Արմինֆո. Համացանցում հայտնվել է հերթական գաղտնալսման ձայնագրությունը, այս անգամ ՀՀ ԱԱԾ ղեկավար Արթուր Վանեցյանի և վարչապետի պաշտոնակատար Նիկոլ Փաշինյանի միջև։
Գաղտնալսման համաձայն՝ Վանեցյանը զանգահարում է Փաշինյանին և զեկուցում, որ ՀՔԾ ղեկավար Սասուն Խաչատրյանը ցանկանում է 2008 թ. մարտի 1-ի գործի շրջանակներում ձերբակալել ՀԱՊԿ գլխավոր քարտուղար Յուրի Խաչատուրովին։ Ըստ որում, նա մտահոգություն է հայտնում, որ այս առնչությամբ կարող են խնդիրներ ծագել «ռուսների» հետ։
Փաշինյանը հարցնում է, թե երբ են ուզում ձերբակալել Խաչատուրովին։ Վանեցյանը պատասխանում է, որ հիմա՝ ավելացնելով, որ առայժմ կարելի է հետաձգել Խաչատուրովի հարցաքննությունը և ավարտել նույն գործի շրջանակներում ՀՀ երկրորդ նախագահ Ռոբերտ Քոչարյանի հարցաքննությունը։ «Եկեք, այնուամենայնիվ, հետաձգենք»,- խնդրում է Վանեցյանը։ Ինչին Փաշինյանը դրական պատասխան է տալիս՝ ավելացնելով, որ անհրաժեշտ է նախօրոք տեղեկացնել ՀԱՊԿ անդամ երկրներին, որ հետո խնդիրներ չլինեն։
«Մյուս մասով ի՞նչ կա»,- հարցնում է Փաշինյանը։ «Մյուս մասով խոսել եմ Սասուն Խաչատրյանի հետ, նա ասում է, որ հաստատ է, դատավորը զանգել է իրեն, մի քիչ վախենում է կալանքի մասին որոշում ընդունել։ Ես ասել եմ, որ պետք մանրամասն ուսումնասիրի հարցը, տեսնի, թե որոնք են թույլ կողմերը և զեկուցի ինձ»,- ասում է Վանեցյանը։ Այդ դեպքում թող առաջին մասով հետաձգեն /Խաչատուրովի գործը-խմբ./, ես այստեղ եմ կխոսեմ նրանց հետ»,- ասում է Փաշինյանը։ Վանեցյանն ասում է, որ այդ դեպքում Քոչարյանին կձերբակալեն, իսկ Խաչատուրովի հետ կապված առայժմ կսպասեն։
Փաշինյանի հետ Վանեցյանի երկրորդ խոսակցության ժամանակ վարչապետի պաշտոնակատարը գտնվում է նիստում։ «Պրն․ վարչապետ, ռուսները շատ ծանր են տանում Խաչատուրովի ձերբակալումը։ Եկել են հետախուզության և ԱԴԾ ներկայացուցիչները, ասում են, որ դա ապտակ է ՀԱՊԿ-ին, խնդրում են գոնե ՀԱՊԿ-ից հետ կանչել, հետո դա անել»;
«Իսկ Քոչարյանի հետ կապված ի՞նչ կա»,- հետաքրքրվում է Փաշինյանը։ «Դատարանում լսում են, բայց Քոչարյանը կլինի»,- հավաստում է Վանեցյանը։
Հետո կրկին խոսվում է Խաչատուրովի մասին, և Փաշինյանը մտահոգություն է հայտնում, որ նա կարող է լքել երկիրը և չվերադառնալ, եթե չձերբակալեն։ Բայց Վանեցյանը վստահեցնում է, որ նրան ուղղակի երկրից դուրս չեն թողնի։ «Եկեք գործի շրջանակներում նրան կարգավիճակ տանք, բայց չձերբակալենք, դա մեծ խնդկր կլինի։ Պրն. վարչապետ, խնդիր ենք ունենալու, ոնց որ ՆԱՏՕ-ի գլխավոր քարտուղարին նստացնեն, այդ կազմակերպության հեղինակությանն ենք վնասում»,- նշում է Վանեցյանը։
«Խոսիր Սասունի հետ /ՀՔԾ ղեկավար/, ես մի քիչ հետո կզանգեմ»,- ասում է Փաշինյանը։
Երրորդ խոսակցությունը ՀՔԾ և ԱԱԾ ղեկավարների միջև է։ Վանեցյանը կրկին ասում է, որ ռուսները շատ «ծանր» են տանում Խաչատուրովի հնարավոր կալանքը։ «Կարող են լուրջ խնդիրներ ծագել, այդ մասին հենց նոր ասել եմ վարչապետին։ Սասուն Խաչատրյանը հարցնում է, թե ինչ անել այդ դեպքում, կարող է որպես խափանման միջոց գրավ կիրառել։ «Գրավ կամ չհեռանալու մասին ստորագրություն»,- առաջարկում է Վանեցյանը։ Խաչատրյանը գտնում է, որ գրավն ավելի ճիշտ կլինի։ Ըստ որում, Վանեցյանը կասկած է հայտնում, որ Խաչատուրովը կարող է մեծ գրավ վճարել. «Որտեղի՞ց նրան այդքան մեծ գումար»։ «20 մլն էլ չի կարող վճարել»,- հարցնում է Վանեցյանը։ Այնուամենայնիվ, Վանեցյանը համոզում է նրան հետաձգել որոշումը, մինչև չխոսի վարչապետի հետ։