Արմինֆո.Հայաստանի վարչապետ Նիկոլ Փաշինյանը բացել է Դուշանբեում Ադրբեջանի նախագահ Իլհամ Ալիևի հետ կարճատև զրույցի մանրամասները և պատմել ձեռք բերված պայմանավորվածությունների մասին:
«Հետաքրքիր շփումմ տեղի ունեցավ Ադրբեջանի նախագահի հետ: Ըստ էության, այդ շփումը նույնպես ոչ ֆորմալ էր, և դա մեր առաջին նման շփումն էր, առաջին նման քննարկումները», - ասել է իր ֆեյսբուքյան էջի ուղւղ եթերում Փաշինյանը, ամփոփելով իր Դուշանբե կատած այցը, որտեղ տեղի ունեցավ ԱՊՀ պետությունների ղեկավարների հանդիպմումը:
Նա հիշեցրել է, որ այս տարվա հունիսին Մոսկվայում ՌԴ նախագահ Վլադիմիր Պուտինը նրան ծանոթացրեց Ալիևի հետ, սակայն, դրանից հետո ոչ մի խոսակցություն կամ շփում չէր եղել: «Այս անգամ ստացվեց առարկայական խոսակցություն, որի արդյունքում մենք արձանագրեցինք որոշ կարևոր կետեր: Դրանցից առաջինն այն է, որ մենք որոշեցինք մեր պաշտպանության նախարարներին հանձնարարել կոնկրետ քայլեր ձեռնարկել նվազեցնելու լարվածությունը շփման գծում, այսինքն, մենք խոսում ենք շփման գծում տեղի ունեցող միջադեպերի վերացման մասին: Կարծում եմ, որ սա կարևոր պայմանավորվածություն է», - ասել է վարչապետը: Միևնույն ժամանակ նա ընդգծել է, որայդ մասին տեղեկացրել է նաև Բակո Սահակյանին, ում համար նույնպես այդ պայմանավորվածությունն ընդունելի է:
«Ըստ էության, մենք կարող ենք ասել, որ կա հրադադարի ռեժիմի խախտման դեպքերի կանխման մասին պայմանավորվածություն հայ-ադրբեջանական պետական սահմանին և շփման գծում, և համապատասխան հանձնարարութոյւնները Դուշանբեից ես տվել եմ հայկական զինված ուժերին սեպտեմբերի 27-ի երեկոյան, և ես ուրախ եմ ասել, որ անցյալ գիշեր շատ հանգիստ էր շփման գծում», - ասել է Փաշինյանը, հավելելով, որ ադրբեջանցի գործընկերոջ հետ, փաստորեն, պայմանավորվածություն է ձեռք բերվել դադարեցնել, այսպես կոչված, «մարդաորսը», որը եղել է նախկինում և հանգեցրել երկու կողմերի մարդկային զոհերին:
Միևնույն ժամանակ, ՀՀ վարչապետը նշել է, որ հաջորդ պայմանավորվածությունը վերաբերվում է բանակցային գործընթացի ձևաչափին, և արձանագրվել է, որ հակամարտությունը պետք է լուծվի խաղաղ ճանապարհով:
«Եվ երրորդ կարևորագույն կետը, կարծում եմ, որ մենք պայմանավորվեցինք ստեղծել օպերատիվ կապի համակարգ: Բայց թե ինչպիսին կլինի այդ կապը, դեռ չեմ կարող ասել, քանի որ դեռ չկան կոնկրետ պայմանավորվածություններ: Բայց համապատասխան գերատեսչություններին արդեն հանձնարարվել է աշխատել այդ ուղղությամբ, քանի որ մենք անընդհատ խնդրի առջև ենք հայտնվում, թե ով է առաջինը խախտել հրադադարի ռեժիմը: Եթե մենք իսկապես ուզում ենք պահպանել հրադադարի ամբողջական ռեժիմը, այլ ոչ թե ինչ-որ թերի բան, մենք պետք է ունենանք այդպիսի կապի համակարգ», - ասել է նա:
Փաշինյանը նշել է, որ Ալիևի հետ զրուցել է սեպըեմբերի 27-ի երեկոյան և 28-ի ցերեկը, ևզրույցների հիմնական բովանդակությունը վերաբերում էր այն բանին, թե ինչպես պետք է անել, որպեսզի լարվածությունն առաջնագծում նվազի և ապահովվի հրադադարի ռեժիմը, քանի որ, եթե խոսքը վերաբերում է հակամարտության կարգավորմանը, ապա պետք է ձեռք բերվի նաև համապատասխան մթնոլորտ: Ըստ ՀՀ կառավարության ղեկավարի, այնքան էլ տրամաբանական չէ խոսել հակամարտության կարգավորման մասին կրակոցների ֆոնին, և պետք է քայլեր ձեռնարկել, որպեսզի նորմալ մթնոլորտում սկսել խոսակցությունն օրակարգի և հակամարտության կարգավորման մասին: Վերջում նա հույս է հայտնել, որ Ադրբեջանի ղեկավարի հետ ձեռք բերված պայմանավորվածությունները կպահպանվեն, հավաստիացնելով, որ հայկական կողմը կանի ամեն ինչ, որպեսզի դրանք լինեն արդյունավետ: