Ուրբաթ, 20 Հուլիսի 2018 20:34

Արմինֆո.Հայաստանը պետք է կողմորոշվի  չիրականացված ծրագրերի հարցում, որոնք ֆինանսավորվում են ԵՄ դրամաշնորհային միջոցներով: Այս մասին հուլիսի 20-ին լրագրողների հետ հանդիպմանը հայտարարել է Եվրոպական հանձնաժողովի Հարևանության և ընդլայնման շուրջ բանակցությունների հարցերով գլխավոր տնօրենի տեղակալ Կատարինա Մատերնովան:

 

Նրա խոսքերով, Հայաստանը դեռևս չի օգտագործել Եվրամիության կողմից նախկինում հատկացված 110 մլն եվրոյի դրամաշնորհը, որի համար կան ստորագրված պայմանագրեր: Միևնույն ժամանակ, սկզբում նախատեսվում էր 50 միլիոն եվրո ուղղել քաղաքական բաղադրիչի իրականացմանը, իսկ մնացած 60 միլիոն եվրոն`տնտեսական խնդիրների լուծմանը: Այդ գումարը դեռ սառեցված է, և սպասում է իր ճակատագրին: Իրականացվում են, կամ արդեն իսկ իրականացվել են 240 մլն եվրո արժողությամբ ծրագրեր, որոնք ֆինանսավորվում են ԵՄ դրամաշնորհային միջոցներով: Ընդհանուր առմամբ, ինչպես նշել է եվրոպացի պաշտոնյան, ԵՄ-ն Հայաստանին տրամադրել է 1 միլիարդ եվրոյի ֆինանսական աջակցություն: Դրան պետք է ավելացնել նաև KfW Բանկի, ՎԶԵԲ-ի, Եվրոպական ներդրումային բանկի և այլն եվրոպական կառույցների կողմից Հայաստանում իրականացվող մյուս ծրագրերը: Աջակցությունը հիմնականում ուղղվել է էներգետիկայի հատվածի, ՓՄՁ, ֆինանսական հատվածի ծրագրերի իրականացմանը: Ներկայումս պատրաստ է 160 մլն եվրո արժողությամբ ծրագիրը`2017-2020 թվականների համար, որը նույնպես սպասում է իր ժամին: Ծրագրեր են իրականացվում նաև Արևելյան գործընկերության ծրագրի շրջանակներում:

 

«Չնայած այն հանգամանքին, որ ԵՄ-ն հանդիսանում է բարդ բյուրոկրատական ​​կառույց, բայց մենք պատրաստ ենք անհապաղ հաշվի առնել Հայաստանի Հանրապետության կառավարության առաջարկություններն ու նախաձեռնությունները, ելնելով «ավելին ավելիի դիմաց» սկզբունքից: Բայց նախ պետք է գնահատվեն և վերլուծվեն նախկինում իրականացված ծրագրերը, ինչպես նաև ծրագրերը, որոնք շարունակում են մնալ սառեցված», - ասել է Կատարինա Մատերնովան, ավելացնելով, միևնույն ժամանակ, որ ԵՄ-ը «գումար չի տալիս թավշյա հեղափոխության» համար:

 

Իրավիճակը գնահատելու համար ԵՄ-ն ներկայացուցիչը հանդիպել է ՀՀ փոխվարչապետ Մհեր Գրիգորյանի, նախարարների ու փոխնախարարների հետ: Մասնավորապես, փոխվարչապետի հետ բանակցությունների ընթացքում քննարկվել են Եվրամիության կողմից քաղաքական հարցերի բարձրաստիճան խորհրդատուի նշանակման հնարավորությունը, բայց չի բացառվում նաև խորհրդատուների նշանակումը մյուս ոլորտների գծով: Կարևոր է նաև ներդրումային ծրագրի ստեղծումը, որտեղ պետք է լինի բարեփոխումների ուղղությունը, ինչպես նաև կոռուպցիայի դեմ պայքարը: Մենք այժմ նախապատրաստում ենք էներգետիկ արդյունավետության զարգացման նոր ծրագիր: «Մի խոսքով, եթե դա անհրաժեշտ ավելացնել ֆինանսավորման ծավալները, մենք կավելացնենք, բայց սկզբի համար պետք է ավարտել արդեն մեկնարկած և սկսված ծրագրերը»,-նշել է  Կատարինա Մատերնովան:

 

Իր հերթին Հայաստանում Եվրամիության պատվիրակության ղեկավար Պետր Սվիտալսկին նշել է, որ մինչ այժմ 110 մլն եվրո գտնվում է Եվրոպական միության «սառնարանում»: Պայմանագրերը կնքվում են, բայց աշխատանքը չի կատարվում: Վիզաների ռեժիմի դյուրացման առումով դիվանագետը նշել է, որ այդ հարցը կկարգավորվի «համապատասխան ժամանակամիջոցում»:

 

Հիշեցնենք, որ հուլիսի 20-ին լրագրողների հետ հանդիպման ժամանակ վարչապետ Նիկոլ Փաշինյանը նշեց, որ մինչև Բրյուսել կատարած իր այցը Եվրամիությունը հայտարարել էր, որ պատրաստ է աջակցել Հայաստանին: Կառավարության ղեկավարը շեշտել է, որ իր հայտնի հայտարարության ընթացքում նա տարակուսանք է հայտնել, որ Եվրամիության առաջարկած բանաձևը, փաստորեն, չի գործում: «Ես զարմանում եմ, որ մի շարք եվրոպական պաշտոնյաները ինձ հետ հանդիպումների ժամանակ ասում են, որ Հայաստանում ակնկալում են փոփոխություններ: Ինձ զարմացնում է այն, որ ԵՄ-ում դեռևս կան պաշտոնատար անձինք, ովքեր չեն նկատում այն ​​փոփոխությունները, որոնք տեղի են ունենում Հայաստանում: Իսկ ամեն ինչ պարզ լինելու համար ես բերեցի կոնկրետ օրինակներ, մասնավորապես, ես տեղեկացրեցի, որ այսօրվա կառավարությունը երկու ամսվա ընթացքում կամ նույնիսկ մեկ ամսվա ընթացքում, առանց միջոցներ ծախսելու, ավելին է արել կոռուպցիայի դեմ պայքարի ոլորտում, քան նախկին իշխանության ԵՄ-ի միջև փոխգործակցության ընթացքում: «Ես միայն դա եմ ասել»,-հավաստել է Փաշինյանը: