Արցախի օմբուդսմեն. Ադրբեջանական դիվերսիոն ներթափանցման վերջին փորձը յուրօրինակ արձագանք էր ԵԽԽՎ-ում Սերժ Սարգսյանի ելույթին

Արմինֆո.  «Արցախի Մարտունու շրջանի Կուրոպատկինոյի ուղղությամբ  Ադրբեջանի ԶՈւ դիվերսիոն ներթափանցման խափանված փորձը յուրօրինակ արձագանք էր նախագահ Սարգսյանի` ադրբեջանցի պատգամավորին ուղղված կոչին՝ հանգստացե՛ք՚, - «Ֆեյսբուքի՚ իր էջում այդպիսի կարծիք է հայտնել Արցախի մարդու իրավունքների պաշտպան Ռուբեն Մելիքյանը։ «Չեն հանգստանալու։

Քանի դեռ Ադրբեջանում իշխում է համատարած հայատյացությունը, չեն հանգստանալու։ Դեռ երկար ժամանակ պետք է զգաստ լինենք ու աչալուրջ։ Ու իհարկե չշեղվենք մարդու իրավունքների նկատմամբ հարգանքի սկզբունքից։ Մեր ճշմարտացիության ու արդարացիության գրավականներից մեկը, կարծում եմ, հենց դա է՚, - գրել է Մելիքյանը։

Հիշեցնենք, որ ԵԽԽՎ ամբիոնից Սերժ Սարգսյանը հայտարարել էր, թե ղարաբաղյան հակամարտության կարգավորման ճանապարհին խոչընդոտը Բաքվի մաքսիմալիստական պահանջներն են, սակայն Արցախը երբեք չի լինի Ադրբեջանի կազմում: «Մոռացեք այդ մասին և վերադարձեք իրատեսական, կառուցողական բանակցությունների հուն՚, - հայտարարել էր նախագահը:

Հունվարի 25-ի գիշերը՝ ժամը 02:00-ի սահմաններում, արցախա-ադրբեջանական հակամարտ զորքերի շփման գծի հարավարևելյան (Կուրոպատկինո) ուղղությամբ տեղակայված հայկական դիրքերից մեկի պաշտպանական հատվածում ՊԲ առաջապահ ուժերի կողմից հավաստանշվել է հակառակորդի հետախուզադիվերսիոն խմբի ներթափանցման փորձ: Ձեռնարկված կանխարգելիչ գործողությունների արդյունքում ադրբեջանական հատուկ  ջոկատայինները հետ են շպրտվել: Ըստ նախնական տվյալների՝ հակառակորդի կողմից կան կորուստներ: Մանրամասները ճշտվում են: