Մնացականյան. Պետք է բացառվի որևէ գործողություն, որը վնասում է խաղաղությանն ուղղված միջավայրի մթնոլորտին

Արմինֆո.Ցանկացած զարգացում, որը խոչընդոտելու է բանակցային գործընթացին, անընդունելի է լինելու, «Բանաձև» հաղորդաշարին հարցազրույցում հայտարարել է ԱԳ նախարար Զոհրաբ Մնացականյանը՝ անդրադառնալով սահմանին ադրբեջանական ուժերի կողմից նոր հենակետերի կառուցմանը և այդ առնչությամբ Երևանի դիրքորոշմանը:

Նրա համոզմամբ, պաշտպանության նախարարն ավելի հստակ կպատասխանի

այդ հարցին: «Բայց նաև սահման մեր այցի նպատակը կանխարգելիչ էր այն առումով, որ նման հարցերը մեր ուշադրության կենտրոնում են՝ և պաշտպանության նախարարի համար, և ինձ համար: Մենք արդեն նշել ենք, որ ցանկացած զարգացում, որը խոչընդոտելու է բանակցային գործընթացին, անընդունելի է լինելու և բացասական ազդեցություն է ունենալու բանակցային գործընթացի վրա: Մենք բոլոր ջանքերը պետք է ներդնենք, որպեսզի խուսափենք նման զարգացումներից: Մենք, այսինքն՝ բոլոր կողմերը, տվյալ դեպքում խոսքն Ադրբեջանին է վերաբերում, պետք է խուսափենք ցանկացած նման զարգացումից:

Մենք մտադիր ենք ներգրավված մնալ գործընթացի, բանակցությունների մեջ, մենք մտադիր ենք բանակցությունները վարել՝ խաղաղ ճանապարհով կարգավորմանը հասնելու նպատակով: Մենք դա անելու ենք Մինսկի խմբի համանախագահության շրջանակներում: եվ որևէ գործողություն, որը վնասում է խաղաղությանն ուղղված միջավայրի մթնոլորտին, պետք է բացառվի»,- նշել է ԱԳ նախարարը:

Պատասխանելով այն հարցին, թե ինչ է նա ենթադրում «խաղաղությանը նպաստող մթնոլորտի ձևավորում» ասելով՝ Մնացականյանը նշել է. «Դրան են վերաբերում նաև հայտարարությունները, որ պարբերաբար հնչում են Բաքվից, որոնց էությունը, բովանդակությունը վկայում է հակառակի մասին, վկայում է այն մասին, որ պահպանվում են նման ձևակերպումներ, նման հայտարարություններ, որոնք որևէ կերպ չեն կարող գնահատվել` որպես խաղաղությանը միտված մթնոլորտին նպաստող: Սա մեզ համար շատ էական, շատ կարևոր հարց է բանակցային գործընթացի կոնտեքստում: Բանակցությունները չեն կարող ընթանալ այնպիսի միջավայրում, որտեղ գոյություն ունի թշնամության մթնոլորոտ: Չի կարող լինել մի բան, որը չի նպաստում նորմալ, բնականոն գործընթացին, որը չի նպաստում իրական խաղաղության հաստատմանը»:

Անդրադառնալով Ադրբեջանի արտգործնախարարի հետ հանդիպման հնարավորությանը և Փաշինյան-Ալիև հանդիպում կազմակերպելու հարցին՝ Մնացականյանը կոչ է արել չշտապել: «Դուք արդեն լսել եք, որ ես հեռախոսազրույց եմ ունեցել տարբեր պաշտոնյաների հետ, ովքեր անմիջական դերակատարություն ունեն այդ գործընթացում: Սա շարունկվելու է: Մենք նպատակաուղղված, հաշվարկած քայլերով շարունակում ենք այս գործընթացը: Անմիջական շփումները կլինեն այն ժամանակ, երբ կհասնենք այդ պահին: Ես չեմ խոսում ամիսների մասին, ես խոսում եմ շաբաթների մասին: Մենք այդ գործընթացի մեջ ենք»,- հավաստիացրել է նախարարը:

«Գոյություն ունի գործընթաց: Մենք դա գնահատում ենք, մենք պատրաստվում ենք և մտադիր ենք անել այն, ինչ մինչ օրս արվել է, և դրա հիման վրա կառուցել գործընթացը: Մենք խոսել ենք շարունակականության մասին, խոսել ենք խաղաղ, բանակցությունների միջոցով կայուն խաղաղություն ապահովելու մասին»,- եզրափակել է նախարարը: