Շարմազանով. Երբ Սերժ Սարգսյանը խոստանում էր չհավակնել վարչապետի պաշտոնին, քաղաքական իրողություններն այլ էին

Արմինֆո.«Տվյալ պահի դրությամբ կառավարող կուսակցությունը վարչապետի պաշտոնի պաշտոնապես որոշված թեկնածու չունի: Բոլոր թեկնածուներին «առաջադրում է՚ մամուլը` սեփական հայեցողությամբ: Ինչ վերաբերում է մեզ, ապա թեկնածությունների քննարկման և առաջադրման համար մենք պետք է  անցկացնենք խորհրդակցություն՚, - դեկտեմբերի 19-ին ԱրմԻնֆո-ի թղթակցի հետ զրույցում հայտարարել է ԱԺ փոխխոսնակ Էդուարդ Շարմազանովը, անդրադառնալով ՀՀԿ ներկայացուցիչների միմյանց հաջորդող այն հայտարարություններին, թե վարչապետի պաշտոնի միակ և անփոխարինելի թեկնածուն Սերժ Սարգսյանն է` կառավարման խորհրդարանական ձևի անցումից հետո:

Փոխխոսնակը չի բացառել հնարավորությունը, որ 2018  թվականի ապրիլից հետո վարչապետի պաշտոնի ՀՀԿ թեկնածուն լինի ոչ Սերժ Սարգսյանը, ոչ Կարեն Կարապետյանը: «Երբ ժամանակը գա, մենք կանցկացնենք խորհրդակցություն` Հայաստանի նախագահի գլխավորությամբ, և կքննարկենք բոլոր թեկնածությունները: Սարգսյանի խոսքն, անշուշտ, վճռական կլինի՚, - ընդգծել է Շարմազանովը:

Այդուհանդերձ, Շարմազանովը, կրկնելով իր կուսակիցների հայտարարությունները, նշել է, որ Հայաստանի վարչապետի պաշտոնի առավել պատրաստված և ընդունելի թեկնածուն հենց Սերժ Սարգսյանն է: Քաղաքական գործիչների շրջանում ես, պարզապես, չեմ ճանաչում ավելի իմաստուն, բոլոր ոլորտներում ավելի պատրաստված գործիչ` սկսած պաշտպանության ոլորտից և վերջացրած արտաքին քաղաքականությամբ: Բացի այդ, մի մոռացեք, որ հենց Սերժ Սարգսյանն է արդեն երկար ժամանակ բանակցություններ վարում ղարաբաղյան հարցի կարգավորման շուրջ՚, - ընդգծել է փոխխոսնակը:

Շարմազանովը, միևնույն ժամանակ, նշել է, որ անկախ այն բանից, թե  ով կլինի վարչապետ, միևնույն է, կառավարող կուսակցության ղեկավարը եղել և մնում է գործող նախագահը: Շարմազանովը նշել է, որ Կարեն Կարապետյանը նույնպես ականավոր պետական գործիչ է, սակայն, ներկա վարչապետի և կառավարության ղեկավարի լիազորությունները 2018 թվականից հետո միանգամայն տարբեր են: 2018 թվականից վարչապետը պատասխան է տալու նախարարների կաբինետի քաղաքականության ոչ միայն տնտեսական, այլև ներքաղաքական և արտաքին քաղաքական բաղադրիչների համար: «Դա չափազանց ծանր բեռ է, որի համար ոչ բոլորի ուժերն են ներում, և մենք բոլորս միասին կորոշենք, թե հատկապես ում ուսերին այն պետք է դնենք՚, - նշել է Էդուարդ Շարմազանովը:

Անդրադառնալով այն դիտողությանը, որ 2018 թվականին վարչապետի պաշտոնի համար Սերժ Սարգսյանի թեկնածության առաջադրումը կլինի սահմանադրական հանրաքվեից առաջ իր իսկ տված խոստումի խախտում, երբ նախագահը խոստացել էր չհավակնել նախարարների կաբինետի ղեկավարի պաշտոնին` սահմանադրական բարեփոխումների ընդունմանմ դեպքում, Շարմազանովը նշել է. «Երբ Սերժ Սարգսյանը դա խոստացել է, չէին եղել մի շարք իրադարձություններ, որոնք տեղի են ունեցել հետագայում, օրինակ, չէր եղել ապրիլյան պատերազմը: Պատմության մեջ կան հազարավոր դեպքեր, երբ փոփոխված քաղաքական հանգամանքների դեպքում փոխվել են նաև այս կամ այն քաղաքական գործիչների ծրագրերը: Սերժ Սարգսյանը կղեկավարվի, առաջին հերթին, պետության շահերով, և նա վարչապետի պաշտոնում հարկավոր է մեր ողջ ժողովրդին: Դա իր ցանկությունը չէ, այդպես են դասավորվել հանգամանքները՚, - նշել է փոխխոսնակը, այնուամենայնիվ, անտեսելով այն փաստը, որ մեծ քաղաքականությունում ընդունված չէ մի քանի տարի առաջվա համար խոստումներ տալ` հաշվի առնելով իրողությունների անխուսափելի փոփոխությունը:

Հավելենք, որ այժմ հանրապետության կառավարման խորհրդարանական ձևի անցումից հետո վարչապետի պաշտոնի համար շրջանառվում է երկու թեկնածություն`  Սերժ Սարգսյանի և Կարեն Կարապետյանի: Իր վերջին հարցազրույցում նախագահ Սերժ Սարգսյանը հավաստիացրել է, որ առայժմ չի կողմնորոշվել իր քաղաքական ծրագրերի առնչությամբ: Իսկ ավելի վաղ նա հավաստիացնում էր, որ սահմանադրական բարեփոխումների ընդունման դեպքում ինքը վարչապետի պաշտոնը չի զբաղեցնի: Մինչդեռ վերջին ժամանակներս ՀՀԿ անդամները մեկը մյուսին հերթ չտալով հայտարարում են, թե 2018 թվականի ապրիլից հետո երկրի վարչապետի ամենահարմար թեկնածուն Սերժ Սարգսյանն է, և նրան այդ պաշտոնում ոչ ոք չի կարող փոխարինել:

Վարչապետ Կարեն Կարապետյանն, իր հերթին, պատասխանելով 2018 թվականի ապրիլից հետո իր ծրագրերին առնչող հարցին, հայտարարել է, որ հաճույքով կշարունակեր գլխավորել կառավարույթյունը: Սերժ Սարգսյանը «առողջ՚ է որակել Կարապետյանի այդ ձգտումը, իսկ նրա և նրա գլխավորած կառավարության աշխատանքը գնահատել է դրական: