Լաքոտ. Ղարաբաղյան հակամարտությունը կարգավորման ռազմական ճանապարհ չունի

Արմինֆո. Ֆրանսիան, որպես ԵԱՀԿ Մինսկի խմբի համանախագահող երկրներից մեկը, Բրյուսելում Հայաստանի և Ադրբեջանի ԱԳՆ ղեկավարների հանդիպմանը հաստատել է ղարաբաղյան հակամարտության կարգավորման ուղիների որոնմանն աջակցելու առնչությամբ ստանձնած պարտավորությունների կատարմանն իր հավատարմությունը:

Այդ մասին հուլիսի 12-ին Երևանում մամուլի ասուլիսի ժամանակ հայտարարել է  Հայաստանում Ֆրանսիայի դեսպան Ժոնաթան Լաքոտը՝ մեկնաբանելով Բրյուսելում ՀՀ արտաքին գործերի նախարար Զոհրաբ Մնացականյանի և Ադրբեջանի արտաքին գործերի նախարար Էլմար Մամադյարովի հանդիպումը:

«Ղարաբաղյան հակամարտությունը կարգավորման ռազմական ճանապարհ չունի, և միայն խաղաղ բանակցությունների միջոցով հնարավոր է իրավիճակից ելք գտնել: Այս դիրքորոշումն ընդգծվել է նաև Ֆրանսիայի նախագահ Էմանուել Մակրոնի հետ Հայաստանի վարչապետ Նիկոլ Փաշինյանի հանդիպման ժամանակ»,- ասել է դեսպանը:

Միաժամանակ Լաքոտը նշել է, որ Փարիզում դրական են գնահատում բանակցությունների միջոցով հակամարտության խաղաղ կարգավորման ցանկության վերաբերյալ հայկական կողմի տարբեր մակարդակներով արված հայտարարությունները:

Պատասխանելով այն հարցին, թե ինչպիսին է Ֆրանսիայի դիրքորոշումը բանակցային գործընթացում Արցախի ներգրավման անհրաժեշտության վերաբերյալ Փաշինյանի հայտարարության առնչությամբ՝ Լաքոտը նշել է, որ Ֆրանսիան ողջունում է ցանկացած նախաձեռնություն, որը կնպաստի բանակցություններում առաջընթացի ապահովմանը, սակայն ձևաչափի հարցում պետք է փոխհամաձայնություն ձեռք բերվի գործընթացի բոլոր մասնակիցների միջև:

Նշենք, որ հուլիսի 11-ին Բրյուսելում հանդիպում տեղի ունեցավ ՀՀ արտաքին գործերի նախարար Զոհրաբ Մնացականյանի և Ադրբեջանի արտաքին գործերի նախարար Էլմար Մամադյարովի միջև: Սա երկու երկրների արտգործնախարարների միջև առաջին հանդիպումն էր` Հայաստանում ժողովրդավարական շարժման արդյունքում տեղի ունեցած իշխանափոխությունից և նոր կառավարության ձևավորումից հետո: Հանդիպումը կրում էր ճանաչողական բնույթ և միտված էր միմյանց տեսակետների հետ ծանոթացմանը: Զոհրաբ Մնացականյանն ընդգծել է, որ բանակցային գործընթացն այլընտրանք չունի, և այս համատեքստում կարևորեց խաղաղությանը նպաստող մթնոլորտի ձևավորմանը, փոխվստահության ամրապնդմանը, լարվածության նվազեցմանն ուղղված քայլերը, զինադադարի անշեղ պահպանումն ու ագրեսիվ հռետորաբանությունից հրաժարվելը։ Նա շեշտել է, որ հակամարտության բոլոր կողմերի իրատեսական ու կառուցողական ներգրավվածությունն առաջնային նշանակություն ունի տևական խաղաղության հասնելու ջանքերի արդյունավետության համար: Զրուցակիցները մտքեր են փոխանակել Լեռնային Ղարաբաղի հիմնահարցի  կարգավորման բանակցային գործընթացին առնչվող հարցերի շուրջ:  Համանախագահները Հայաստանի ու Ադրբեջանի արտաքին գործերի նախարարներին ներկայացրեցին իրենց առաջիկա ծրագրերը: Անդրադարձ կատարվեց հետագա քայլերին։