայիկ Հարությունյանը կոչ է արել ինտրիգներ չփնտրել ապագա նշանակումներում: Նրա խոսքով, առաջիկա օրերին կառավարող քաղաքական ուժը թիմային որոշում կկայացնի՝ ով կմնա նախարարների կաբինետում, ով կլինի խորհրդարանում: Հաշվի կառնվեն տարբեր հանգամանքներ, այդ թվում՝ թեկնածուի <օգտակարությունը> գործադիր մարմնի ղեկավարի պաշտոնում և նրա նախապատվությունները:

Ինչպես նշել է նախարարի պաշտոնակատարը, անցած ընտրություններում <կեղծիքների և ընտրակաշառքի բաժանման> պայմաններում իրեն հաջողվել է

4000 ձայն ստանալ, այդ ընտրություններում՝ 14000: Հարությունյանի կարծիքով, դա իր գործունեության լավ գնահատական և լրացուցիչ շարժառիթ է կրկնակի աշխատանքի համար: <Հնարավոր է, հայտնվեմ Ազգային ժողովում, միգուցե մնամ գործադիր իշխանությունում, թիմը հիմա ամեն բան քննարկում է>,- նշել է Հարությունյանը: Ըստ որում, պատասխանելով հարցին, թե 14000 ձայնը բավարար է խմբակցության ղեկավար դառնալու համար՝ նախարարի պաշտոնակատարը հայտարարել է, որ նման սանդղակ չկա: <Ստացած ձայների քանակով առևտուր չի տարվում>,- ընդգծել է Հարությունյանը:

Ներկայումս, ինչպես հայտնել է Հարությունյանը, որոշում չի կայացվել նախարարությունների թվի հնարավոր կրճատման առնչությամբ: <Մոտ ժամանակներս կհրապարակվի նախարարությունների օպտիմալացման նախագիծը>,- նշել է նա:

Նշենք, որ շրջանառվող լուրերի համաձայն, 7-րդ գումարման ԱԺ նախագահ կդառնա Արարատ Միրոզյանը, փոխնախագահներ`  Լենա Նազարյանը եւ Ալեն Սիմոնյանը: Միեւնույն ժամանակ, նշվում է, որ «Իմ քայլըե խորհրդարանական խմբակցության ղեկավարի հարցը վերջնականապես լուծված չէ: ԶԼՄ-ները  որոշ մանրամասներ են հաղորդում նաև կառավարությունում ակնկալվող կառուցվածքային փոփոխությունների մասին: Մասնավորապես, նշվում է, որ քննարկվում է Կրթության և գիտության նախարարությունը,  Սպորտի և երիտասարդության գործերի նախարարությունը, Սփյուռքի նախարարությունը և Մշակույթի նախարարությունը մեկ գերատեսչությունում միավորելու հարցը: Այս նոր նախարարությունը, ըստ տեղեկությունների, կգլխավորի այժմ ԿԳՆ պաշտոնակատար Արայիկ Հարությունյանը: Թե էլ որ պետական գերատեսչությունները կկրճատվեն կամ կօպտիմալացվեն, հայտնի կդառնա առաջիկայում, սակայմ, ինչպես ավելի վաղ հայտարարել էր վարչապետի պաշտոնակատար Նիկոլ Փաշինյանը, 18 նախարարություններից առնվազն 5-ը կկրճատվի: