Արմինֆո.Իսրայելի, մասնավորապես, Երուսաղեմի հայ համայնքի թվակազմի նվազումը մեր գլխավոր խնդիրն է: Դեկտեմբերի 22-ին այդ մասին հայտարարել է Եգիպտոսում ՀՀ նախկին դեսպան Ռուբեն Կարապետյանը` «Ռամկավար-ազատական՚ կուսակցության կազմակերպած կլոր սեղանի ընթացքում, որը նվիրված էր հայկական Երուսաղեմի ճակատագրին ԱՄՆ նախագահ Դոնալդ Թրամփի վերջին հայտարարությունից հետո:
Դեսպանը նշել է, որ ճիշտ կլիներ պատվիրակություն ուղարկել ինչպես Իսրայել, այնպես էլ Պաղեստին` երկու կողմերին լսելու և խնդիրը պարզելու նպատակով, սակայն Հայաստանի ԱԳՆ արդեն ուշացրել է այդ քայլը:
«Թրամփը հասկանում է, որ Մերձավոր արևելքում իր գլխավոր դաշնակիցն Իսրայելն է, և ամեն կերպ սատարում է նրան` մերձավորարևելյան ճգնաժամի ֆոնին: Մերձավոր արևելքում իրավիճակը վերահսկելու համար Թրամփն օգտագործում է իր գլխավոր ռազմավարական դաշնակից Իսրայելին՚, - եզրափակել է Կարապետյանը, ընդգծելով, որ տվյալ իրավիճակում հայ համայնքի համար գլխավորն իր անկախության պահպանումն է Իսրայելում:
Մայր աթոռ Սուրբ Էջմիածնի արտաքին հարցերի համար պատասխանատու Նաթան եպիսկոպոսն, իր հերթին, հայտարարել է, որ եկեղեցուն մտահոգում է հայկական Երուսաղեմի ճակատագիրը` վերջին իրադարձությունների լույսի ներքո, սակայն բնավ ոչ քաղաքական պատճառներով: Մտահոգությունն առնչվում է Երուսաղեմի հայ համայնքին: Նա հայտարարել է, թե եկեղեցուն շատ է անհանգստացնում այն փաստը, որ Երուսաղեմի հայ համայնքի թվակազմը գնալով նվազում է, բացի այդ, Թրամփի հայտարարությունում խոսք անգամ չկա այն մասին, թե ինչ է լինելու Երուսաղեմում գտնվող եկեղեցական համայնքների հետ: «Ինձ շատ է մտահոգում այն փաստը, որ Երուսաղեմը ժամանակի ընթացքում կարող է վերածվել նույնպիսի փակ քաղաքի, ինչպես` Բեթղեհեմը, որը շրջապատված է պատով, և առանց անձնագրային վերահսկողության հնարավոր չէ այնտեղ մուտք գործել, ինչը բարդացնում է բնակիչների կյանքը: Բեթղեհեմի գրեթե բոլոր հայերն արդեն տեղափոխվել են, և ես մտավախություն ունեմ, որ նույնպիսի ճակատագիր է սպասում Երուսաղեմի հայերին՚, - ընդգծել է եպիսկոպոսը:
Նա նաև նշել է, որ եկեղեցուն, ըստ էության, անհանգստացնում է անորոշությունը: «Ի՞նչ կլինի, եթե Իսրայելի իշխանությունները չճանաչեն եկեղեցական համայնքների ստատուս-քվոն: Ի՞նչ կլինի հայ համայնքի և Երուսաղեմում գտնվող հողերի, հայ ընտանիքների, դպրոցների հետ՚, - ամփոփելով հարց է տվել եպիսկոպոսը:
Հիշեցնենք, որ դեկտեմբերի 6-ին ԱՄՆ նախագահ Դոնալդ Թրամփը Երուսաղեմը ճանաչել է Իսրայելի մայրաքաղաք և հայտարարել Թել Ավիվից ԱՄՆ դեսպանատունը Երուսաղեմ տեղափոխելու մասին: ԱՄՆ նախագահի որոշումը դատապարտել են ոչ միայն իսլամական աշխարհի երկրները, այլև մի շարք եվրոպական պետություններ, ընդգծելով, որ դա կարող է նոր բախումներ հրահրել հակամարտության գոտում: Հայաստանի արտգործնախարար Էդվարդ Նալբանդյանն, իր հերթին, հայտարարել էր, որ Երուսաղեմի կարգավիճակի հարցը միջազգային օրակարգի կարևորաույն հարցերից մեկն է, որը կարելի է լուծել բանակցությունների ճանապարհով` իսրայելապաղեստինյան հակամարտության կողմերի համար ընդունելի համատեքստում: Դեկտեմբերի 21-ին ՄԱԿ գլխավոր ասամբլեան ընդունել է բանաձև, որում կոչ է արվում Երուսաղեմը չճանաչել Իսրայելի մայրաքաղաք: Բանաձևում ԱՄՆ չի հիշատակվում, սակայն ասվում է, որ Երուսաղեմի վերաբերյալ բոլոր որոշումները պետք է չեղարկվեն: