Երկուշաբթի, 11 Հունիսի 2018 14:05

Արմինֆո.Հունիսի 11-ին արտգործնախարար Զոհրաբ Մնացականյանն Ալմաթիում մասնակցել է Հավաքական անվտանգության պայմանագրի կազմակերպության արտգործնախարարների խորհրդի նիստին:

Բացելով նիստը` Ղազախստանի ԱԳ նարարար Կայրատ Աբդրախմանովը ՀԱՊԿ անդամ պետությունների արտաքին քաղաքական գերատեսչությունների ղեկավարների անունից շնորհավորել է Զոհրաբ Մնացականյանին՝ Հայաստանի ԱԳ նախարարի բարձր պաշտոնը ստանձնելու կապակցությամբ՝ մաղթելով հաջողություններ իր պատասխանատու առաքելության մեջ: Նախարարներն անդրադարձ են կատարել 2017թվականի նոյեմբերին Մինսկում կայացած ՀԱՊԿ գագաթաժողովի ընթացքում ձեռք բերված պայմանավորվածությունների կատարման ընթացքին։

 

Ինչպես ԱրմԻնֆո-ին հաղորդեցին Հայաստանի ԱԳՆ մամուլի ծառայությունից, ՀԱՊԿ արտգործնախարարների խորհրդի նիստի օրակարգում ներառված էին կազմակերպության շրջանակներում արտաքին քաղաքականության համադրմանը, պաշտպանության և անվտանգության ոլորտներում տարեկան խորհրդատվությունների ծրագրին, տարածաշրջանային և միջազգային մարտահրավերներին և սպառնալիքներին հակազդեցության, ահաբեկչության դեմ պայքարին, կազմակերպության խաղաղապահ առաքելության բաղադրիչին առնչվող հարցեր: Ելույթ ունենալով ՀԱՊԿ ԱԳՆԽ նիստին՝ Զոհրաբ Մնացականյանը ներկայացրել է կազմակերպությունում Հայաստանի առաջնահերթությունները, Հայաստանի գնահատականներն ու մոտեցումները տարածաշրջանային և միջազգային մարտահրավերների և հիմնախնդիրների առնչությամբ, անդրադարձել է կազմակերպության շրջանակներում փոխգործակցության ամրապնդման մեխանիզմներին, խաղաղապահության բնագավառում ՀԱՊԿ կարողությունների շարունակական զարգացմանը։

 

ՀՀ ԱԳ նախարարն իր գործընկերներին տեղեկացրել է, որ երեկ ադրբեջանական կողմի գործողությունների հետևանքով Արցախի ՊԲ զինծառայող է զոհվել։ Այս համատեքստում նախարար Մնացականյանը ներկայացրել է Հայաստանի և Ադրբեջանի սահմանին, ինչպես նաև Ադրբեջանի և Արցախի միջև շփման գծի երկայնքով Բաքվի գործողությունները, շեշտելով, որ դրանք անընդունելի և անպատասխանատու քայլեր են՝ ուղղված իրավիճակի սրմանը, որոնք կասկածի տակ են դնում խաղաղ բանակցությունների առաջընթացն ապահովելու Ադրբեջանի հանձնառությունը։

 

Ինչպես հաղորդում է ՀԱՊԿ կայքը, ԱԳՆԽ նիստի մասնակիցները ստորագրել են

«Միջին եւ կարճ հեռահարության հրթիռների վերացման մասին պայմանագրի շուրջ ստեղծված իրավիճակի մասին» հայտարարությունը, հավանություն են տվել 2018 թվականին երկրորդ կիսամյակի և 2019 թվականի առաջին կիսամյակի արտաքին քաղաքականության, անվտանգության և պաշտպանության հարցերի շուրջ ՀԱՊԿ անդամ պետությունների ներկայացուցիչների խորհրդատվությունների ծրագիրը, ընդունվել է 2018 թվականի համատեղ հայտարարությունների վերաբերյալ ԱԳՆԽ որոշում:

 

Ամփոփելով նիստի արդյունքները` ՀԱՊԿ գլխավոր քարտուղար Յորի Խաչատուրովը նշել է, որ ընդունվել են մի շարք որոշումներ, որոնք նպատակաուղղված են արտաքին քաղականությանն առնչվող ՀԱՊԿ անդամ պետությունների ջանքերի համախմբմանը` միջազգային հարաբերություններում առկա բացասական միտումների, կայունությանն ու անվտանգությանն սպառնացող մարտահրավերների չեզոքացման նպատակով կանխարգելիչ դիվանագիտական միջոցառումների իրագործման նպատակով:

 

Նա նաև ընդգծել է, որ վերջին  տարիներին էապես աշխուժացել է խաղաղապահ ոլորտում ՀԱՊԿ համագործակցությունը ՄԱԿ քարտուղարության հետ: «ՀԱՊԿ ԱԳՆԽ նիստում քննարկվել են ՄԱԿ պրոֆիլային կառույցների հետ հետագա աշխատանքի հարցեր` ՄԱԿ գլոբալ հակաճգնաժամային գործունեությունում ՀԱՊԿ խաղաղապահ ներուժի կիրառման համար իրավական և կազմակերպական-տեխնիկական պայմաններ ձևավորելու նպատակով՚, - հայտարարել է ՀԱՊԿ գլխավոր քարտուղարը: