Երեթշաբթի, 4 Հուլիսի 2017 19:51

Արմինֆո. «Ջրային պաշարների կառավարման հարցում հերթական անգամ համոզվում ենք մեր տնտեսվարողների անկարողության մեջ»,-ԱրմԻՆֆո գործակալության հետ զրույցում հայտարարել է տեխնիկական գիտութոյւնների թեկնածու Քնարիկ Հովհաննիսյանը, մեկնաբանելով ՀՀ կառավարության օրենսդրական նախաձեռնությունը, որի համաձայն 2017 թվականին  Սևանա լճից ջրի բացթողումների ծավալը 170 մլն.խմ փոխարեն կավելանա մինչև 270 մլն.խոր.մետր:

 

«Չէ որ ամենահամեստ գնահատականներով Սևանի ջրի 60%-ը կորչում է ոռոգման համակարգերում, չհասնելով սպառողին: Օրինակ, հողագործները, որոնց ուղղված է ջրի բացթողումների ավելացման մասին որոշումը, ասում են, որ Սևանի ջուրն իրենց գրեթե չի հասնում: Ջրամբարներում, որոնք նախատեսված են գետերի ջրերի ընթացը կարգավորելու նպատակով, ջուրը չի մնում`անպետքության պատճառով, ինչի արդյունքում այդ ջրի զգալի մասը, ֆիլտրացվելով պատերի, հատակի, ամբարտակների միջոցով, կորչում է»,-նկատել է փորձագետը:

 

Նրա խոսքով, պետք է հաշվի առնվի նաև այն անվիճելի փաստը, որ Սևանա լճի մակարդակի իջեցումը հանգեցնում է լճի հետ կապ ունեցող աղբյուրների ջրի անխուսափելի սակավությանը: «Դա արդեն մեկ անգամ տեղի է ունեցել: Մեզ կանգնեցրել են արդեն կայացած փաստի առջև, երբ առանց մտածելու, գիշատչի նման, օգտագործվեցին Արարատյան դաշտավայրի ստորջրյա պաշարները, մակարդակը հասցնելով անթույլատրելի ցուցանիշի: Դա էլ հանգեցրեց այսօր կայացրած որոշմանը: Դե ինչ, հերթը հասավ Սևանին: Իսկ հետո՞: Սևանը լուռ է, ջրային էկոհամակարգերը չեն աղաղակում, նրանք լուռ մահանում են»,-մեկնաբանել է Կ.Հովհաննիսյանը:

 

Հիշեցնենք, որ Ազգային Ժողովն այսօր կայացած արտահերթ նիստում առաջին ընթերցմամբ փոփոխություններ կատարեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում: Ըստ ՀՀ Ջրային ռեսուրսների պետական ​​կոմիտեի նախագահ Արսեն Հարությունյանի, լճից ջրի բացթողումների ավելացման պատճառն այն փաստն է, որ այս տարի Ապարանի և Ազատանի ջրամբարներում ջրի ծավալը նախատեսվածից 17 միլիոն խորանարդ մետրով պակաս է, իսկ Հրազդան գետում ջրի ծավալը նախորդ տարվա համեմատ 40 միլիոն խորանարդ մետրով պակաս է: Բացի այդ, 105 միլիոն խորանարդ մետրով պակաս է նաև Ախուրյանի ջրամբարի ջուրը: Սևանա լճից ջրի լրացուցիչ բացթողումները թույլ կտան լուծել 130 հազար շահառուների ոռոգման խնդիրները: Բացի այդ, ջրի բացթողումները հնարավորություն կտան գործարկել Սևան-Հրազդան կասկադի ՀԷԿ-երը: Նշենք, որ ինչպես ավելի վաղ նշել էր ՀՀ բնապահպանության նախարար Արծվիկ Մինասյանը, Սևանա լճից չի կարելի վերցնել ավելի շատ ջուր, նույնիսկ էներգետիկ նպատակներով: «Նախարարությունը Սևանը համարում է ռազմավարական ջրային պաշար, որի արժեքն ավելի բարձր է, քան, նույնիսկ, էլեկտրաէներգիայից և բերքից ստացված լրացուցիչ օգուտները», - ասել էր նա: