
Արմինֆո. Այսօր Հյուսիսային պողոտայից ոստիկանության պարեկային ծառայողները ՀՀ ոստիկանության Երևան քաղաքի վարչության Կենտրոնականի բաժին են բերման ենթարկել հայտնի ակտիվիստ և փաստաբան, «Բագին» իրավաբանական ընկերության տնօրեն Արգիշտի Կիվիրյանին:
Կիվիրյանը ԶԼՄ-ներին հաղորդել է, որ փողոցում նրան մոտեցել են ոստիկաններն ու փորձել խուզարկել, ինչին նա պատասխանել է, որ դա անօրինական է: Այնուհետև նա բերման է ենթարկվել ոստիկանություն, ինչի համար հիմք է հանդիսացել ոստիկանության ծառայողների կասկածն առ այն, որ նա իր մոտ կրում է սառը զենք. արարք, որը նախատեսված է ՀՀ քրեական օրենսգրքի 235-րդ հոդվածի 4-րդ մասով: «Ես նրանց ասացի, որ հանդիսանում եմ փաստաբանական գտրասենյակի տնօրեն» և օրենքները լավ գիտեմ: Բայց նրանց վարքագծից պարզ երևում էր, որ գիտեն, թե ով եմ ես: Միակ բանը, որ ես խնդրեցի, որպեսզի հնարավորին չափով իրեն շատ չմոտենան, գրպաններս ձեռքերով փակեցի ու հետևեցի նրանց դեպի տեղամաս»,-ասել է իրավաբանը:
Տեղամասում Կիվիրյանին ու նրա փաստաբանին հաղորդել են, որ նրա աջ գրպանում նկատվել է կասկածելի իր, որը նման է սառը զենքի: Դրանից հետո նա դատարկել է գրպաները, որպեսզի ապացուցի հակառակը: Պարզվել է, որ կասկածելի «զենքը» բանալիների խուրձն է: «Նրանց դեմքերն արտահայտում էին ափսոսանք, որ չհասցրեցին իմ գրպանը նետել դանակի նման որևէ իր: Ակնհայտ է, որ դա պատվեր էր»,-հավելել է նա:
Ըստ Կիվիրյանի, այսօրվա միջադեպի պետք է դիտարկի գլոբալ տեսանկյունից: Նրա կարծիքով, Հայաստանում մնացել են շատ քիչ ակտիվիստներ, որոնք իրենց պահում են անկախ, մասնավորապես, չեն հանդիսանում այս ռեժիմի կոնտրգործակալները, հետևաբար, նմաններին փորձում են մեկուսացնել: Նա ենթադրում է, որ որպես այսօրվա միջադեպի մոտիվ կարող էր լինել նրա դատական հայցն ընդդեմ ՀՀ Ոստիկանապետ Վլադիմիր Գասպարյանի ու նրա տեղակալ Հունան Պողոսյանի, ինչպես նաև իր ակտիվ ներգրավվածությունը հանրային կյանքին, մասնավորապես, սոցիալական ցանցերի միջոցով: Կիվիրյանը հղում է կատարել սոցցանցերի իր հրապարակումներին, որտեղ մեկ ամիս առաջ նա հայտարարել էր, որ չի բացառում, որ կարող է դառնալ նման վերաբերմունքի զոհ, որ իրեն կարող են մոտենալ ու նրա մոտ գտնել արգելված որևէ իր, կամ կմեղադրեն բռնաբարության մեջ և այլն: Նա իրեն անվանել է իշխանությունների թիրախ և չի բացառում այսօրվա միջադեպի կրկնությունն ապագայում:
Նշենք, որ ՀՀ Ոստիկանության այսօրվա հաղորդագրությունում ասված է, որ կասկածը հիմնավորվել է հատկապես այն հանգամանքով, որ Կիվիրյանը հրաժարվել է ոստիկանության ծառայողներին կամավոր ներկայացնել իր մոտ գտնվող իրը: Նկատի ունենալով նշվածը՝ Կիվիրյանի ազատությունը սահմանափակվել է հանցանք կատարելու մեջ անմիջականորեն ծագած կասկածանքի հիմքով՝ ՀՀ քրեական դատավարության օրենսգրքի 129-րդ հոդվածի համաձայն: Նույն օրենսգրքի 229-րդ հոդվածի 2-րդ մասի 1-ին կետի կարգով, փաստաբանի մասնակցությամբ, Կիվիրյանը ենթարկվել է անձնական խուզարկության, որի արդյունքում կրումն արգելված առարկա չի հայտնաբերվել /սառը զենքի բարեխիղճ սխալմունք է առաջացրել բանալիների խուրձը/: Արգիշտի Կիվիրյանն ազատ է արձակվել:
Ոստիկանության հայտարարության անհեթեթությունը կայանում է նրանում, որ անձը բերման է ենթարկվել կասկածանքով: Ոչ փաստերը, ոչ օպերատիվ տվյալները, ոչ կոնկրետ հանցանք կատարելը, այլ հենց կասկածներն են, որոնք հանկարծ ծագել են իրավապահների գլխում: Եթե ոստիկանների գործողություններում ակտիվիստի դեմ չկար «քաղաքական ենթատեքստ» կամ մեկ այլ մոտիվացիա, ապա այդ կառույցի ղեկավարոթյունը, ըստ երևույթին, պետք է ձեռնամուխ լինի կառույցի մաքրմանը ոչ մասնագետներից կամ պատահական անձանցից, այլ ոչ թե արդարացնի իր աշխատակիցների ապօրինի պահվածքը`հղումներ կատարելով քրեական օրենսգրքի «անորոշ» հոդվածներին: Հակառակ դեպքում, ոչինչ չի կարող երաշխավորել, որ եվրոպական փողերով բարեփոխվող Հայաստանի իրավապահ համակարգը գայթակղության չի ենթարկվի ու անհրաժեշտություն համարելով երկրում չի կիրառի «Պինոչետի ռեժիմի» պրակտիկան: