ՀՀ արդարադատության նախարարությունն սկսել է ստուգման գործընթաց` պարզելու, թե որքանով է ռուս-թուրքական «ՎիզաՄետրիկ» ՍՊԸ կողմից անձնական տվյալների մշակումը համապատասխանում ՀՀ օրենսդրությանը

Արմինֆո. ՀՀ արդարադատության նախարարության Անձնական տվյալների պաշտպանության գործակալությունը սեփական նախաձեռնությամբ սկսել է ստուգման գործընթաց, պարզելու, թե որքանով է ռուս-թուրքական «ՎիզաՄետրիկ» սահմանափակ պատասխանատվությամբ ընկերության կողմից անձնական տվյալների մշակումը համապատասխանում ՀՀ օրենսդրությանը:

Ստուգման գործընթացը պայմանավորված է Հայաստանում Գերմանիայի դեսպանի  օրերս արած հայտարարության վերաբերյալ զանգվածային լրատվության միջոցների բազմաթիվ հրապարակումներով, ինչպես նաև հարցի շուրջ հանրային մեծ հետաքրքրությամբ ու ՀՀ քաղաքացիների անձնական տվալները Թուրքիա փոխանցվելու մտավախությամբ: Ինչպես հաղորդում է գերատեսչության մամուլի ծառայությունը, «Անձնական տվյալների պաշտպանության մասին» ՀՀ օրենքով սահմանված լիազորությունների շրջանակում Գործակալությունն ուսումնասիրում է բարձրացված խնդիրը՝ ի թիվս այլնի «ՎիզաՄետրիկ» ընկերության կողմից անձնական տվյալների մշակման ընթացքում օրենքի պահպանումը ապահովելու և անձնական տվյալների մշակման հնարավոր խախտումները կանխելու համար: «Գործակալության գործողությունների և արդյունքների վերաբերյալ պարբերաբար կտեղեկացնենք հանրությանը՚, - նշված է գերատեսչության հաղորդագրությունում:

Հիշեցնենք, որ Հայաստանի Հանրարպետությունում Գերմանիայի արտակարգ և լիազոր դեսպան Մաթիաս Քիսլերը մարտի 28-ին մամուլի ասուլիսում հայտարարել էր, թե 2018 թվականի ապրիլի 3-ից Երևանում Գերմանիայի, Բելգիայի, Նիդեռլանդների, Լյուքսեմբուրգի, Ավստրիայի և Շվեդիայի համար ներկայացված Շենգենյան վիզայի դիմումները կընդունի ոչ թե Գերմանիայի դեսպանությունը, այլ «ՎիզաՄետրիկ» սահմանափակ պատասխանատվությամբ ընկերությունը, որը ռուս-թուրքական կոնսորցիում է: Խոսելով «ՎիզաՄետրիկ» ընկերության մասին՝ դիվանագետը հայտնել էր, որ կոնսորցիումի գլխամասային գրասենյակը գտնվում է Թուրքիայում: Ըստ որում, Քիսլերն ընդգծել էր, որ ընկերությունն ընտրվել է խիստ մրցակցային հիմունքով՝ հաշվի առնելով օբյեկտիվ չափորոշիչները: Մրցույթն անցկացվել է ընդհանուր առմամբ Հարավային Կովկասի տարածաշրջանի, այլ ոչ թե՝ առանձին վերցրած Հայաստանի համար: Կենտրոնը գործունեություն է իրականացնում նաև Կենտրոնական Ասիայում: Դեսպանը շտապել էր հանգստացնել ՀՀ քաղաքացիներին. կենտրոնի գործունեության և դիմումներ ներկայացնելու ընթացքում խստորեն կպահպանվեն անվտանգության կանոններն ու ստանդարտները: Հայաստանյան գրասենյակը կգլխավորի ՀՀ քաղաքացի, աշխատակիցները նույնպես Հայաստանի քաղաքացիներ կլինեն: Ընդ որում, նա ընդգծել էր, որ վիզայի տրամադրման վերաբերյալ որոշումը կշարունակի մնալ Գերմանիայի դեսպանատան արտոնությունը: Բացատրելով նորամուծությունների շարժառիթները՝ դիվանագետը նշել էր, որ, նկատի ունենալով վիզաներ ստանալու համար դիվանագիտական գերատեսչություն դիմումների մեծ քանակը, հերթեր էին կուտկվում: Պատասխան ստանալու համար քաղաքացիներն ստիպված էին 6-8 շաբաթ սպասել: «ՎիզաՄետրիկի» հետ համագործակցությունից հետո սպասելաժամանակը կրճատվել է մինչև 48 ժամ: Բարելավվել է ծառայությունների որակը»,- ասել էր դիվանագետը: Ակնկալվում է, որ նոր համակարգի անցումցի հետո կհաջողվի կրկնապատկել հայտերի ընդունումը: Կենտրոնի ծառայությունները Հայաստանի քաղաքացիների համար կարժենան 20 եվրո: