BSTDB-ն և Ամերիաբանկն ստորագրեցին ՓՄՁ վարկավորման 15 մլն ԱՄՆ դոլարի երկրորդ վարկային պայմանագիրը

Արմինֆո. 22 մայիսի, 2018թ. Սևծովյան առևտրի և զարգացման բանկն ու Ամերիաբանկը կնքեցին 15 մլն ԱՄՆ դոլարի վարկային պայմանագիր, 5 տարի ժամկետով: Պայմանագրի նպատակն է Հայաստանում զարգացնել փոքր և միջին բիզնեսը, որը երկրի տնտեսության առանցքն է կազմում: 

Ինչպես տեղեկացրել է Ամերիաբանկի մամուլի ծառայությունը, ՓՄՁ հատվածին ուղղված աջակցությունը երկու բանկերի համար էլ միասնական նպատակ և առաջնահերթ խնդիր է հանդիսանում: Տրամադրվող վարկային միջոցները Ամերիաբանկին թույլ կտան Հայաստանում գործող փոքր և միջին ձեռնարկություններին առաջարկել պահանջվող երկարաժամկետ ֆինանսավորումը, որը կենսականորեն անհրաժեշտ է վերջիններիս աճն ու մրցունակությունն ապահովելու և նոր աշխատատեղեր ստեղծելու համար:

«Ամերիաբանկի համար մեծ պատիվ է շարունակել արժեքավոր համագործությունը Սևծովյան առևտրի և զարգացման բանկի հետ: Կնքվող պայմանագիրն Ամերիաբանկին թույլ կտա ամրապնդել իր դիրքերը ՓՄՁ վարկավորման շուկայում և ավելի մեծ ներդրում ունենալ երկրի տնտեսության զարգացման գործում», - նշել է Ամերիաբանկի Գլխավոր տնօրեն Արտակ Հանեսյանը:

«Սա Սևծովյան առևտրի և զարգացման բանկի կողմից Ամերիաբանկին ՓՄՁ ֆինանսավորման նպատակով տրամադրվող թվով երկրորդ վարկային գործիքն է: Մենք ուրախ ենք շարունակել համագործակցությունը շուկայի առաջատարի հետ և իրականացնել Հայաստանի համար մշակված մեր ռազմավարական ծրագրերը՝ հնարավորություն տալով բանկին զարգացնել երկրի տնտեսությունը և հատկապես ՓՄՁ ոլորտը», - նշել է Սևծովյան առևտրի և զարգացման բանկի բանկային գործառնությունների գծով փոխնախագահ Իգոր Լեշուկովը:

Ըստ Հայաստանի Բանկերի Ֆինանսական Վարկանիշի 2017 թվականի դեկտեմբերի 12-ի արդյունքների, Ամերիաբանկը շարունակում է գլխավորել իր հիմնական ֆինանսական ցուցանիշներով: Բանկի ակտիվները կազմել են 677.7 մլրդ դրամ ($ 1,4 մլրդ, առաջին տեղ), վարկային ներդրումները`487.4 մլրդ դրամ (մոտ $ 1 մլրդ, առաջին տեղ): Բանկի վարկային պորտֆելում ՓՄՁ վարկերի մասնաբաժինը կազմել է ավելի քան 18%, կամ 84,7 մլրդ դրամ ($ 175 մլն, երկրորդ տեղը շուկայում): Բանկային շուկայում ՓՄՁ-ների վարկավորման ընդհանուր ծավալնեում Ամերիաբանկի մասնաբաժինը հասնում է 13 տոկոսի: 2017 թվականը բանկը եզրափակել է 7,7 մլրդ դրամ ($ 16 մլն, իսկ առաջին տեղ) զուտ շահույթով, ապահովելով 24% աճ:

Հիշեցնենք, որ «Ամերիաբանկ» ՓԲԸ-ն ունիվերսալ բանկ է, որը տրամադրում է ներդրումային, կորպորատիվ եւ մանրածախ բանկային ծառայություններ` բանկային լուծումների համալիր փաթեթի տեսքով: Հայկական շուկայում բանկը գործում է 1996 թվականի հոկտեմբերի 31-ից: Ամերիաբանկի մասնաճյուղային ցանցը բաղկացած է 14 ստորաբաժանումներից, որոնցից`  9 մայրաքաղաքային եւ 5 մարզային: 2015 թ. դեկտեմբերին Վերակառուցման և զարգացման  եվրոպական բանկի մուտքից հետո Ամերիաբանկի բաժնետիրական կապիտալում բաժնեմասային մասնակցությունը փոխվել է հետեւյալ կերպ. Ամերիա Գրուպ CY Ltd. - 65,8%, EBRD - 20,7% և ESPS Holding Limited - 13,5%:  Պարգևատրվել է` Euromoney-ից (2017, 2016, 2014, 2012, 2011 թվականներին), Global Finance-ից (2017, 2016, 2015, 2013, 2012 թվականներին), The Banker/FT-ից (2017, 2016, 2015, 2013, 2010 թվականներին),  Commerzbank կողմից  2008 թվականից ի վեր ամեն տարի արժանանում է "STP-Award" պարգևի:

Նշենք, որ Սևծովյան առևտրի և զարգացման բանկը միջազգային ֆինանսական հաստատություն է, որը հիմնադրվել է Սևծովյան տնտեսական համագործակցության 11 հիմնադիր երկրների կողմից (Ալբանիա, Ադրբեջան, Բուլղարիա, Թուրքիա, Հայաստան, Հունաստան, Մոլդովա, ՌԴ, Ռումինիա, Վրաստան, Ուկրաինա): Սևծովյան առևտրի և զարգացման բանկի գլխամասային գրասենյակը գտնվում է Հունաստանի Սալոնիկ քաղքում: Բանկի ստեղծման նպատակն է խթանել անդամ երկրների տնտեսական զարգացումը և նրանց միջև տարածաշրջանային համագործակցությունը` գլխավորապես մասնավոր և պետական հատվածի ֆինանսավորման (վարկեր, վարկային գծեր, բաժնեմասնակցության ձեռքբերում, երաշխավորության տրամադրում, առևտրի ֆինանսավորում) միջոցով: Բանկի կանոնադրական կապիտալը կազմում է 3.45մլրդ եվրո: Բանկը «Ստանդարտ ընդ Փուրզ» վարկանշային կազմակերպության կողմից ստացել է երկարաժամկետ «A-» և «Մուդիզ» վարկանշային կազմակերպության կողմից՝ «A2», վարկանիշը: