Ռոբերտ Քոչարյանի կալանավորման վերաբերյալ Արցախի քաղաքական ուժերի կարծիքները տարբեր են

Արմինֆո.  2008 թվականի մարտի 1-ի գործի շրջանակում Հայաստանի երկրորդ և ԼՂՀ առաջին նախագահ Ռոբերտ Քոչարյանի կալանավորման վերաբերյալ Արցախի քաղաքական ուժերի կարծիքները տարբեր են:

Ինչպես ԱրմԻնֆո-ի թղթակցի հետ զրույցում հայտարարել է Արցախի խորհրդարանի ամենամեծ խմբակցության` «Ազատ հայրենիքի» ղեկավար Արթուր Թովմասյանը, քննությունը կտա բոլոր հարցերի պատասխանները: Ընդ որում, նա հույս է հայտնել, որ գործընթացը կլինի օրենքի նորմերին ու տառին համապատասխան: «Ազատ հայրենիք՚ կուսակցությունը, ապավինելով Հայաստանի արդարադատության համակարգին, վստահ է, որ գործընթացը կլինի ոչ թե քաղաքական, այլ, բացառապես, իրավական բնույթի՚, - հայտարարել է արցախցի խորհրդարանականը` ընդսմին հրաժարվելով գնահատական տալ Ռոբերտ Քոչարյանի կալանավորմանը: «Այդ որոշման իրավաչափությունը պետք է ապացուցի քննությունը՚, - ընդգծել է նա, վերստին հույս հայտնելով, որ գործընթացը կլինի բացառապես թափանցիկ` որպեսզի հանրային տարակարծությունների տեղիք չկա: Ընդ որում, խորհրդանականը ընդգծել է, որ Արցախի հասարակայնությունը և քաղաքական ուժերը պակաս շահագրգռված չեն մարտի 1-ի հանցագործությունների բացահայտմամբ` քան Հայաստանի հասարակայնությունը: Այդուհանդերձ, Թովմասյանը ընդգծել է, որ վերջին գործընթացները չպետք է դառնան Հայաստանի և Արցախի հասարակությունների միջև պառակտման առիթ, ինչի նախադրյալներ արդեն դիտվում են սոցիալական ցանցերում:

Արցախի խորհրդարանի արտաքին հարցերի հանձնաժողովի նախկին ղեկավար Վահրամ Աթանեսյանն, իր հերթին, ԱրմԻնֆո-ի թղթակցի հետ զրույցում փարատել է մտավախությունը, թե Հայաստանի վերջին գործընթացները կարող են ՀՀ և ԱՀ հասարակությունների միջև պառակտման առարկա դառնալ: «Ես չեմ կարծում, թե Ռոբերտ Քոչարյանի կալանավորումը կարող է պառակտման առարակա դառնալ Արցախի և Հայաստանի հասարակությունների միջև, ինչպես փորձում են մատուցել որոշ քաղաքական ուժեր և փորձագետներ: Այո, որոշ քաղաքական ուժեր հանդես են եկել ոչ միանշանակ հայտարարություններով, սակայն, նրանք Արցախի հասարակայնության տրամադրությունները չեն արտացոլում: Բոլորովին` հակառակը. արցախցիները ոգեշնչված են Հայաստանում արդարության և օրինականության հաստատմանն ուղղված գործընթացներից՚, - ասել է Աթանեսյանը: Նա նաև ընդգծել է, որ եթե Հայաստանի քննչական մարմինները երկրորդ նախագահի և ՀԱՊԿ գլխավոր քարտուղարի նկատմամբ քրեական գործ են հարուցել, նշանակում է, ունեցել են ծանրակշիռ իրավական հիմքեր և կշռադատել են բոլոր քաղաքական ռիսկերը: «Մեծ հույս ունեմ, որ գործընթացը կլինի բացառապես իրավական հունում, որ այդ ամենը ոչ թե վենդետա է,  այլ բացառապես օրինականության և արդարության դրսևորում: Նաև ակնկալում եմ, որ մեղադրյալներին դատարանի առջև արդարանալու հնարավորություն կընձեռվի, և շատ կցանկանայի, որպեսզի նրանք ապացուցեին իրենց անմեղությունը՚, - ընդգծել է Աթանեսյանը: Ընդ որում, նա քիչ հավանական է համարել, որ վերջին գործընթացները կարող են հանգեցնել ներքաղաքական ապակայունացման Հայաստանում: «Այո, ակնհայտ է, որ նախկին կառավարող կուսակցկությունը մտահոգված է: Կարծում եմ, ՀՀԿ-ն անհանգստացած է, որ քննության ընթացքում կարող են բացահայտվել այնպիսի փաստեր, որոնք կարող են հանգեցնել կուսակցության շատ ներկայացուցիչների ներգրավման քննչական գործընթացում՚, - հայտարարել է փորձագետը: Անդրադառնալով այն խոսակցություններին,  թե բանակի հեղինակազրկումը կարող է հանգեցնել հակառակորդի աշխուժացման, Աթանեսյանը դա համարել է չիք հավանական: «Այդպիսի խոսակցություններ շրջանառվել են նաև այն ժամանակ, երբ կալանավորել էին Արցախյան պատերազմի հերոս, պաշտպանության նախկին նախարար Սամվել Բաբայանին: Սակայն, ինչպես տեսնում եք, ոչինչ չպատահեց: Չեմ կարծում, թե Ադրբեջանն իր գործողությունները պայմանավորում է Բաբայանի, Խաչատուրովի կամ մյուս բարձրաստիճան զինվորականների կալանավորումներով: Իսկ եթե բանակի հրամանատարությունը չի ցանկանում դրա հեղինակազրկում, ապա զինված ուժերը չպետք է ներքաշի քաղաքական գործընթացներում: Օրինակ, Միքայել Հարությունյանը ժամանակին չպետք է ստորագրեր տխրահռչակ 0038 հրամանը, այլ պետք է հրաժարական տար, եթե համաձայն չէր երկրի գործող ղեկավարության հետ՚, - ամփոփել է նախկին խորհրդարանականը:

ՀՅԴ-ից Արցախի խորհրդարանի փոխխոսնակ Վահրամ Բալայանն, իր հերթին, հայտարարել է, որ, ընդհանուր առմամբ, ողջունում է երկրում արդարության և կարգի հաստատման համար Հայաստանի նոր իշխանությունների պայքարը, սակայն Ռոբերտ Քոչարյանի կալանավորումը լուրջ մտահոգություն է հարուցել Արցախում: «Այդ առնչությամբ Հայաստանի իրավապահ մարմինները պետք է լինեն առավելագույնս զգոն և շատ հիմնավորված պատասխաններ տան բոլոր հարցերին` քաղաքական շահարկումներ և հուզումներ թույլ չտալու համար՚, - ամփոփել է նա:

«Ժողովրդավարություն՚ խմբակցության ղեկավար Վարդգես Բաղրյանն էլ հայտարարել է, թե Քոչարյանի կալանավորումը չի կարող մտահոգություն չհարուցել Արցախում, քանի որ նա եղել է ոչ միայն Հայաստանի երկրորդ նախագահը, այլև` ԼՂՀ առաջին նախագահ, ինչպես նաև Արցախի հերոս է: «Հետևաբար,  նրա   շուրջ առկա գործընթացները չեն կարող մեզ անտարբեր թողնել:  Չեմ կիսում որոշ քաղաքական ուժերի խանդավառությունը Քոչարյանի կալանավորման առնչությամբ, քանի որ դա կարող է պառակտում մտցնել հայկական երկու հանրապետությունների հասարակությունների միջև: Միևնույն ժամանակ, նպատակ չունեմ նրան պաշտպանել, քանի որ Քոչարյանը դրա կարիքը չունի՚, - ընդգծել է նա, վերջին իրադարձություններում տեսնելով ոչ այնքան իրավական, որքան քաղաքական ենթատեքստ: