Հինգշաբթի, 1 Մարտի 2018 16:55

Արմինֆո. «Ելք՚ դաշինքի խմբակցության ղեկավար Նիկոլ Փաշինյանը խորհրդարանի ամբիոնից նախագահի պաշտոնի թեկնածու Արմեն Սարգսյանին մեղադրել է հայ ժողովրդի հանդեպ անհարգալից վերաբերմունք դրսևորելու համար:

«Ահա արդեն մեկ ամիս քննարկվում է այն հարցը, թե արդյոք Դուք Հայաստանի քաղաքացի եք վերջին 6 տարիներին, ինչպես պահանջում է ՀՀ սահմանադրությունը` նախագահի պաշտոնին առաջադրվելու համար, հարցականի տակ է դրվում Ձեր ապագա լեգիտիմության հարցը` որպես նախագահ, իսկ Դուք արհամարհում եք այդ ամենը: Եվ, նույնիսկ, մի ողջ ամիս չեք բարեհաճել ներկայացնել ՄԹ քաղաքացիությունից հրաժարվելու վեևրաբերյալ Ձեր դիմումը` անտեսելով հանրային օրակարգը՚, - հայտարարել է Փաշինյանը, ենթադրություն հայտնելով, որ եթե Սարգսյանը չի ներկայացնում այդ հայտարարությունը, նշանակում է, այն, պարզապես, գոյություն չունի: Այդ առնչությամբ Փաշինյանը հիշել է Բուլգակովի «Իվան Վասիլևիչ՚ ստեղծագործության հայտնի արտահայտությունը` «իսկ թագավորն իսկական չէ՚: «Միթե՞ հայ ժողովուրդը նզովված է, և այլևս երբեք չի ունենալու լեգիտիմ նախագահ՚, - հռետորակն հարց է տվել Փաշինյանը, հավելելով, որ վերջին քսան տարում Սարգսյանը պարբերաբար մերթ հրաժարվել է Հայաստանի քաղաքացիությունից, մերթ վերստին ստացել այն, կախված հանգամանքներից, զբաղեցրած պաշտոնից: «Իսկ արդյոք նման մարդը բարոյական իրավունք ունի հավակնելու նախագահի պաշտոնին՚, - հարց է տվել պատգամավորը:

Այնուհետև Փաշինյանը ենթադրություն է հայտնել, որ Սերժ Սարգսյանը հատուկ է առաջադրել նախագահի պաշտոնի ոչ լեգիտիմ թեկնածուի, որպեսզի վերջինը կախված լինի իր կամքից: «Հենց այդ պատճառով այսօր Արմեն Սարգսյանը, նույնիսկ, չի կարող իր կարծիքը հայտնել վարչապետի պաշտոնի նկատմամբ հավակնությունից հրաժարվելու մասին Սերժ Սարգսյանի հայտարարության վերաբերյալ` այդ պաշտոնի համար հենց նրա թեկնածությունն առաջադրելու ՀՀԿ մտադրության ֆոնին՚, - նշել է Փոշինյանը:

Մինչդեռ ՀՅԴ խմբակցության ղեկավար Արմեն Ռուստամյանը, հայտարարելով Սարգսյանի թեկնածությանը ՀՅԴ աջակցության մասին, գործընկերներին կոչ է արել չքննադատել ապագա նախագահին, առավել ևս, որ նա, միևնույն է, ընտրվելու է: Նա նաև կոչ է արել «չփորփրել թղթերը՚` նկատի ունենալով Սարգսյանի քաղաքացիության հարցը: «Առկա պայմաններում մենք պետք է հնարավորինն անենք ցանկացած արժանի հայի հայրենիք վերադարձնելու համար՚, - հայտարարել է Ռուստամյանը:

Համանման հայտարարությամբ է հանդես եկել արտաքին հարցերի հանձնաժողովի ղեկավար, հանրապետական Արմեն Աշոտյանը, Սարգսյանի քաղաքացիության հարցը համարելով ոչ այնքան արդիական, ինչը հարուցել է Նիկոլ Փաշինյանի տարակուսանքը: «Այդ երբվանի՞ց է սահմանադրական նորմերի պահպանումը երկրորդական, իսկ ու՞մ համար է գրվում սահմանդրությունը, և ի՞նչը կարող է ավելի կարևոր լինել երկրի հիմնական օրենքի կատարումից՚, - հարց է տվել Փաշինյանը:

Իրեն ընդդիմադիր համարող «Ծառուկյան՚ դաշինքի խմբակցության քարտուղար Վահե Էնֆիաջյանն էլ հայտարարել է, որ իր ներկայացրած քաղաքական ուժը, խորհրդակցելով իր առաջնորդ, գործարար-պատգամավոր Գագիկ Ծառուկյանի հետ, որոշել է պաշտպանել Արմեն Սարգսյանի թեկնածությունը, քանի որ երկրի զարգացման նրա տեսլականը համապաատսխանում է «Ծառուկյան՚ դաշինքի դիրքորոշմանը:

Իսկ ՀՀԿ խմբակցության ղեկավար Վահրամ Բաղդասարյանն իր ելույթում հավաստիացրել է, որ ՀՀԿ-ն ի դեմս Արմեն Սարգսյանի ներկայացրել է անխոցելի և ճիշտ թեկնածուի: «Համոզված եմ, որ կունենանք արժանի նախագահ՚, հայտարարել է նա:

Արմեն Սարգսյանն իր ամփոփիչ խոսքում հայտարարել է, որ նախագահի պաշտոնում կձգտի արդարացնել իր հետ կապված հույսերը: «Խոստանում եմ, որ իմ բոլոր ջանքերն ու ներուժը կներդնեմ Հայաստանի զարգացման գործում: Բացի այդ, պատրաստ եմ երկխոսության բոլոր շահագրգիռ շրջանակների հետ, այդ թվում` նրանց հետո, ովքեր ինձ քննադատում են՚, - ամփոփել է թեկնածուն:

Մարտի 2-ին, ժամը 10:30-ին Ազգային ժողովում տեղի կունենա Հայաստանի նախագահի ընտրությունը: Նախագահը պետք է ընտրվի պատգամավորների առնվազն ¾-ի ձայներով (79 ձայն):