Արմինֆո. Արևմուտքը փորձում է Ռուսաստանի դաշնակիցներին Մոսկվայի հետ պայքարի զենք դարձնել, մամուլի ասուլիսի ժամանակ այդպիսի կարծիք է հայտնել «Ինտեգրում և զարգացում» ՀԿ նախագահ, Եվրասիական փորձագիտական ակումբը համակարգող Արամ Սաֆարյանը:
Նրա խոսքով, Արևմուտքի նման քաղաքականությունը չի շրջանցել նաև Հայաստանին: Սաֆարյանի խոսքով, հնարավոր բոլոր ուղղություններով Ռուսաստանի հետ կոնֆլիկտ է նախաձեռնվել՝ վերջինիս թուլացնելու և համաշխարհային բևեռներից մեկի դերից զրկելու նպատակով: «Արևմուտքի և Ռուսաստանի սահմանների ողջ երկայնքով հնարավոր է լարվածության նոր օջախների առաջացում, հների բռնկում»,- կանխատեսել է փորձագետը:
Ըստ որում, անդրադառնալով Հայաստանի և Եվրամիության միջև օրերս ստորագրված Համապարփակ և ընդլայնված գործընկերության մասին համաձայնագրին՝ Սաֆարյանը նշել է, որ ՀՀ իշխանությունները շահագրգռված են ԵՄ հետ հարաբերությունների զարգացմամբ՝ այնքանով, որքանով դրանք չեն հակասի ՀԱՊԿ-ի, Եվրասիական տնտեսական միության հանդեպ ստանձնած պարտավորություններին և հայ-ռուսական ռազմավարական գործընկերությանը: Նրա խոսքով, ԵՄ հետ համաձայնագիրը կոչված է ամրապնդելու Հայաստանի անվտանգությունը, այլ ոչ թե՝ լարվածության նոր օջախներ ստեղծելու աշխարհաքաղաքական տարբեր բևեռների մրցակցության գործընթացում:
Խոսելով Համաձայնագրի բուն տեքստի մասին՝ Սաֆարյանը նշել է, որ մի շարք կետեր հարուցում են փորձագիտական շրջանակների թյուրմբռնումը՝ հատկապես ՀԱԷԿ փակման պահանջի մասով: «Եվրասիական փորձագիտական ակումբի վերլուծաբանները գտնում են, որ նոր ԱԷԿ ստեղծումը՝ ռուսաստանցի, հնարավոր է, այլ գործընկերների օգնությամբ, ազգային անվտանգության խնդիր է: Անհրաժեշտ է հնարավորություն տալ Հայաստանի իշխանություններին առաջիկա տասը տարում շարունակել նոր ԱԷԿ ստեղծման նպատակով հեռանկարային գործընկերներ գտնելու ուղղությամբ աշխատանքները, քանի որ եթե Հայաստանը դուրս մնա աշխարհի ատոմային երկրների ակումբից, որտեղ այն բավական հեռանկարային գործընկեր է, մենք կկորցնենք մեր ատոմային ֆիզիկայի և էներգետիկայի ոլորտում՝ տասնամյակներ կուտակված փորձը»,- հայտարարել է փորձագիտական ակումբի համակարգողը:
Համաձայնագրում հաջորդ վիճահարույց կետը Սաֆարյանը համարել է մոնոպոլիաների դեմ պայքարը: «Եթե մենք չենք ուզում փոխել աշխարհաքաղաքական հավասարակշռությունը երկրում, այլ միայն ցանկանում ենք հավասարակշռել և էժանացնել բնական մոնոպոլիաների աշխատանքի արդյունքը, ինչպես գրված է համաձայնագրում, այդ ժամանակ անհրաժեշտ կլինի լրջորեն մտածել այդ տարածություն ոչ թե արևմտյան, այլ՝ ռուս խաղացողներ հրավիրելու մասին: Մասնավորապես՝ խոսքը վերաբերում է «Հայկական երկաթուղիներին», «Գազպրոմ Արմենիային»»,- հայտարարել է նա:
Արամ Սաֆարյանը վստահ է, որ այդպիսով Հայաստանի կառավարությունը կաշխատի ոչ թե երկրի ներսում աշխարհաքաղաքական հավասարակշռության փոփոխման ուղղությամբ և այդպիսով հարուցի Մոսկվայի անվստահությունը, այլ՝ կհրավիրի ՌԴ-ից երկրորդ, երրորդ խաղացողի, որոնց միջև պայքարը կարող է հանգեցնել մատուցվող ծառայությունների հետագա էժանացման:
Խոսելով հայ հասարակության մտավախությունների մասին՝ կապված այն բանի հետ, որ ԵՄ հետ համաձայնագրի ստորագրումից հետո հանրապետությանը կարող են պարտադրվել հայ իրականության և հոգեկերտվածքի համար օտար արժեքեր՝ փորձագետը նշել է, որ փաստաթղթում նման դրույթներ ուղղակիորեն չկան: Ըստ որում, նա ընդգծել է, որ հայ հասարակությունը պետք է պայքարի իր ավանդույթներին օտար «կասկածելի» արժեքների դեմ:
Ամփոփելով՝ Սաֆարյանը նշել է, որ Ռուսաստանի հետ միությունը արժանի և կարևոր քաղաքական խաղացող է դարձնում Հայաստանին Հարավային Կովկասում: «Ռուսաստանը Հայաստանի անվտանգության երաշխավորն է, և տնտեսական առաջին գործընկերը: Բարձրաստիճան ղեկավարների շուրթերով ՀԱՊԿ-ն հստակ հայտարարել է, որ Հայաստանի նկատմամբ ցանկացած արտաքին սպառնալիքի դեպքում բավարար ռազմական աջակցություն կցուցաբերվի»: