Միլզ. Երևանում հանդիպումների ընթացքում Բրինքը քննարկել է նաև «Հազարամյակի մարտահրավերներ՚ կորպորացիայի նոր նախագիծը

Արմինֆո.ԱՄՆ լիարժեք աշխատում է Հայաստանի նոր կառավարության հետ և դիտարկում է բոլոր ուղղությունները, որտեղ կարող է օգտակար լինել:

Մայիսի 31-ին լրագրողների հետ զրույցում այդ մասին հայտարարել է Հայաստանում ԱՄՆ դեսպան Ռիչարդ Միլզը Խաղաղության կորպուսի կամավորների երդման արարողությունից հետո, պատասխանելով այն հարցին, թե հնարավոր է արդյոք, որ Հայաստանում վերջին քաղաքական գործընթացներից հետո Հայաստանը միանա «Հազարամյակի մարտահրավերներ՚ կորպորացիայի ծրագրերին: Այդ համատեքստում դեսպանը հիշեցրել է, որ նախորդ շաբաթ Հայաստանում էր ԱՄՆ պետքարտուղարի Եվրոպայի և Եվրասիայի հարցերով փոխտեղակալ Բրիջիթ Բրինքը,        ով հանդիպել է Հայաստանի նախագահի, վարչապետի, արտգործնախարարի հետ: «Հանդիպումների նպատակն էր հասկանալ, թե ԱՄՆ ինչպես կարող է աջակցել: Մենք խոսել ենք աջակցության տարբեր հնարավոր ուղղությունների մասին, քննարկել ենք նաև «Հազարամյակի մարտահրավերներ՚ կորպորացիայի նոր ծրագիրը՚, - ասել է ԱՄՆ դեսպանը, հավելելով, որ այդ քննարկումները շարունակվում են:

Անդրադառնալով այն հարցին, որ ԱՄՆ նախագահն Իլհամ Ալիևին շնորհավորել էր Ադրբեջանի 100-ամյակի կապակցությամբ, մինչդեռ հայկական կողմը շնորհավորանք չի ստացել, Միլզն ասել է. «Որքան ինձ հայտնի է, Հայաստանի կառավարությունը հանրապետության 100-ամյակը տոնում է սեպտեմբերին, ուստի այն ժամանակ եմ ակնկալում պաշտոնական շնորհավորանք՚: Դեսպանն ավելի կարևոր է համարում այն փաստը, որ Թրամփն արդեն շնորհավորել է Հայաստանի նոր կառավարությանն ու ժողովրդին խաղաղ ցույցերի և բողոքի շարժման առնչությամբ, որոնք հանգեցրել են Հայաստանի պատմության նոր գլխի:

Հիշեցնենք, որ 2006 թվականին Հայաստանի կառավարությունն ու «Հազարամյակի մարտահրավերներ՚ կորպորացիան ստորագրել էին համաձայնագիր` նպատակաուղղված գյուղերում աղքատության մակարդակի նվազմանը: Ծրագրի շրջնակում ներդրումների ծավալը կազմել էր շուրջ 177 մլն դոլար: Ծրագիրն ավարտվել է 2011 թվականին: 2017 թվականի ապրիլին ANCA ներկայացուցիչների հետ առցանց երկխոսության ընթացքում Ռիչարդ Միլզը հայտարարել էր, որ ամերիկյան «Հազարամյակի մարտահրավերներ՚ կորպորացիայի դրամաշնորհի հնարավոր տրամադրումը Հայաստանին մեծապես կախված է առաջիկա խորհրդարանական ընտրություններից: