Նիկոլ Փաշինյան. ԱԺ-ում բացարձակ մեծամասնության առկայությունը թույլ կտա բարձրացնել խորհրդարանի գործունեության արդյունավետությունը

Արմինֆո.ԱԺ-ում բացարձակ մեծամասնության առկայությունը թույլ կտա բարձրացնել խորհրդարանի գործունեության արդյունավետությունը: Մամուլի ասուլիսում այդ մասին հայտարարել է հաղթանակած «Իմ քայլը՚ դաշինքի առաջնորդ, վարչապետի պաշտոնակատար Նիկոլ Փաշինյանը` մեկնաբանելով խորհրդարանական արտահերթ  ընտրությունների արդյունքները:

Նրա ասելով, երկրի քաղաքացիները, ըստ էության,  ձեւավորում են բացարձակ սահմանադրական մեծամասնություն խորհրդարանում, որն օրենսդրական փոփոխություն իրականացնելու որևէ խնդիր չի ունենա:

Ինչ վերաբերում է ընտրությունների ընթացքին, Փաշինյանի ասելով, որեւէ լուրջ խախտում չի եղել, և, ինչպես Երևանի ավագանու ընտրությունները, դրանք անցել են բարձր մակարդակով: «Որոշ լրագրողներ ընտրությունների ընթացքը որակել էին որպես «ձանձրալի», սակայն ես դրանք գնահատում եմ դրական՚, - նշել է Նիկոլ Փաշինյանը: Խոսելով ցածր մասնակցության մասին՝ վարչապետի պաշտոնակատարը փաստել է, որ այսօր ոչ ոք չի կարող է ասել, թե Հայաստանում քանի ընտրող կա: 1991 թվականից ՀՀ բոլոր քաղաքացիները ընդգրկված են ընտորղների ցուցակներում, և բոլորի համար ակնհայտ է, որ վերջին 15 տարում այդ ցուցակներում էական փոփոխություններ են տեղի ունեցել: Ընդդիմությունը բոլոր ժամանակներում հայտարարել է 100 հազար ձայների առկայության մասին, որոնք իշխանություններն օգտագործել են որպես ռեսուրս խոսքը վերաբերում է բացակա ընտրողներին, մահացած ընտրողներին: Վարչապետի պաշտոնակատարն ընդգծել է, որ այս ընտրությունների ընթացքում մարդկանց ոչ թե «բերման են ենթարկել՚ ընտրատեղամասեր, այլ մարդիկ իրենք իրենց կամքով գնացել են ընտրությունների: Բացի այդ, շատ ընտրողներ, իրատեսորեն գնահատելով դաշինքի հաղթելու շանսերը, հատկապես, հաշվի առնելով եղանակային անբարենպաստ պայմանները, պարզապես, որոշել են ձեռնպահ մնալ ընտրություններին մանսակցելուց:

Վարչապետի պաշտոնակատարի ասելով, հաղթանակած դաշինքի ամենագլխավոր ռեսուրսը քաղաքացու ակտիվությունն է, մամուլի ազատությունն ու ընտրությունների արդարությունը: «Ժողովուրդը մեզ մանդատ տվեց շարունակելու կոռուպցիայի դեմ պայքարի քաղաքականությունը, և այդ պայքարը կշարունակվի: Կառավարությունն ու խորհրդարանը կշարունակեն լրջագույն աշխատանքը ժողովրդավարության ինստիտուտների կատարելագործման ուղղությամբ: Կփոխվի նաև Ընտրական օրենսգիրքը: Արդեն կա համապատասխան ուղղումների փաթեթ, որը, մասնավորապես, ենթադրում է հրաժարում վարկանշային ընտրակարգից: Այդ հարցն անհրաժեշտ է քննարկել: Կա այդ համակարգի վերացման վերաբերյալ առաջարկություն, սակայն, քանի որ մինչև  հաջորդ ընտրությունները բավական շատ ժամանակ կա, կարևոր է հարցը քննարկել հանգիստ իրադրությունում՚, - փաստել է վարչապետի պաշտոնակատարը: Նրա համոզմամբ, սակայն, ամենագլխավոր խնդիրը հստակ ընտրացուցակների առկայությունն է, որպեսզի յուրաքանչյուր որոշակի ընտրության համար ունենանք հստակ ընտրացուցակ: Նրա ասելով, ակնհայտ է, որ Հայաստանում չկա 2,6 մլն ընտրող: Այս անգամ ամեն բան պարզ էր. այն քաղաքացիները, որոնք չեն ցանկացել մասնակցել ընտրություններին, պարզապես, չեն մասնակցել ընտրական գործընթացին: Իսկ նրանք, որոնք մասնակցել են, դա արել են թափանցիկ: Նիկոլ Փաշինյանն ընդգծել է, որ ընտրողներն իրենց ընտրությունը կատարել են, և իրենք, ընդամենն, ի գիտություն են ընդունում ընտրությունների արդյունքները:

Հավելենք, որ երեկ կայացած խորհրդարանի արտահերթ ընտրությունների նախնական արդյունքների համաձայն, «Իմ քայլը» դաշինքը ստացել է ընտրողների ձայների 70,43 տոկոսը, «Բարգավաճ Հայաստան» կուսակցությունը՝ 8,37 տոկոսը, և «Լուսավոր Հայաստան» կուսակցությունը՝ 6,37 տոկոսը։ Հենց այդ երեք քաղաքական ուժերն են անցնում նոր գումարման Ազգային ժողով: