ՀՀ պատգամավորները համակարծիք են, որ ԵԱՀԿ Մինսկի խմբի համանախագահող երկրները չպետք է զենք վաճառեն ղարաբաղյան հակամարտութան կողմերին

Արմինֆո. Հայաստանի իշխանության վրա կարող են տարբեր կողմերից ճնշումներ լինել, սակայն մեզ համար ամենագլխավորը ղարաբաղյան հարցը <ցանկացած ճանապարհով> լուծելու սկզբունքը բացառելն է: Այդ մասին հոկտեմբերի 26-ին ՀՀ խորհրդարանում ճեպազրույցների ժամանակ հայտարարել է ՀՅԴ խմբակցության ղեկավար Արմեն Ռուստամյանը:

Պատգամավորը հայտարարել է, որ զիջումների գնալ այնպիսի կարևոր հարցում, ինչպես արցախյան հարցը, ճիշտ չէ: <Գնալ զիջումների, որոնք հակասում են մեր շահերին, սխալ է ցանկացած իշխանության համար: Ստեղծված իրավիճակը հիշեցնում է 90-ական թթ. սկիզբը, և դա ինձ շատ է անհանգստացնում>,- հայտարարել է ՀՅԴ խմբակցության ղեկավարը:

Ռուստամյանը նշել է, որ Հայաստանի առաջնահերթ խնդիրներից մեկն Արցախում ուժերի հավասարակշռության պահպանումն է, կարևոր չէ՝ ինչ ճանապարհով: Նա ընդգծել է, որ Ադրբեջանը զենք է ձեռք բերում ոչ միայն Ռուսաստանից, իսկ Հայաստանը՝ միայն Ռուսաստանից: <Հետևաբար՝ մենք նույնպես կարող ենք զենք գնել այլ երկրներից՝ղեկավարվելով մեր առաջնահերթ շահերով>,- նշել է ՀՅԴ խմբակցության ղեկավարը:

Այն առնչությամբ, թե կարող է արդյոք դա հարուցել Ռուսաստանի դժգոհությունը, պատգամավորը նշել է, որ Կրեմլի ներկայացուցիչներն իրեք պետք է գիտակցեն, որ կամ ԵԱՀԿ Մինսկի խմբի անդամ երկրներն ընդհանրապես զենք չեն վաճառում, կամ վաճառքներն իրականացնում են այնպես, որ դա չհանգեցնի անհավասարակշռության: <Հենց որ հավասարակշռությունը խախտվում է, կողմերից մեկը, որ գերակշռություն ունի, անմիջապես սկսում է ագրեսիա դրսևորել, և պատերազմ է սկսվում: Ինչպես տեսնում ենք, Հայաստանը մի փոքր հետ է մնացել այդ հարցում, և Բոլթոնը, հավանաբար, ակնարկել է, որ անհրաժեշտ է վերականգնել հակամարտության կողմերի միջև ռազմական հավասարակշռությունը: Ավելին, կարծում եմ, որ նա ակնարկել է, որ հայկական կողմը կարող է նոր սպառազինություն ձեռքբերելու հնարավորություն ունենալ, ինչը կնպաստեր ուժերի հավասարակշռության վերականգնմանը>,- հայտարարել է Ռուստամյանը:

<Ծառուկյան դաշինք> խմբակցության քարտուղար Վահե Էնֆիաջյանն իր հերթին հայտարարել է, որ Հայաստանի համար առաջնահերթ խնդիրը ղարաբաղյան հակամարտության՝ բացառապես խաղաղ ճանապարհով լուծումն է: Նա նաև նշել է, որ Արցախը պետք է մասնակցի բանակցություններին, որքան էլ դրան հակառակվի Ադրբեջանը: <Ռուսաստանը եղել, կա և կմնա մեր ռազմավարական գործընկերը, սակայն մենք ունենք այդ հարաբերությունները խորացնելու ներուժ: Միաժամանակ մենք կարող ենք խորացնել հարաբերությունները ԵՄ և ԱՄՆ հետ>,- նշել է պատգմավորը:

ՀՀԿ խմբակցության ղեկավար Վահրամ Բաղդասարյանը հայտարարել է, որ ԵԱՀԿ Մինսկի խմբի համանախագահող երկրների կողմից հակամարտութան կողմերին զենքի վաճառքի փաստը միայն սրում է իրավիճակը: <Ինչպես գիտեք, Հայաստանը միշտ արցախյան հակամարտության խաղաղ կարգավորման կողմնակից է եղել: Նախօրեին Ջոն Բոլթոնի արած հայտարարությունները միայն դրդում են կողմերին հակամարտության, իսկ ԵԱՀԿ Մինսկի խմբի համանախագահող երկրները պետք է զերծ մնան նման գործողություններից: Նույնը վերաբերում է Ռուսաստանին>,- նշել է Բաղդասարյանը: Խոսելով վաղաժամկետ խորհրդարանական ընտրություններից հետո հակամարտության կարգավորման հնարավորության մասին՝ Բաղդասարյանը հայտարարել է, որ նման հեռանկարներ չի տեսնում: <Հայաստանի համար առաջնահերթ խնդիրը ղարաբաղյան հարցում Արցախի Հանրապետության ճանաչումն է, մնացած բոլոր հարցերը պետք լուծվեն հետագայում բանակցությունների ճանապարհով>,- ընդգծել է Բաղդասարյանը: