Արմինֆո. «Հանուն կայուն մարդկային զարգացման» ասոցիացիայի ղեկավար, բնապահպան Կարինե Դանիելյանը կասկածում է «Նաիրիտ» քիմիական գործարանի տարածքում այրվող նյութի անվտանգությանը: «Դժվար է հավատալ, որ այրվող նյութում ոչ մի վտանգավոր նյութ չկա», - ԱրմԻնֆո-ի թղթկցին հայտարարել է բնապահպանը:
Կարինե Դանիելյանի ասելով, դատելով ըստ քիմիական կազմի, տվյալ փուլում չափազանց դժվար է միանշանակ հայտարարել, որ այրված լաք-էթինոլը նշված ծավալներով վտանգ չի ներկաայցնում ինչպես քիմիական նյութերի մթնոլորտ արտանետման, այնպես էլ Երևանի բնակչության առողջությանը վնաս պատճառելու առումով: «Կարծում եմ` չափազանց կարևոր է վերահսկողություն հաստատել իրավիճակի նկատմամբ և ձգտել արագ արձագանքել», - հայտարարել է նա:
Ավելի վաղ Հայաստանի ԱԻՆ Ճառագայթային, քիմիական, կենսաբանական մոնիթորինգի խումբը հետազոտություն է անցկացրել «Նաիրիտում» և մանրամասներ ներկայացրել այրվող նյութի մասին: ԱԻՆ Ճառագայթային, քիմիական, կենսաբանական մոնիթորինգի բաժնի պետ, գնդապետ Վալերի Բագիյանի ասելով, «Նաիրիտ» գործարանում այրվել է 50 տոննա լաքէթինոլ կամ գործարանի տարածքում գտնվող չորս ցիստերններից երեքը: «Նշված նյութը դժվար է մարել ջրով, տվյալ պահին իրականացվում են ցիստերնների սառեցման աշխատանքներ, ինչից հետո կրակը կմարվի փրփուրով», - ասել է փորձագետը: Գործարանում հրդեհի պատճառների նախնական վարկածը լաք-էթինոլի ինքնաբռնկումն է, քանի այն կարող է բարձր ջերմաստիճանի տակ բռնկվել, նշել է նա: ԱԻՆ ներկայացուցիչը հավաստիացրել է, որ քիմիական գործարանում պայթյունի հետևանքով քիմիական վտանգ գոյություն չունի, չկան նաև վտանգավոր արտանետումններ մթնոլորտ և սպառնալիք բնակչության առողջության համար: Ինչ վերաբերում է այն տեղեկատվությանը, որ հրդեհի օջախի մոտ աշխատող հրշեջները թունավորվել են ծխից, նրանց առաջին օգնություն է ցուցաբերվել, նրանք թթվածնի պակաս եւ շմոլ գազի արտանետում էին զգացել, սակայն շուտով վերադարձել են շարք:
ՀՀ առողջապահության նախարարությունն, իր հերթին, հայտարարել է, որ «Նաիրիտ» գործարանում բռնկված հրդեհի հետևանքով այրվող նյութն առողջության համար վտանգ չի ներկայացնում: Ինչպես ԱրմԻնֆո-ին տեղեկացրել են ՀՀ առողջապահության նախարարությունից, «Նաիրիտ» գործարանի տարածքում պայթյունից և դրա հետևանքով բռնկված հրդեհից որևէ քաղաքացի մարմնական վնասվածք չի ստացել։ Հրդեհաշիջման աշխատանքների ընթացքում ծխահարված երկու հրշեջներն այս պահին անհրաժեշտ բժշկական օգնություն են ստանում «Էրեբունի» բժշկական կենտրոնում։ Նրանք առողջական լուրջ խնդիրներ չունեն և ամենայն հավանականությամբ այսօր դուրս կգրվեն։
«ՀՀ արտակարգ իրավիճակների նախարարության ճգնաժամային կառավարման կենտրոնի տվյալներով այրվող լաքէթինոլ նյութը բնակչության առողջության համար վտանգ չի ներկայացնում։ Այնուամենայնիվ, ՀՀ առողջապահության նախարարությունը հորդորում է բնակչությանը`Հրդեհին մոտ գտնվող և այն տարածքներում, որտեղ զգալի են դրա հետևանքով առաջացած արգասիքները (փոշի, անսովոր հոտ, ծուխ) փակել բնակարանների դռները և պատուհանները։ Նույն տարածքներում խուսափել երկար ժամանակ դրսում մնալուց։ Այս հորդորն առաջին հերթին վերաբերում է երեխաներին, ծերերին և շնչառական հիվանդություններ (հատկապես` ասթմա, բրոնխիտ) ունեցողներին», - ասվում է նախարարության հաղորդագրությունում։
ՀՀ ԱԻՆ Հիդրոմետ ծառայության օդերևութաբանության կենտրոնի տվյալներով ժամը 17-ից հետո սպասվում է քամի հյուսիս-արևելքից դեպի հարավ-արևմուտք, ինչը նշանակում է, որ ծուխն Արարատյան դաշտավայրով կգնա դեպի Թուրքիայի տարածք։
Արմինֆո. Ժամը 14:00-ի սահմաններում հրդեհը «Նաիրիտ» գործարանում մեկուսացվել է, կրակի տարածման վտանգ չկա. այրվող նյութը վտանգ չի ներկայացնում: Այդ մասին ԱրմԻնֆո-ին հաղորդեցին ԱԻՆ մամուլի ծառայությունից:
Արմինֆո.Օգոստոսի 28-ին՝ ժամը 13:10-ին, ահազանգ է ստացվել, որ Երևան քաղաքի «Նաիրիտե գործարանի տարածքում պայթյունի ձայն է լսվել և հրդեհ է բռնկվել: