Արմինֆո. Հայաստանը միշտ էլ կողմ է եղել ղարաբաղյան հակամարտության ստատուս-քվոյի փոփոխմանը: Այս մասին ԱրմԻնֆո-ի թղթակցի հետ զրույցում հայտարարել է ՀՀ ԱԳՆ խոսնակ Տիգրան Բալայանը, անդրադառնալով Ադրբեջանի նախագահի կողմից Հայաստանին ուղղված մեղադրանքներին, որ չի ցանկանում փոխել ստատուս քվոն:
Նա հիշեցրել է, որ ԵԱՀԿ Մինսկի խմբի համանախագահները հանդես են եկել ստատուս քվոյի փոփոխմանն ուղղված կոնկրետ առաջարկություններով: «Եվ այն կողմը, որ ոչ միայն չի ընդունում այդ առաջարկները, այլև նաև անում է ամեն ինչ, որպեսզի տապալի բանակցային գործընթացը և բոլոր ձեռք բերված պայմանավորվածությունները, այդ թվում նաև Ալիևի հետ հանդիպման ընթացքում, պատասխանատու է ստատուս-քվոն չփոխելու հարցում: Եվ այդ տրամաբանական կապը հասկանալու համար պետք չէ լինել հաջողակ փորձագետ կամ քաղաքագետ», - ասել է ՀՀ ԱԳՆ մամլո քարտուղարը:
Մեկնաբանելով Ալիևի հայտարարությունը, որ Հայաստանը միայն բանակցային գործընթացի պատրանք է ստեղծում, Բալայանը կոչ է անում ղեկավարվել տրամաբանությամբ և վերլուծել ներկա իրավիճակը: «Ո՞վ է իմիտացնում բանակցային գործընթացը: Այն կողմը, որը գալիս է համաձայնությա՞ն: Օրինակ, վերցնենք Հայաստանի և Ադրբեջանի արտգործնախարարների վերջին` կրակովյան հանդիպումը: Հանդիպումից հետո ԵԱՀԿ Մինսկի խմբի համանախագահները հանդես եկան հայտարարությամբ, որում նրանք ընդգծում են, որ ձեռք է բերվել պայմանավորվածությունների կատարման սկզբունքային համաձայնություն, որոնք ձեռք էին բերվվել նախորդ երեք գագաթաժողովներում (Ժնև, Վիեննա և Սանկտ Պետերբուրգ. խմբ.): Հայաստանը հրապարակայնորեն հայտարարում է վերոհիշյալ համաձայնագրերի իրագործման իր պատրաստակամությունը, իսկ Ադրբեջանը ոչ միայն հնարում է ստեղծագործ գաղափարներ, այլև հրաժարվում բարձրաձայնել սկզբունքորեն ձեռք բերված պայմանավորվածությունների մասին: Այժմ ո՞վ է անում իմիտացիան», - հարցադրում է ՀՀ ԱԳՆ մամուլի քարտուղարը:
Միևնույն ժամանակ, անդրադառնալով ղարաբաղյան հակամարտության փաթեթային կարգավորմանը և Ալիևի հայտարարություններին, որ առաջին քայլը պետք է լինի զավթված «ադրբեջանական տարածքների» դեօկուպացիան, Բալայանը հիշեցրել է, որ հակամարտության փաթեթային լուծումը ոչ միայն Երևանի, այլ նաև միջնորդ երկրների և ողջ միջազգային հանրության սկզբունքային դիրքորոշումն է: «Համանախագահ երկրները և ողջ միջազգային հանրությունը բազմիցս հայտարարել են, որ բոլոր հարցերը պետք է ունենան փաթեթային լուծում`փուլային իրագործմամբ: Խոսքը հենց սրա մասին է: Ինչ վերաբերում է դեօկուպացիային, ապա, այո, կա Լեռնային Ղարաբաղի տարածքների դեօկուպացիայի հարցը, որոնք ներկայումս օկուպացված են Ադրբեջանի կողմից », - ասել է ՀՀ ԱԳՆ մամլո քարտուղարը:
Պատասխանելով հարցին, թե արդյո՞ք կարելի է դրական առաջընթաց ակնկալել բանակցային գործընթացում Հայաստանի և Ադրբեջանի ընտրական գործընթացների հետո, Բալայանն ընդգծել է, որ պաշտոնական Երևանն առաջընթացը երբեք չի կապել ընտրությունների հետ: Ըստ նրա, ընդմիջումը, որը վերցրեց Ադրբեջանը, ուղղված չէր սեփական հասարակության նախապատրաստմանը փոխզիջմանը կամ զիջումներին, այլ` տարածքային պահանջների հայտարարմանը, ընդ որում, ոչ միայն Լեռնային Ղարաբաղի, այլ նաև Հայաստանի ու նրա մայրաքաղաքի նկատմամբ, որն ունի 2800 տարվա պատմություն: «Եթե ադրբեջանական կողմն ունի բանակցային գործընթացում առաջընթացի հասնելու անկեղծ ցանկություն, ապա ընտրությունները խոչընդոտ չեն: Մանավանդ որ, ոչ ոք չէր էլ կասկածում «ընտրություններ» անվանմամբ իրադարձության արդյունքներում: Դեռ կտեսնենք, թե այդ, այսպես կոչված, ընտրություններին ինչ գնահատական կտան միջազգային դիտորդները», - եզրափակել է Բալայանը: