Երկուշաբթի, 19 Մարտի 2018 20:52

Արմինֆո. Մարտի 16-ին «Գողացված «Վրուբելի» վերադարձը» խորագրով միջոցառումների շրջանակներում Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բեմից ներկայացվեց «Լերմոնտով-Ռուբինշտեյն-Վրուբել» գրական-երաժշտական ներկայացումը՝ հագեցած անիմացիոն ժամանակակից լուծումներով։

Ինչպես տեղեկացրել է Ընկերության մամուլի ծառայությունը, ներկայացման մեջ մեկտեղված էին հատվածներ Միխայիլ Լերմոնտովի «Դևը» պոեմից և Անտոն Ռուբինշտեյնի համանուն օպերայից, որոնք ուղեկցվում էին Վրուբելի՝ վերը նշված պոեմի նկարազարդումներով։ Ցուցադրությունը ներկայացնում է «Դևը և Հրեշտակը Թամարի հոգու հետ» նկարի ստեղծման պատմությունը և մեր օրերի նրա «ոդիսականը»: 

Բեմականացման ամենակարևոր առանձնահատկությունը  Վրուբելի կտավների ներկայացումն էր եռաչափ (3D) անիմացիայի ձևաչափով, ինչը հնարավորություն էր տալիս լիովին ընկալել խոսքի և կտավի վարպետների կողմից ստեղծված պատկերներն ու աշխարհը։ Տարբեր թանգարաններից առաջին անգամ հավաքվել ու մեկտեղվել էին «Դևը» պոեմի նկարազարդումները, ստեղծվել էր մեկ ամբողջական  անիմացիոն պատկեր՝ ի լրումն գրական և երաժշտական ներկայացման։

«Ռոստելեկոմ» Հայաստանի հովանավորչության արդյունքում գրական-երաժշտական ներկայացումը ամբողջացել է պոեմին նվիրված ժամանակակից անիմացիոն եռաչափ լուծումների շնորհիվ։ Հետագայում դրանք ներկայացվելու են նաև թանգարանի սրահում։

Երևանում Ռուսական արվեստի թանգարանի հետ համագործակցության արդյունքում նոր տեխնոլոգիական լուծումներ են մշակվել նաև թանգարանում ՝ մոբայլ հավելվածի միջոցով Վրուբելի «Դևը և հրեշտակը Թամարի հոգու հետ» կտավի շուրջ լրացված իրականության (AR) ձևավորման ուղղությամբ, ինչը իրական է դարձնում հրեշտակի շարժումն ու գրավում դեպի Վրուբելի ստեղծած աշխարհ՝ կենդանացնելով պատկերները։ Ցուցադրության ողջ ընթացքում թանգարանի այցելուները կկարողանան ոչ միայն տեսնել, այլ նաև տեսանկարահանել և պահպանել շարժվող պատկերները։

«Վրուբելի գողացված կտավի վերադարձը Հայաստան նշանակալի իրադարձություն է մեզ բոլորիս համար։ ՈՒրախ ենք, որ մեր վաղեմի գործընկերոջ՝ Երևանի ռուսական արվեստի թանգարանի հավաքածուն ամբողջացավ և նման բարձրարժեք արվեստի գործը վերադարձավ իրենց հարկի տակ։

Լինելով տեխնոլոգիական ընկերություն, մեզ համար շատ կարևոր է աջակիցն ու գործընկերը լինել մշակութային արժեքները ժամանակակից հանդիսատեսին և արվեստասերներին նորովի մատուցելու գործում։

Նման անիմացիոն լուծումներն առաջին անգամ են Հայաստանում կիրառվում բեմից, ձևավորվում են նոր մոտեցումներ, ինչը, համոզված եմ, կնպաստի մշակութային կենտրոնների առավել գրավչությանը, այցելությունների աճին։ Իսկ ովքեր այսօր ներկա չեն գտնվի անպայման խորհուրդ կտամ այցելել թանգարան և արվեստի հետ շփվել նաև տեխնոլոգիաների լեզվով»,—նշեց «Ռոստելեկոմ» Հայաստանի գլխավոր տնօրեն Հայկ Ֆարամազյանը։

«Այս ներկայացումը երկու մշակութային կառույցների և տեխնոլոգիական ոլորտի համագործակցության լավագույն օրինակ է։ Այն ոչ միայն ամրապնդում է մշակութային կոթողների համատեղ աշխատանքը, այլ նաև նորովի ու նոր իրականության միջոցով է ներկայանում արվեստասեր հանրությանը։ Այստեղ օգտագործված են ձևավորման հատուկ լուծումներ և արդիական տեխնոլոգիաների հնարավորությունները, որոնք դիտողին կտեղափոխեն Վռուբելյան «Դեմոնիանայի» մոգական աշխարհը՝ անտարբեր չթողնելով անգամ ամենաքմահաճ արվեստասերին»,-ասաց Ռուսական արվեստի թանգարանի տնօրեն Մարինե Մկրտչյանը։

«Գողացված «Վրուբելի» վերադարձը» խորագրով միջոցառումների շարքը մեկնարկել է մարտի 14-ին Ռուսական արվեստի թանգարանում (Երևան, Իսահակյան 38) համանուն ցուցահանդեսի պաշտոնական բացման արարողությամբ, որին մասնակցում էին ՀՀ մշակույթի նախախարը, ներկայացուցիչներ Տրետյակովյան և հայաստանյան թանգարաններից։

Նորաբաց ցուցադրության զարդը ոչ միայն իր գեղարվեստական ու պատմական արժեքով, այլև քրեական ոդիսականով հայտնի դարձած Վրուբելի «Դևը և հրեշտակը Թամարի հոգու հետ» նկարն է: Ցուցադրությունը ներկայացնում է նաև նկարի ստեղծման պատմությունը, մեր օրերի նրա ոդիսականը։

1995 թվականին Երևանի Ռուսական արվեստի թանգարանից (պրոֆեսոր Արամ Աբրահամյանի հավաքածու) կողոպտված ու 22 տարի հետախուզման մեջ գտնվող նկարը հայտնաբերվել էր ռուսական հատուկ ծառայությունների կողմից և մանրակրկիտ վերականգնում անցել Տրետյակովյան պատկերասրահում: 2017 թվականի նոյեմբերի 15-ին Ռուսատանում Հայաստանի օրերի շրջանակում նկարը նախագահ Սերժ Սարգսյանին փոխանցեց Վլադիմիր Պուտինը: 

Արվեստասեր լայն հանրության համար ցուցահանդեսը իր դռնելը կբացի մարտի 20-ից մինչև նոյեմբերի 20-ը։

«ՌՈՍՏԵԼԵԿՈՄ», «ՋԻԷՆՍԻ-ԱԼՖԱ» ՓԲԸ (www.rtarmenia.am) 2012թ. դեկտեմբերից ՀՀ-ում հեռահաղորդակցության ոլորտի առաջատար օպերատորներից մեկը՝ՋԻԷՆՍԻ-ԱԼՖԱ ՓԲԸ-ն հաջողությամբ մատուցում է ինտերնետ հասանելիության և ֆիքսված հեռախոսակապի ծառայություններ Rostelecom ապրանքանիշի ներքո:

2013թ. սեպտեմբեր ամսից ընկերությունը «ՀԻԲՐԻԴ ՍՈԼՅՈՒՇՆԶ» ընկերության հետ համատեղ մատուցում է նոր սերնդի Այփի հեռուստատեսության ծառայությունը ևս:

«Ռոստելեկոմ»-ի ցանցը Հայաստանում կառուցված  է օպտիկա-մանրաթելային մալուխով, որի երկարությունը կազմում է ավելի քան 3000 կմ` ծածկելով ՀՀ տարածքի 80%-ը:

Իրանի և Վրաստանի օպերատորների միջոցով «Ռոստելեկոմ»-ի ցանցը փոխկապակցված  է տարածաշրջանի հիմնական մայրուղային ցանցերի և տրաֆիկի փոխանակման խոշորագույն կենտրոնների հետ:

Ընկերության կորպորատիվ հաճախորդների ցանկում են խոշորագույն ձեռնարկություններ ու բանկեր, ՀՀ կառավարությունը և պետական մարմիններ, հեռահաղորդակցության ընկերություններ և միջազգային կազմակերպություններ: Գերժամանակակից տեխնոլոգիաների կիրառումը ընկերությանը հնարավորություն է տալիս լիովին բավարարել ժամանակակից բաժանորդի կարիքները՝ տարածվելով և ծառայությունների հասանելիությունն ապահովելով ՀՀ ողջ տարածքով: