Արմինֆո. Աշնանը Հայաստանի խոշորագույն բանկերից մեկի`Արդշինբանկի կողմից մյուս խոշոր բանկի`«Առէկսիմբանկ-Գազպրոմբանկի խմբի» գնումը նշանակալից գործարք էր Հայաստանի բանկային հատվածի, ինչպես նաև տնտեսության համար, ընդհանրապես: ԱրմԻնֆո գործակալության թղթակցի հետ զրույցում այս մասին հայտարարել է Արդշինբանկի ֆինանսական տնօրեն, ՀՀ ֆինանսների նախկին նախարար Դավիթ Սարգսյանը:
Այդ գործարքի նշանակալիությունը, փորձագետի կարծիքով, կայանում է նրանում, որ զուտ հայկական բանկը ձեռք բերեց միջազգային խոշոր ինստիտուցիոնալ դերակատարի` ռուսաստանյան Գազպրոմբանկի դուստր կառույցը: Հիմնավորելով իր տեսակետը, Սարգսյանն օրինակ է բերել միջազգային փորձը. «Եթե դիտեք, օրինակ, Լիբանանի պատմությունը, մերձարևելյան երկրի, որը, փաստորեն, հանդիսանում է տարածաշրջանի ֆինանսական կենտրոնը, ապա կտեսնեք, որ տեղական երկու խոշոր բանկերը` Աուդի Բանկը և Բիբլոս Բանկը բարձրացան միջազգային մակարդակ և դարձան միջազգային կառույցներ, շնորհիվ այն բանի, որ ժամանակին իրենք էլ ձեռք էին բերել ABN AMRO, Citibank և այլ համաշխարհային գիգանտների ազգային դուստր բանկերը, որոնք տարբեր, այդ թվում նաև ոչ բավարար արդյունավետության պատճառով, լքեցին լիբանանյան շուկան: Լիբանանյան բանկերը հենց դրա վրա էլ սկսեին կառուցել իրենց համբավը»: Մյուս կողմից, փորձագետը նշել է, որ «Առէկսիմբանկ-Գազպրոմբանկի խմբի» ձեռքբերումով Արդշինբանկը զգալիորեն ընդլայնեց իր ներկայությունը երկրի մարզերում, դիֆերսիֆիկացնելով պորտֆելը և ընդլայնելով հաճախորդների բազան: «Ինչպես գիտեք, Առէկսիմբանկը հաջողությամբ էր գործում բանկային քարտերի շուկայում, հանդիսանալով բանկային համակարգի առաջատարն այդ հատվածում: Visa համակարգի առաջին տեղական քարտերը թողարկվել են հենց Առէկսիմբանկի կողմից: Արդյունքում, կրկնապատկվեց մեր բանկոմատների թիվը և եռապատկվեց POS-տերմինալների թիվը: Բարձրացավ մեր քարտային պրոդուկտների հուսալիլությունը, քանի որ այժմ մենք աշխատում ենք երկու պրոցեսինգային կենտրոններով`տեղական ազգային ԱրՔա և ռուսաստանյան Գազքարտսերվիս, ինչն էլ, իր հերթին, զրոյի է հավասարեցնում Արդշինբանկի քարտերի սպասարկման հետ կապված խափանումների ռիսկերը»:
Համաձայնվելով այն կարծիքին, որ ռուսաստանյան դստեր ձեռքբերման ընթացքում Արդշինբանկի բաժնետերերը, պատկերավոր ասած, հիմնվում էին ոչ թե հաշվեկշռի, այլ հաճախորդների բազայի ու դրա ենթակառուցվածքի վրա, Սարգսյանն ընդգծել է, որ Առէկսիմբանկն ուներ նաև մանրածախ և հիփոթեքային լավ պորտֆելներ: «Մենք չենք կասկածում, որ Առէկսիմբանկի նախկին հաճախորդները գոհ կլինեն մեր սպասարկումից և կմնան մեզ հետ: Արդեն անցել է մի քանի ամիս, բայց Առէկսիմբանկի նախկին ոչ մի հաճախորդ դեռ չի ցանկացել հրաժարվել մեզնից: Մենք հասկանում ենք այդ պատասխանատվությունը և հետագայում նույնպես կաշխատենք բանկի հաճախորդային կողմնորոշման բարձրացման, ինչպես նաև հաճախորդների լոյալության վրա: Այսօր մեր ներկայության որոշ վայրերում իրականացնում ենք այդ ներկայության օպտիմալացմանը և արդյունավետության բարձրացմանն ուղղված միջոցառումներ: Դա չի նշանակում, որ մենք կփակենք Առէկսիմբանկի որոշ մասնաճյուղեր` այն վայրերում, որտեղ ներկայացված է Արդշինբանկը: Արդյունավետության գնահատման և բարձրացման միջոցառումների մոտեցումը կլինեն միասնական: Ներկայումս սպասում ենք համատեղ հաշվեկշռի աուդիտորական հաշվետվությանը և ձեռնամուխ կլինենք հաջորդ քայլերին, որոնց մասին առայժմ ձեռնպահ կմնամ խոսել»,-ասել է Արդշինբանկի ֆինանսական տնօրենը:
Դ.Սարգսյանը փակագծերը չի բացում`արդեն միավորված բանկի նոր ռազմավարական ծրագրի առումով: «Ոչ, առայժմ չեմ բացի: Միայն կասեմ, որ մեր բանկը մնում է խոշոր բիզնեսի վարկավորման խոշոր բանկերից մեկը Հայաստանում: Մենք առայժմ առաջին տեղն ենք պահպանում, և հուսով եմ որ կպահպանենք, մանրածախ վարկավորման, հիփոթեքի սեգմենտներում, քարտային շուկայում, ընդ որում, ինչպես քանակով ու ծավալներով, այնպես էլ ենթակառուցվածքներով: Առէկսիմբանկի ձեռքբերումով մենք զգալիորեն ուժեղացրինք մեր մանրածախի ուղղությունը: Սակայն, միևնույն ժամանակ, մենք սահմանեցինք նաև ՓՄՁ նկատմամբ փոխադարձ լոյալության բարձացման միջոցառումները, այդ ոլորտին առաջարկելով շուկայի լավագույն լուծումներն ու պրոդուկտները, փոքր և միջին բիզնեսի համար ստեղծելով անհրաժեշտ հարմարավետ պայմաններ`ներկայիս դժվարին իրավիճակում: Դա կվերաբերվի ոչ միայն տոկոսադրույքերին, ինչը ոչ պակաս կարևոր է, այլ նաև վարկերի տրամադրման ժամկետայնությանը`պարտքի բեռի նվազեցման առումով: Դրա հետ մեկտեղ մենք ունենք բավականին ոչ թանկ և երկարաժամկետ ռեսուրսներ»,-ընդգծել է նա: