Սվիտալսկի. Հայաստանն ու ԵՄ-ն անշեղորեն առաջ են ընթանում ընդլայնված և համապարփակ գործընկերության շուրջ նոր համաձայնագրի ստորագրման ուղղությամբ

Արմինֆո.ԵՄ-ն չի տեսնում  հայկական կողմից ահազանգ, որը կվայեր Հայաստան-ԵՄ նոր շրջանակային համաձայնագրի ստորագրման գծով ավելի վաղ Երևանի ստանձնած պարտավորություններից հրաժարվելու հնարավորության մասին: Սեպտեմբերի 11-ին Երևանում  լրագրողներին այդ մասին հայտարարել է Հայաստանում ԵՄ պատվիրակության ղեկավար, դեսպան Պյոտր Սվիտալսկին` մեկնաբանելով Մոսկվայի ճնշման ներքո համաձայնագրի ստորագրումից Երևանի հրաժարվելու հնարավորությունը:

Դեսպանի ասելով, Հայաստանն ու ԵՄ-ն անշեղորեն առաջ են ընթանում ընդլայնված և համապարփակ գործընկերության շուրջ նոր համաձայնագրի ստորագրման ուղղությամբ: Դիվանագետի հավաստմամբ, այդ են վկայում նաև Հայաստանի արտգործնախարարի հայտարարությունները ԵՄ և Արևելյան գործընկերության երկրների արտգործնախարարների վերջին հանդիպմանը:

Հիշեցնենք, որ 2015 թվականի հոկտեմբերին ԵՄ արտաքին գործերի խորհուրդը Եվրահանձնաժողովին և բարձր ներկայացուցչին լիզորել էր բանակցություններ սկսել Հայաստանի և ԵՄ միջև նոր իրավական փաստաթղթի շուրջ: Նոր համաձայնագիրը պետք է կփոխարինի Հայաստանի և ԵՄ միջև ասոցացման համաձայնագրին, որը Երևանն ու Բրյուսելը համաձայնեցրել էին, սակայն այդպես էլ չէին ստորագրել, քանի որ 2013 թվականի սեպտեմբերին Հայաստանի նախագահ Սերժ Սարգսյանը շատերի համար անսպասելի հայտարարեց եվրասիական ինտեգրմանը մասնակցելու Հայաստանի որոշման մասին, ինչը, ըստ էության նշանակում էր, ասոցացման համաձայնագրի ստորագրման ձախողում: Այն ժամանակ շատ վերլուծաբաններ ենթադրություն հայտնեցին, որ կտրուկ փոփոխության պատճառը Մոսկվայի կողմից ուժեղ ճնշումն էր: Սակայն պաշտոնական Երևանն այդպես էլ չխոստովանեց դա:

Ավելի ուշ Երևանն ու Բրյուսելը սկսեցին քննարկել նոր, պակաս հավակնոտ համաձայնագրի շուրջ բանակցություններ վարելու հնարավորությունը, որը չհակասեր Հայաստանի պարտավորություններին ԵԱՏՄ անդամության շրջանակում: 2015 թվականի դեկտեմբերի 7-ին Բրյուսելում Հայաստանի արտգործնախարար Էդվարդ Նալբանդյանը և ԵՄ դիվանագիտության ղեկավար Ֆեդերիկա Մոգերինին ԵՄ կենտրոնակայանում հայտարարեցին, որ նոր բանակցային փուլի մեկնարկը թույլ կտա փակել 2013 թվականից հետո առաջացած անորոշության էջը:  2017 թվականի փետրվարի 27-ին ՀՀ նախագահ Սերժ Սարգսյանն ու Եվրախորհրդի նախագահ Դոնալդ Տուսկը Բրյուսելում հայտարարեցին Հայաստան-ԵՄ նոր համապարփակ համաձայնագրի շուրջ բանակցությունների ավարտի մասին: Մարտի 21-ին Երևանում Հայաստանն ու ԵՄ-ն նախաստորագրեցին համընդգրկուն և ընդլայնված գործընկերության շուրջ համաձայնագիրը: