Կիրո Մանոյան. Լապշինի արտահանձնումը Բելառուսի հակահայկական քաղաքականության հերթական դրսևորում է

Արմինֆո. Ռուս-իսրայելական բլոգեր Ալեքսանդր Լապշինի արտահանձնումը Բելառուսի հակահայկական քաղաքականության հերթական դրսևորում է, ինչպես պարբերաբար լինում է ՀԱՊԿ և ԱՊՀ միջոցառումներում: Փետրվարի 8-ին մամուլի ասուլիսում այդ մասին հայտարարել է ՀՅԴ Հայ դատի Երևանի գրասենյակի ղեկավար Կիրո Մանոյանը:

Նա նշել է, որ Մինսկից այլ բան չէր էլ ակնկալում, քանի որ այդ երկիրն Ադրբեջանի հետ միասին առիթը բաց չի թողնում իրագործելու հակահայկական նախաձեռնություններ: «Հուսով եմ` Լապշինի պաշտպանները կդիմեն Մարդու իրավունքների եվրոպական դատարան, քանի որ այդ միջադեպը կարող է դառնալ նախադեպ և խոչընդոտել օտարերկրյա լրագրողնների աշխատանքին», - ընդգծել է քաղաքական գործիչը: Մանոյանը նաև կարծում է, որ Հայաստանը, որպես պետություն, առանձնապես ոչինչ չի կարող ձեռնարկել, քանի որ բլոգերը ՀՀ քաղաքացի չէ: «Անհրաժեշտ է աշխատանք տանել Ռուսաստանի և Իսրայելի հասարակական իրավապաշտպան կազմակերպությունների հետ, քանի որ նա այդ երկրների քաղաքացի է, ինչպես նաև շարունակել բողոքի ցույցերն այն երկրներում, որտեղ կա հայկական ներկայություն», - ընդգծել է նա: Դաշնակցականը հավելել է, որ միջազգային հանրությունը նույնպես պետք է իր ավանդը ներդնի աշխարհում խոսքի ազատության պաշտպանության հարցերում:

Հիշեցնենք, որ հայ-բելառուսական միջխորհրդարանական համագործակցության հանձնաժողովը հանդես է եկել հայտարարությամբ, որում նշել է, թե ռուսաստանցի բլոգեր Ալեքսանդր Լապշինին Ադրբեջան արտահանձնելու Մինսկի որոշումը կեղտոտ և հանցավոր գործարքի արդյունք է: Ինչպես  հայտարարել է հանձնաժողովի համանախագահ, ԱԺ փոխխոսնակ Էդուարդ Շարմազանովը, այդ քայլն ուղղված է ոչ միայն Հայաստանի և Արցախի, այլև Ռուսաստանի դեմ, որի քաղաքացի է Լապշինը, նաև` ընդդեմ ժողովրդավարության նորմերի: «Ժողովրդավարական երկրում այսպիսի որոշում չէր կարող կայացվել», - ընդգծել է ԱԺ փոխխոսնակը:

ԼՂՀ ԱԳՆ նույնպես արձագանքել է Մինսկի կողմից ռուս-իսրայելական բլոգեր Ալեքսանդր Լապշինի հանձնմանն Ադրբեջանին: «Բելառուսի Գերագույն դատարանի դատավճիռը, որն ուժի մեջ է թողնում հայտնի բլոգեր Ալեքսանդր Լապշինին քրեական հետապնդման նպատակով Ադրբեջանին հանձնելու որոշումը, ոչ միայն հանդիսանում է Ադրբեջանի կողմից իրականացվող օտարերկրյա քաղաքացիներին ահաբեկելու քաղաքականության ակնհայտ աջակցության դրսևորում, այլև ազատ տեղաշարժի և խոսքի ազատության հիմնարար իրավունքների կոպիտ ոտնահարում։ Մտադիր լինելով, ի պատասխան Բաքվի հայցի, Ադրբեջանին հանձնել Ալեքսանդր Լապշինին՝ շինծու և քաղաքականացված գործի հիման վրա, բելառուսական իշխանությունները ցուցադրում են, որ քաղաքական շահերը վեր են դասում ժողովրդավարական նորմերից, ինչպես նաև օրինականության և արդարության սկզբունքներից», - ասվում է  ԼՂՀ ԱԳՆ հայտարարությունում։

Փետրվարի 7-ին Բելառուսի գերագույն դատարանը հիմնավոր է ճանաչել Մինսկի քաղաքային դատարանի՝ հունվարի 26-ի վճիռը, որով օրինական էր համարվել բլոգեր Ալեքսանդր Լապշինին Ադրբեջանին հանձնելու վերաբերյալ Բելառուսի գլխավոր դատախազության որոշումը: Նույն օրը երեկոյան բլոգերին տեղափոխել են Բաքու:

Ալեքսանդր Լապշինը ձերբակալվել էր դեկտեմբերի կեսին Մինսկում` Ադրբեջանի հարցմամբ, որտեղ նա ներառված է «սև ցուցակում»` ԼՂՀ այցելելու համար, ուստի նրա մուտքն Ադրբեջան արգելված է: Այդուհանդերձ, 2015 թվականի հունիսին Լապշինին հաջողվել էր մուտք գործել Ադրբեջան Վրաստանով` ուկրաինական անձնագրով, որտեղ «Ալեքսանդր» անունը գրված էր «Օլեքսանդր»: Դրանից հետո Ադրբեջանը բլոգերի նկատմամբ միջազգային հետախուզում էր հայտարարել` «պետական սահմանի մասին» օրենքը և երկրի միգրացիոն օրենսգիրքը խախտելու համար:  Հունվարի 17-ին Բելառուսի դատախազությունը բավարարել էր Ալեքսանդր Լապշինի արտահանձնման վերաբերյալ Ադրբեջանի հարցումը: Հունվարի 26-ին Մինսկի քաղաքային դատարանը մերժել էր փաստաբանների բողոքարկումը: