Արմինֆո. «Ժառանգությունը» հայտ չներկայացրեց Երեւանի ավագանու ընտրական մրցապայքարի մեջ մտնելու՝
ժողովրդի ձայնը չմասնատելու նպատակով: Այդ մասին ասվում է կուսակցության առաջնորդ Րաֆֆի Հովհաննիսյանի հայտարարության մեջ:
«Նախընտրական շրջանում բռնություններով եւ քաղաքական բանտարկություններով, իսկ ընտրությունների օրը՝ համատարած կաշառքներով եւ այլ զանգվածային ընտրակեղծիքներով մթագնած խորհրդարանական ընտրությունները հերթական անգամ ի ցույց դրեցին գործող իշխանության՝ ՀՀԿ-ի մոտ ազատ, արդար եւ օրինական ընտրությունների կազմակերպման քաղաքական կամքի բացակայությունը:
Ամեն դեպքում՝ մեր ժողովրդի ձայնը չմասնատելու նպատակով հերթական անգամ Ժառանգությունը հայտ չներկայացրեց Երեւանի ավագանու ընտրական մրցապայքարի մեջ մտնելու՝ փոխարենը հաջողություն եւ օրինական մրցակցություն մաղթելով բոլոր թեկնածուներին եւ իր զորակցությունը՝ ընտրություններին մասնակցող ընդդիմությանը եւ Հայաստանի քաղաքացու ազատ եւ անկաշառ կամարտահայտությանը:
Հանուն մայրաքաղաքի եւ համայն հանրապետության, իրականում հարկավոր է, որ պարոն Մարգարյանը եւ իր կուսակցությունը իրենք դառնան պարկեշտ, օրինապաշտ ընդդիմություն ամբողջ երկրում եւ Երեւանից սկսյալ:
Իսկ մենք դեռ կխոսենք ընտրություններից հետո»,- ասված է հայտարարության մեջ:
Նշենք, որ Երևանի Ավագանու խորհրդի ընտրություններին մասնակցում է երեք քաղաքական ուժ՝ ՀՀԿ, «Երկիր Ծիրանի» և «Ելք» դաշինք: ՀՀԿ-ից քաղաքապետի թեկնածուն Տարոն Մարգարյանն է, «Երկիր Ծիրանի» -ից՝ Զարուհի Փոստանջյանը, իսկ «Ելք» դաշինքից՝ Նիկոլ Փաշինյանը: