Արմինֆո. Վաշինգտոնը պատրաստ է աջակցել Հայաստանի նոր կառավարության տնտեսական և քաղաքական բարեփոխումներին: Փոխվարչապետ Տիգրան Ավինյանի հետ հանդիպմանն այդ մասին հայտարարել է Հայաստանում ԱՄՆ դեսպան Ռիչարդ Միլսը, համոզմունք հայտնելով, որ և գործարար և ներդրումային միջավայրի բարելավումը կօգնի ներգրավել ավելի մեծ թվով ամերիկյան ընկերությունների, որոնք արդեն տեսնում են այստեղ առկա ներուժը:
Հայաստանի կառավարության մամուլի ծառայության հաղորդման համաձայն, կողմերը քննարկել են երկկողմ համագործակցությանն առնչվող մի շարք հարցեր՝ ներառյալ ներդրումային և դրամաշնորհային ծրագրերի շարունակականությունը, հարկային և ենթակառուցվածքային համակարգերում խթաններ հաղորդելու անհրաժեշտությունը, անդրադարձել են Հայաստանի մրցունակությանը «Հազարամյակի մարտահրավերներ» ծրագրի նոր համաձայնագրի համար: ԱՄՆ դեսպանը խոստացել է առաջիկայում անդրադառնալ այդ հարցին: Ռիչարդ Միլսը կարևորել է նաև Լիդիան-Արմենիա ընկերության գործունեության շարունակականությունը` որպես միջազգային խոշոր ներդրումային ծրագրի:
Հայաստանի փոխվարչապետն, իր հերթին, հավաստիացրել է, որ նոր կառավարությունը անաչառ ուսումնասիրություններ է իրականացնելու՝ վեր հանելու Հայաստանում հանքարդյունաբերական ոլորտի ընդհանուր պատկերն ու համապատասխանությունը միջազգային և պետական ստանդարտներին, և, որ այդ ստուգումները պետք է կազմակերպվեն բոլոր ձեռնարկություններում՝ թափանցիկ ու բոլոր կողմերի համար արժանահավատ ձևաչափով: Իսկ ստանդարտներին համապատխան գործող ձեռնարկությունները պաշտպանված են լինելու պետության կողմից:
Ավելի վաղ ՀՀ էներգետիկ ենթակառուցվածքների և բնական պաշարների նախարարությունը հրաժարվել էր քննարկել «Ամուլսար՚ ոսկու հանքավայրի յուրացման ծրագիրը դադարեցնելու հարցը: Նախարարությունը, անդրադառնալով Ամուլսարի ծրագրին, մասնավորապես տեղեկացրել էր. «Ընդերքօգտագործման իրավունքը կարող է դադարեցվել միայն ՀՀ ընդերքի մասին օրենսգրքով սահմանված դեպքերով, իսկ «Լիդիան Արմենիա» ՓԲ ընկերությանը տրամադրված ընդերքօգտագործման իրավունքը չի կարող դադարեցվել օտարերկրյա կազմակերպությունների կողմից տրված եզրակացության հիման վրա: Երկրի էկոլոգիական և հասարակական կազմակերպություններին ուղղված նամակում նշվում էր, որ ՀՀ ընդերքի մասին օրենսգրքի 51-րդ հոդվածի համաձայն ընդերքօգտագործման իրավունքը տրվում է համապատասխան փորձաքննական, այդ թվում նաև Շրջակա միջավայրի վրա ազդեցության, դրական եզրակացությունների հիման վրա: Այդ համատեքստում նշում էր, որ Ամուլսարի ոսկու ծրագիրը հաջողությամբ անցել է նախաարտադրական փուլում Ցիանիդի կառավարման միջազգային օրենսգրքի նախաձեռնության պահանջներին համապատասխանելու վերաբերյալ սերտիֆիկացումը, իսկ 2018թ. հունվարի 18-ի Ցիանիդի կառավարման միջազգային ինստիտուտի պաշտոնական հաղորդագրության մեջ ասվում է, որ համաձայն անկախ աուդիտի արդյունքների, Լիդիանը համապատասխանում է Ցիանիդի օրենսգրքի նախաձեռնության սկզբունքներին և պրակտիկային: «Ամուլսարի նախագիծը կարելի է համարել հաջողված փորձ նոր տեխնոլոգիաների կիրառման, պատասխանատու սոցիալական ու բնապահպանական ծրագրերի իրականացման տեսակետից: Ներկայումս, Ամուլսարում, արդյունահանման համար նախապատրաստական աշխատանքների մոտ 80%-ն արդեն իրականացվել են: Կատարվել են մի քանի միլիոն խ/մ հողային, 9000 խ/մ բետոնային աշխատանքներ: 90 000 խ/մ ծավալի մակաբացման աշխատանքներ են կատարվել, կառուցվել է շուրջ 20 կմ ճանապարհ: Իրականացվել են ջրերի կառավարման, ինչպես նաև բնապահպանական կառավարման մյուս համակարգերի շինարարության զգալի մասը: Պատրաստ են տարրալվացման 2 հարթակները, որոնցում իրականացված են ջրամերժ կավային շերտի տեղադրման աշխատանքները և ընթացքի մեջ են պոլիմերային գեոմեմբրաների տեղադրման աշխատանքները: Հիշեցնենք, որ մայիսի 29-ին մի շարք ոչ-կառավարական կազմակերպությունների կողմից ՀՀ, վարչապետին ուղղված բաց նամակում կոչ էր արվել դադարեցնել Ամուլսարի հանքավայրի իրացումը: Նամակի հեղինակների կարծիքով, հանքավայրի շահագործումը կարող է նոր էկոլոգիական աղետ դառնալ Հայաստանի համար: Ընդ որում, Լիդիանի գործադիր տնօրեն Հայկ Ալոյանը հանդես եկավ հայտարարությամբ, որում, մասնավորապես, նշել էր, որ արդեն երկրորդ օրն է շուրջ 20 մարդ փակել է դեպի հանքավայրի շինհրապարակ տանող ճանապարհը, դրանով 1450 աշխատակիցներին զրկելով աշխատելու հնարավորությունից, միաժամանակ խախտելով երկրի խոշորագույն ներդրումային ծրագիրը: «Այդ սադրանքն ուղղված է ոչ միայն ընկերության, այլ նաև երկրի դեմ, քանի որ այն խոչընդոտում է օրական մի քանի հարյուր հազար դոլարի ստացմանը: «Լիդիան Արմենիան» պատրաստ է ցանկացած ստուգման՝ բնապահպանական չափանիշների, սոցիալական կառավարման, ֆինանսական հոսքերի, բաժնետերերի կազմի, հարկային մուտքերի թափանցիկության և ցանկացած այլ չափանիշներով»,- ասվում էր հայտարարության մեջ: Արդեն հունիսի 6-ին ՀՀ կառավարության ներկայացուցիչները բնապահպանության նախարար Էրիկ Գրիգորյանի գլխավորոթւյամբ այցելեցին Ամուլսար: Facebook- ի իր էջում փոխվարչապետ Տիգրան Ավինյանը գրել էր. «Այսպիսով մենք ազդարարում ենք վարչապետի հանձնարարականի կատարմանն ուղղված աշխատանքների սկիզբը: Նախարարի այցից հետո սեղմ ժամկետներում ստուգումներ կսկսի բոլոր կողմերին ներառող մասնագիտացված տեսչական մարմինը՚:
Հիշեցնենք, որ Lydian Armenia-ն բրիտանական Lydian International-ի դուստր ընկերությունն է, որի բաժնետերերն են նաև ԱՄՆ, Մեծ Բրիտանիայի, մի շարք եվրոպական երկրների միջազգային ինստիտուցիենալ ներրդողներ, այդ թվում` IFC և EBRD: Ամուլսարի ոսկու հանքավայրի շահագործման նախագիծն այսօր Հայաստանում արդյունաբերական ամենախոշոր նախագիծն է, որի ընդհանուր արժեքը կազմում է 370 մլն դոլար: 2016 թվականի օգոստոսին տեղի ունեցավ նախագծի մեկնարկի պաշտոնական արարողությունը, որը նախատեսում է շինարարության և հանքավայրի իրացման սկիզբը: Ամուլսարի հանքավայրի շահագործման ժամկետը կկազմի 10 տարի և 4 ամիս, նախատեսվում է տարեկան արդյունահանել 200 հազար ունցիա ոսկի (մոտ 10 մլն. տոննա հանքանյութ): Ընկերության բաժնետոմսերը ցուցակված են Տորոնտոյի ֆոնդային բորսայում: Ամուլսարի հանքավայրն իր պաշարնորով երկրորդն է Հայաստանում: