Արմինֆո.Հայկական բնապահպանական ճակատ քաղաքացիական նախաձեռնությունը հունիսի 13-ին պաշտոնական հարցում է ուղղել ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանին՝ խնդրելով տրամադրել տեղեկատվություն, թե արդյոք «Թեղուտ» ՓԲԸ-ն ներկայացրել է շահագործման աշխատանքները դադարեցնելու վերաբերյալ որևէ փաստաթուղթ:
Բացի այդ, հայտարարության համաձայն, կազմակերպությունը խնդրում է տեղեկություններ տրամադրել այն մասին, թե արդյոք նախարարությունն ուսումնասիրել է Դանիայի պետական «Արտահանումների վարկավորման գործակալության» (EKF) երաշխավորությամբ PensionDenmark մասնավոր կենսաթոշակային հիմնադրամի կողմից Թեղուտի պղնձամոլիբդենային հանքի շահագործման համար ՎՏԲ բանկի միջոցով «Վալլեքս» խմբին տրամադրած շուրջ 62 միլիոն ամերիկյան դոլարի չափով վարկի հետկանչման և վարկային համաձայնագրի խզման հիմքերը։
Մինչդեռ նախօրեին փոխվարչապետ Տիգրան Ավինյանը խորհրդարանում հայտարարել է, որ Թեղուտի հանքավայրում առաջացած խնդիրների ուսուրմնասիրման նպատակով ձևավորվել է հանձնաժողով: Նրա խոսքով, ինքն արդեն հանդիպել է հանքավայրը շահագործող Vallex ընկրությունների խմբի ղեկավարության հետ, քննարկումներ անցկացնել, ինչի արդյունքում էլ ձևավորվել է հանձնաժողով: «Հաջորդ շաբաթվա վերջին տեղի կունենա հանձնաժողովի նիստը, որի ընթացքում կընդունվեն համապատասխան որոշումներ»,- նշել է փոխվարչապետը:
ԱԺ պատգամավոր Արմենուհի Կյուրեղյանն իր հերթին նշել է, որ տարածաշրջանի շատ բնակիչներ ցածր գներով վաճառել են իրենց հողամասերը՝ պայմանով, որ կաշխատեն հանքավայրում 50 տարվա ընթացքում: Նրանցից ոմանք վարկային ռեսուրսներ են ներգրավել, և հանքավայրի աշխատանքի դադարեցումից հետո վարկային կազմակերպություններն սկսել են տույժ և տուգանքներ կիրառել: Պատգամավորն առաջարկել է մինչև ընկերության աշխատանքի վերսկսումը պարտավորեցնել Vallex-ին՝ աշխատավարձ վճարել մարդկանց, որոպեսզի նրանք կարողանան իրենց պարտավորությունները կատարել վարկային կազմակերպությունների հանդեպ: Նա նաև հետաքրքրվել է Vallex ընկերության սնանկացման հնարավորությամբ, ինչին ի պատասխան՝ փոխվարչապետը հայտնել է, որ նման տեղեկատվության չի տիրապետում:
Մինչդեռ ընթացիկ տարվա մարտին այդ ժամանակ տնտեսական զարգացման և ներդրումների նախարար Սուրեն Կարայանը հայտնել էր, որ Թեղուտի հանքի շահագործումը չի դադարեցվել, այն ընդամենը ժամանակավորապես կասեցվել է, արդյունահանման աշխատանքները կսկսվեն արդեն 2018 թ. տարեվերջին- հաջորդ տարեսկզբին: Նա նաև համոզմունք էր հայտնել, որ այս ընթացքում հանքը շահագործող «Վալեքս՚ ընկերությունը կլուծի բոլոր տեխնիկական և բնապահպանական խնդիրները, և հանքավայրի շահագործումը կսկսվի ամենամոտ ժամանակներս: