Պետր Միկիսկա. Հայաստանում Չեխիայի դեսպանատան համար շատ կարևոր է ուրախություն պարգևել երեխաներին

Արմինֆո. Այս տարի Հայաստանից 6 տաղանդավոր երեխա արժանացել է մրցանակների, որոնք նրանց հանձնել է

ՀՀ-ում Չեխիայի Հանրապետության արտակարգ և լիազոր դեսպան Պետր Միկիսկան: Նախօրեին Հայոց ցեղասպանության թանգարան-ինստիտուտի ժամանակավոր ցուցադրությունների սրահում տեղի ունեցավ Լիդիցեի գեղեցիկ արվեստների 45-րդ միջազգային պատանեկան ցուցահանդեսի մրցանակների հանձնման արարողությունը: Ցուցահանդեսը նվիրվում է չեխական Լիդիցե գյուղի երեխաներին, ովքեր կորցրել են իրենց ծնողներին երկրորդ համաշխարհային պատերազմի ժամանալ:

Ինչպես իր ելույթում նշել է դեսպանը, 1942 թվականին չեխական Լիդիցե գյուղը ոչնչացվել է՝ նացիստական կառավարության պահանջով: Դա մեծ ողբերգություն էր, և ի հիշատակ այդ երեխաների, ինչպես նաև մնացած բոլոր երեխաների, ովքեր զոհվել են ռազմական հակամարտությունների ընթացքում՝ 1967 թվականին Չեխիայում սկսեց անցկացվել մանկական ցուցահանդես:

ԱրմԻնֆո-ին թղթակցի հետ զրույցում ՀՀ-ում Չեխիայի Հանրապետության արտակարգ և լիազոր դեսպան Պետր Միկիսկան պատմել է Հայաստանում այդ ցուցահանդեսի պատմության մասին: «Հայաստանում մեր դեսպանատունը բացվել է 2012 թվականին, և այդ ժամանակից վեր մենք մրցանակներ ենք հանձնում տաղանդավոր հայ երեխաներին: Բայց ես տեղյակ եմ, որ հայ երեխաներն այդ միջոցառմանը մասնակցել են դեռ ԽՍՀՄ ժամանակիներից: Մեզ համար շատ հաճելի է երեխաների հետ աշխատելու փաստը: Հայաստանում, իրոք, շատ են օժտված երեխաները, և կրկնակի հաճելի է, որ կարող ենք ուրախություն պարգևել նրանց»:

Դեսպանը նշել է, որ 2012 թվականին առաջին ցուցահանդեսն ընթացել է Դիլիջանում, քանի որ հենց այդ քաղաքի երեխաներն են ամենամեծ թվով մրցանակներ ստացել, իսկ դեսպանատունն այդ ժամանակ դեռ չուներ համապատասխան տարածքներ, որտեղ հնարավոր կլիներ հյուրեր հրավիրել: «Դա շատ գեղեցիկ, ջերմ և ուրախ միջոցառում էր: Կարելի է ասել, որ Լիդիցե կերպարվեստի միջազգային մանկական ցուցահանդեսի մայրաքաղաքը Հայաստանում Դիլիջանն է»,- հայտարարել է դեսպանը:

Նա նաև նշել է, որ ցուցահանդեսում իր տեսած ամենահիշարժան նկարը նվեր է ստացել  Դիլիջանի գեղարվեստի դպրոցի տնօրենից: «Այժմ այդ նկարը գտնվում է իմ տանը, և ես հնարավորություն ունեմ ամեն օր տեսնել այն: Հայաստանում Չեխիայի դեսպանատունը համագործակցում է դպրոցների հետ, մենք աշխատում ենք երեխաների հետ, և դա շատ հաճելի ու կարևոր է մեզ համար»,- եզրափակել է

Միկիսկան:

Նշենք, որ Լիդիցեի գեղեցիկ արվեստների միջազգային պատանեկան ցուցահանդեսը հիմնվել է 1967 թվականին: 1973 թվականին այն դարձել է միջազգային: Վերջին տարիներին ցուցահանդես է ուղարկվում երեխաների ավելի քան 25 000 գեղարվեստական ստեղծագործություն: 2017 թվականին տեղի է ունեցել երեխաների աշխատանքների 45-րդ հոբելյանական ցուցահանդեսը: Ցուցահանդես-մրցույթի թեման եղել է Ճամփորդությունը: Այս տարի իրենց աշխատանքներ են ներկայացրել 224 հայ երեխա: Դիլիջանից Նարե Թովմասյանն արժանացել է «Լիդիցեի վարդ» մեդալին: