Կարեն Կարապետյանը հերթական անգամ հիշեցրել է Ռուսաստանի և Հայաստանի հարաբերություններում առկա ներուժի մասին

Արմինֆո. «Ռուսաստանը Հայաստանի կարևորագույն գործընկերեն է և խոշորագույն ներդրողը., - հայտարարել է վարչապետ Կարեն Կարապետյանը Երևանում Ռազմավարական համաժողովի բացմանը, որին մասնակցում են ՀՀ կառավարության ռազմավարական նախաձեռնությունների կենտրոնի և ՌԴ ռազմավարական նախաձեռնությունների գործակալության, ՌԴ բիզնես նախաձեռնությունների աջակցության Առաջնորդների ակումբի ղեկավարներն ու ներկայացուցիչները: 
 

Ողջունելով համաժողովի մասնակիցներին՝ Կարեն Կարապետյանը նշել է, որ նման հարթակները, որտեղ հանդիպում են խելացի, ստեղծագործող, հայրենասեր և խոսքի լավ իմաստով անհանգիստ մարդիկ, օգտակար են գաղափարների ներկայացման, ռազմավարությունների, տեսլականների փոխանակման ու մեր երկրների տնտեսությունների համար նոր լուծումներ գտնելու համար: «Մաղթում եմ ձեզ բարենպաստ աշխատանք, ավելին, ցանկանում եմ վստահություն հայտնել, որ այսօրվա հանդիպումը մեծ ու երկարատև համագործակցության սկզիբն է: Ռազմավարական նախաձեռնությունների կենտրոնը լավ հարթակ է կառավարության և մասնավոր ներդրողների համագործակցության համար: Մենք մեր հայրենակիցներին, ովքեր բավականին հաջողակ գործարարներ ու գիտնականներ են, անցել են որոշակի ճանապարհ, ներգրավել ենք այդ հարթակ և ստեղծել խորհուրդ, որում 6 ներկայացուցիչ մասնավոր հատվածից է, 5-ը՝ կառավարությունից: Մենք այժմ թիմ ենք ձևավորում, և կարծում եմ, որ այն կլինի շատ ուժեղ ներուժ ունեցող ու հայրենասեր, որը կձևավորի մեր տեսլականն ու ռազմավարությունը»,- ասել է Կարեն Կարապետյանը: 
 

 «Մեր ռուս գործընկերների հետ հանդիպումներում մշտապես քննարկել և նշել ենք, որ չնայած այսօր մեր երկրների համագործակցության մակարդակը բավականին բարձր է, ունենք մեծ ներուժ՝ հետագա առաջընթացի համար: Ես, իհարկե, շահագրգռված եմ, որ այսօր մեր ռուս գործընկերները գտնեն նոր առիթներ, ծրագրեր՝ ներդրումներ կատարելու համար»,- նշել է ՀՀ կառավարության ղեկավարը: Կարեն Կարապետյանը ցանկություն է հայտնել, որ համաժողովի ավարտից հետո մասնակիցները հեռանան գաղափարով ու վստահությամբ, որ Հայաստանի կառավարությունը վստահելի գործընկեր է ներդրողների համար, որ Ռազմավարական նախաձեռնությունների կենտրոնը շատ լավ հարթակ է կապերի, ներդրումների ներգրավման համար: 

ՀՀ կառավարության ռազմավարական նախաձեռնությունների կենտրոնի գործադիր տնօրեն Ալեքսանդր Խաչատուրյանը ևս կարևորել է ՌԴ ռազմավարական նախաձեռնությունների գործակալության ու ՌԴ բիզնես նախաձեռնությունների աջակցության Առաջնորդների ակումբի հետ համագործակցությունը՝ կապերը խորացնելու, համատեղ նախաձեռնություններ և փորձի փոխանակում իրականացնելու գործում: Ներկայացնելով Ռազմավարական նախաձեռնությունների կենտրոնի գործունեության ուղղություններն ու ծրագրերը՝ Ալեքսանդր Խաչատուրյանը նշել է, որ դրանք միտված են պետական կառավարման ու ՊԵԿ համակարգերում, կրթության, բարձր տեխնոլոգիաների, զբոսաշրջության և գյուղատնտեսության ոլորտներում բարեփոխումների իրականացմանը: 
 

Համաժողովի ընթացքում անդրադարձ կկատարվի Հայաստանի՝ ներդրումների համար գրավիչ մի քանի ոլորտներին՝ էներգետիկա, գյուղատնտեսություն, դեղագործություն, տեղեկատվական տեխնոլոգիաներ, ինչպես նաև կներկայացվեն Հայաստանում գործարարությամբ զբաղվելու հնարավորություններն ու առավելությունները: 

Հիշեցնենք, որ  մարտի 15-ին, ՀՀ նախագահ Սերժ Սարգսյանի հետ հանդիպման ամփոփիչ մամուլի ասուլիսում ՌԴ նախագահ Վլադիմիր Պուտինը հայտարարել էր, որ Ռուսատսանը Հայաստանի խոշորագույն առևտրական գործընկերն է, անցյալ տարվա արդյունքներով երկկողմ ապրանքաշրջանառությունն աճել է 6%-ով: «Այս արդյունքը համարում ենք լուրջ հաջողություն, որը ձեռք է բերվել անկայուն գլոբալ կոնյունկտուրայի պայմաններում», - նշել էր ՌԴ նախագահը: Ռուսաստանի ղեկավարը նաև հաղորդել էր, որ Հայաստանի տնտեսությունում ռուսական ներդրումները կազմել են ավելի քան 3 մլրդ դոլար,  հանրապետությունում գործում է ռուսական կապիտալով ավելի քան 2 հազար ընկերություն: 

Իսկ ռուսական մաքսատան տվյալներով, 2016 թվականին Ռուսաստանի և Հայաստանի մինջև ապրանքաշրջանառությունը կազմել է 1 335 540 701 դոլար, 2015 թվականի համեմատ ավելանալով 6,19%-ով (77 886 481 դոլար): Ռուսաստանից Հայաստան արտահանումը 2016 թվականին կազմել է 957 253 242 դոլար, 2015 թվականի համեմատ նվազելով 8,82%-ով (92 561 722 դոլար): Հայաստանից Ռուսաստան ներմուծումը 2016 թվականին կազմել է 378 287 459 դոլար, 2015 թվականի համեմատ ավելանալով 82,01%-ով (170 448 203 դոլար): Հայաստանի հետ Ռուսաստանի առևտրային հաշվեկշռի սալդոն 2016 թվականին եղել է դրական` 578 965 783 դոլար: 2015 թվականի համեմատ դրական սալդոն նվազել է 31,24%-ով (263 009 925 դոլար): Հայաստանի բաժինը Ռուսաստանի արտաքին առևտրի շրջանառությունում 2016 թվականին կազմել է 0,2855%` 2015 թվականի 0,2390%-ի դիմաց:  2016 թվականին Ռուսաստանի ապրանքաշրջանառությունում բաժնի չափով Հայաստանն զբաղեցրել է 51-րդ տեղը (2015 թվականին` 54-րդ տեղը): Ռուսաստանի արտահանման ծավալում Հայաստանի բաժինը 2016 թվականին կազմել է 0,3353%`  2015 թվականի 0,3055%-ի դիմաց: 2016 թվականին Ռուսաստանի արտահանման ծավալում Հայաստանի բաժինը կազմել է  0,2076%` 2015 թվականի 0,1138%-ի դիմաց: Ռուսաստանի ներմուծման ծավալում ունեցած բաժնի չափով Հայաստանը 2016 թվականին զբաղեցրել է 55-րդ տեղը (2015 թվականին` 64-րդ տեղ):