Արտակ Զաքարյան. Տարկետմանը վերաբերող դրույթները նույնությամբ պահպանվել են երկրորդ ընթերցմանը ներկայացվող փաստաթղթում

Արմինֆո. Տարկետման իրավունքի հետ կապված որևէ փոփոխություն տեղի չի ունեցել: Այդ մասին «Ազատության» հետ զրույցում պարզաբանել է պաշտպանության փոխնախարար Արտակ Զաքարյանը՝ շեշտելով, որ առաջին ընթերցմամբ ընդունված «Զինվորական ծառայության և զինծառայողի կարգավիճակի մասինե օրենքի նախագծում տարկետմանը վերաբերող դրույթները նույնությամբ պահպանվել են 2-րդ ընթերցմանը ներկայացվող փաստաթղթում:

Հետևաբար, ըստ պաշտպանության փոխնախարարի, զիջումների մասին խոսք լինել չի կարող, ինչպես պնդում են լրատվամիջոցները:

Այն, ինչի մասին գրել է մամուլը, Արտակ Զաքարյանի փոխանցմամբ, վերաբերել է մեկ այլ օրինագծի՝ տվյալ դեպքում ՝«Սահմանված կարգի խախտմամբ զինծառայություն չանցած քաղաքացիների մասինե օրենքի նախագծին։

Նշենք, որ առաջին ընթերցմամբ ընդունված զինծառայության մասին օրենքով արմատապես փոխվում է ուսումնառության նպատակով տրամադրվող տարկետման իրավունքի կարգը: Ըստ այդմ, տարկետումից կարող են օգտվել միայն այն քաղաքացիները, ովքեր պայմանագիր կկնքեն Պաշտպանության նախարարության հետ՝ պարտավորվելով ուսումնառության ընթացքում ռազմական պատրաստություն անցնել, իսկ ուսումնառությունից հետո ծառայել Պաշտպանության նախարարության նշած վայրում՝ երեք տարի ժամկետով։ Հակառակ պարագայում, 18 տարին լրանալուց հետո երիտասարդները կզորակոչվեն բանակ՝ երկու տարի ժամկետով: Ի դեպ նշենք, որ զինծառայության մասին օրինագծի համաձայն զինածառայության ենթակա անձինք կարող են օգտվել տարկետման իրավունքից ուսումնառությունից բացի նաև ընտանեկան, ինչպես նաև առողջական վիճակի պատճառով։

Ուշագրավ է հատկապես երեխաների առկայության դեպքում տրամադրվող արտոնությունները: Տվյալ դեպքում, ըստ օրինագծի, պարտադիր զինծառայությունից կարող են ազատվել այն երիտասարդները, ովքեր մինչև բանակ զորակոչվելը կունենան երկու կամ ավելի երեխա, բացառությամբ որդեգրված երեխաների: Ուշագրավ է նաև մեկ այլ դրույթ, բանակից կարող են ազատվել այն երիտասարդները, ովքեր ունեն առնվազն զույգ երեխայով վեցամսյա հղիության մեջ գտնվող կին:

Նշենք, որ այս շաբաթ Ազգային ժողովի քառօրյայի ընթացքում զինծառայության մասին օրենքի նախագիծը կքննարկի 2-րդ ընթերցմամբ: Օրինագիծը խորհրդարանում կներկայացնի պաշտպանության փոխնախարար Արտակ Զաքարյանը: