Արմինֆո. Հայաստանի նախագահի ընտրություններում ՀՀԿ կողմից իմ թեկնածության առաջադրման վերաբերյալ Սերժ Սարգսյանի առաջարկն «անսպասելի սպասվածն էր», մինչ այդ նրա հետ նման խոսակցություն չի եղել, «Շանթ» հեռուստաընկերությանը տված հարցազրույցում խոստովանել է Միացյալ Թագավորությունում ՀՀ դեսպան Արմեն Սարգսյանը, հավելելով, որ իր անունը բազմիցս այս կամ այն մարդիկ շահարկել են, ամեն նախագահական ընտրությունների, վարչապետի նշանակման ժամանակ, ինչին ինքը
շատ հանգիստ է վերաբերվել:
Նա ընդսմին երախտագիտություն է հայտնել նախագահին, որ իրեն մտածելու ժամանակ է տվել: «Դրա համար շատ պատճառներ կան: Եվ հարցը միայն այն չէ, թե արդյոք ես դա ցանկանում եմ, պատրաստ եմ` թե ոչ, այլ այն, թե ինչ եմ անելու` ընդունելով այդ առաջարկությունը՚, - բացատրել է նա: Ընդ որում, Արմեն Սարգսյանը նշել է, որ իրեն մտածելու ժամանակ էր տրվել նաև 2013 թվականին, երբ առաջարկել էին Միացյալ Թագավորությունում
ՀՀ դեսպանի պաշտոնը, սակայն համաձայնելով, ինքը պայման էր դրել. աշխատել առանց աշխատավարձի:«Այդպիսով, ես ցանկանում էի ինչ-որ ձևով իմ ավանդը ներդնել Հայրենիքի զարգացման գործում՚, - բացատրել է Սարգսյանը:
Անդրադառնալով իր անվան շուրջ պտտվող տարբեր լուրերին, մասնավորապես, իր վարչապետ եղած ժամանակ պաշտպանության նախարար Վազգեն Սարգսյանի հետ վիճաբանությանը, Արմեն Սարգսյանը հերքել է դրանք: «Նման լուրերը կարող են անդրադառնալ ոչ միայն երկրի ներքին իրավիճակի, այլև նրա միջազգային հարաբերությունների վրա՚, - հավաստիացրել է Սարգսյանը, ընդգծելով, որ 1996 թվականին վարչապետի պաշտոնից իր հրաժարվելու պատճառը ոչ թե Վազգեն Սարգսյանի հետ վիճաբանությունն էր, ինչպես շրջանառվում է ԶԼՄ-ներում, այլ լուրջ հիվանդությունը, որն ստիպեց իրեն բուժումը շարունակել արտասահմանում: Արմեն Սարգսյանը հերքել է նաև Ջերմուկում Ամուլսարի հանքավայրը շահագործող «Լիդիան՚ ընկերության հետ իր առնչության վերաբերյալ հաղորդումները: «Ոչ ես, ոչ ընտանիքիս անդամները երբեք այդ ընկերության բաժնետեր չենք եղել և չենք լինի: Վերջին անգամ այդ ընկերության հետ գործ եմ ունեցել 5 տարի առաջ:
«Լիդիանը՚ Կանադայում գրանցված թափանցիկ ընկերություն է, և բոլորը կարող են հեշտությամբ գտնել դրա սեփականատերերի անունները, որոնց թվում իմը, հաստատ, չկա՚, - բացատրել է նախագահի պաշտոնի թեկնածուն, չթաքցնելով փաստը, որ որպես ՀՀ դեսպան աջակցել է այդ ընկերությանը Հայաստանի տնտեսությունում ներդրումների ուղղությամբ: «Իսկ այն, որ ես չէի կարող լինել «Լիդիանի՚ տնօրենների խորհրդի անդամ, ապացուցում է այն փաստը, որ նրա բաժնետերերն են Համաշխարհային բանկն ու Եվրոպական բանկը, իսկ
այդ կառույցները միջոցներ չեն ներդնում այն ընկերություններում, որոնց խորհրդի անդամները նախկին կամ գործող պաշտոնատար անձինք են՚, - բացատրել է Սարգսյանը:
Դեսպանը նշել է, որ ժամանակին ինքն աշխատել է «Կոկա-Կոլա՚ ընկերության և HSBC բանկի հետ, որոնք տևական աշխատանքից հետո որոշել են ներդրումներ կատարել և իրենց ներկայացուցչությունները բացել Հայաստանում: Սարգսյանը նաև հաղորդել է, որ «Լիդիանի՚
բաժնետերերից մեկը` Ջոզեֆ Ուգուրլյանը, ազգությամբ հայ է և այժմ ՀԷԿ է կառուցում Արցախում:Պատասխանելով հասարակայնությանը հուզող այն հարցին, թե արդյոք ինքը, առաջադրվելով նախագահի պաշտոնում, չի խախտում վերջին 6 տարին Հայաստանում բնակվելու սահմանադրական ցենզը, Սարգսյանը նշել է, որ այդ հարցի պատասխանը կտան համապատասխան կառույցները:
Անդրադառնալով Հայաստանի ղեկավարության հետ իր փոխհարաբերություններին առնչվող հարցին` դեսպանը հավաստիացրել է, որ ոչ մի դիսոնանս չի զգում: Իսկ ինչ վերաբերում է երկրում աղքատության բարձր մակարդակին, ապա Արմեն Սարգսյանը նշել է, որ այդ խնդիրը չի կարելի լուծել բարեգործությամբ, այն կարելի է հաղթահարել միայն աշխատանքով, արժանի աշխատավարձով աշխատատեղերի ստեղծմամբ: «Եթե ես որոշեմ առաջադրվել և ընտրվեմ, ապա բոլոր ջանքերս կուղղեմ տնտեսության զարգացմանն ու աշխատատեղերի
ստեղծմանը, ներդրումների ներգրավումն ինքնանպատակ չէ՚, - նշել է Սարգսյանը:
Նա ընդգծել է, որ ինքն ամեն ինչի հասել է ջերմեռանդ աշխատանքով, քանի որ ապահով ընտանիքում չի ծնվել, և իրեն օրինակ են ծառայել ծնողները, ովքեր նույնպես անխոնջ կերպով աշխատել են:
«Հաջողության այլ ճանապարհ ես չգիտեմ, ուստի իմ անցած ճանապարհը երբեք ինձ թույլ չի տա որևէ մեկի նայել վերևից` անկախ նրա սոցիալական կարգավիճակից կամ տարիքից՚, - հավաստիացրել է նախագահի պաշտոնի թեկնածուն: Խոսելով Մեծ Բրիտանիայում իր կյանքի մասին` նա ընդգծել է, որ որտեղ էլ լիներ, միշտ մնացել է հայ և իրեն զգացել է մի քիչ սփյուռքահայ: Նա նաև պատմել է, որ իր թոռները, որոնք ծնվել են Մեծ Բրիտանիայում, շաբաթը մեկ անգամ պարտադիր երկու ժամ հայերեն են պարապում տատիկի հետ: