Արամի 23 հասցեում գտնվող հուշարձան-կառույցը փրկելու աշխատանքները շարունակվում են

Արմինֆո. Արամի 23 հասցեում գտնվող հուշարձան-կառույցը փրկելու համար 3 վերականգնման նախագիծ է արվել:

Ինչպես ԱրմԻնֆո-ին հաղորդեցին ՀՀ քաղաքաշինության կոմիտեի մամուլի ծառայությունից, նախագծերից առաջինը, որը մշակել էր «Հին Երևան» նախագծի ճարտարապետը, քննարկման արդյունքում մերժվել էր Մշակույթի նախարարության և Քաղաքաշինության կոմիտեի կողմից, որովհետև համարվել էր վտանգավոր՝ կառույցի ամբողջականության համար:

Շենքի պահպանման 2-րդ և 3-րդ նախագծերը մշակվել էին նախագծող ճարտարագետի և ԱԻՆ մասնագետի կողմից, սակայն նույնպես չեն արժանացել գերատեսչությունների հավանությանը:

Այս պահին մշակվում է շենքի պահպանման 4-րդ նախագիծը, որի աշխատանքների համար ներդրողը պատրաստակամություն է հայտնել վճարել: «Մշակվող նախագծի և «Հին Երևան» ծրագրի շուրջ տեղի ունեցող զարգացումների մասին կտեղեկացնենք մոտ ապագայում՚, - ասվում է հաղորդագրությունում:

Ինչպես ԱրմԻնֆո-ն ավելի վաղ հաղորդել էր, 18-րդ դարի 90-ական թվականներին կառուցված շենքը գտնվում է ՀՀ մշակույթի նախարարության պահպանվող հուշարձանների ռեեստրում, սակայն այդ կարգավիճակը, ինչպես ճարտարապետական այլ հուշարձանների պարագայում, շենքը չի փրկում ոչնչացման սպառնալիքից: Շենքում պարապմունքներ է անցկացնում համաշխարհային ճանաչում ունեցող «Հայաստանի փոքրիկ երգիչներ՚ մանկական երգչախումբը: Սակայն, քանի որ շենքը, գործնականում, փլուզման եզրին է, ինչի մասին վկայում է Արտակարգ իրավիճակների նախարարության փորձաքննությունը, փոքրիկ երգիչները երկար ժամանակ չեն կարողանում փորձեր անցկացնել,  և դա` հաշվի առնելով այն հանգամանքը, որ առաջիկայում նրանք պետք է Հայաստանը ներկայացնեն բազմաթիվ միջազգային հեղինակավոր մրցույթներում:

Ինչպես ԱրմԻնֆո-ի թղթակցին հաղորդել են երգչախմբի սաների ծնողները և դպրոցի աշխատակիցները, ամեն ինչ սկսվել է ճարտարապետական հուշարձանի անմիջական հարևանումթյամբ հերթական էլիտար շենքի շինարարությունցի: Շինարարական աշխատանքներն իրականացնող կապալառուները, մանկավարժների ասելով, խախտել են շինարարական բոլոր նորմերը, ինչի արդյունքում հին շենքի հիմքը սկսել է խարխլվել, իսկ պատերին գոյացել են խորը ճեղքեր:

«Հին Երեւան» նախագիծը ներառում է Երեւանի Աբովյան փողոցից մինչեւ Կողբացու փողոց, Արամի փողոցից մինչեւ Բուզանդի փողոց շուրջ 100 000 քառակուսի մետր շինտարածք: Նախագծի համաձայն, նախատեսվում է վերականգնել XIX դարավերջին և  XX դարերասկզբին Հայաստանի մայրաքաղաքի ճարտարապետական տեսքը: Ենթադրվում էր, որ 150 միլիոն դոլար արժողությամբ «Հին Երեւան» նախագիծը, պետք է ավարտվեր 2010-2011 թվականներին: Սակայն կառավարությունը Multicontinental distribution-ի հետ պայմանագիր է կնքել միայն 2014 թվականին` որոշ խնդիրների պատճառով: Շինարարական աշխատանքներն սկսվել են միայն 2017 թվականին: