Արմինֆո. Որոշ ապրանքների թանկացման առնչությամբ իրանցիների դժգոհությունը չհասավ այն մակարդակի, երբ այն կարելի է օգտագործել հեղաշրջում կատարելու համար: ԱրմԻնֆո-ին այդպիսի կարծիք է հայտնել ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը:
Դեկտեմբերի 28-ից Իրանի կառավարության սոցիալ-տնտեսական քաղաքականության դեմ բողոքի ակցիաները համակել էին երկրի խոշորագույն քաղաքները: ԶԼՄ-ների հաղորդումների համաձայն, անկարգությունների զոհ է դարձել ավելի քան 21 մարդ, շուրջ 3700 մարդ ձերբակալվել է: Թեհրանն արդեն հայտարարել է բողոքի ակցիաների ճնշման մասին:
«Առաջին անհրաժեշտության մթերքների թանկացումներ,իրականում, եղել են, սակայն սոցիալ-տնտեսական իրավիճակն Իրանում, ընդհանուր առմամբ, բարենպաստ է և, նույնիսկ, կարող է օրինակ ծառայել ԱՊՀ ամենազարգացած երկրների համար: Ես բոլորովին վերջերս եմ վերադարձել Իրանից, և այն քաղաքներում, որտեղ ինձ վիճակվել է լինել, բողոքի ակցիաները փոքրաթիվ էին, աննշմարելի և տևում էին մի երկու ժամ՚, - հաղորդել է նա:
Իրանագետն արևմտյան ԶԼՄ-ների կողմից Իրանի հակակառավարական հանրահավաքների լուսաբանումում տեսնում է զգալի հիպերբոլիզացում` Հայաստանի հարևան երկրում առկա իրողությունների ընկալումը միտումնավոր նենգափոխելու նպատակով: Մասնավորապես, նրա գնահատմամբ, խոսքը վերաբերում է տնտեսական պահանջներով հանրահավաքների քաղաքականացման փորձերին` սոցիալական ցանցերի և ԶԼՄ-ների միջոցով ներգործության տեխնոլոգիաների գործուն կիրառման միջոցով:
«Դա արվում էր, առաջին հերթին, Թեհրանի կոշտ հակազդեցության հասնելու նպատակով` հանրահավաքների կոշտ ճնշման տեսքով, ինչն արտաքին ուժերին Իրանի նկատմամբ ներգործության լրացուցիչ լծակներ կտար: Սակայն Իրանի իշխանությունները, ոստիկանությունն ու անվտանգության մյուս կառույցների աշխատակիցները խուսափեցին իրավախախտումներ կատարած ցուցարարների նկատմամբ կոշտ ուժի կիրառումից, և, այպիսով, տեղի ունեցավ բողոքների ոչ թե ճնշում, այլ, ընդամենը, կանխարգելում՚, - ամփոփել է իրանագետը: