Լապշինի արտահանձնումը բուռն արձագանք է հարուցել ԱԺ-ում. հնչել են Բելառուսից ՀՀ դեսպանին հետ կանչելու, ՀԱՊԿ-ից և ԵԱՏՄ-ից դուրս գալու վերաբերյալ առաջարկություններ

Արմինֆո. Ռուսաստանցի բլոգեր Ալեքսանդր Լապշինին Ադրբեջան արտահանձնելու Մինսկի որոշումը կեղտոտ և հանցավոր գործարքի արդյունք է: Այդ մասին ասվում է հայ-բելառուսական միջխորհրդարանական համագործակցության հանձնաժողովի հայտարարությունում, որն այսօր ԱԺ ամբիոնից հնչեցրել է հանձնաժողովի համանախագահ, ԱԺ փոխխոսնակ Էդուարդ Շարմազանովը:

Ինչպես հայտարարել է Շարմազանովը, այս քայլն ուղղված է ոչ միայն Հայաստանի և Արցախի, այլև Ռուսաստանի դեմ, որի քաղաքացի է Լապշինը, նաև` ընդդեմ ժողովրդավարության նորմերի: «Ժողովրդավարական երկրում այսպիսի որոշում չէր կարող կայացվել», - ամփոփել է ԱԺ փոխխոսնակը:

Ընդդիմադիր պատգամավոր Նիկոլ Փաշինյանն, իր հերթին, հայտարարել է, որ Մինսկի որոշումը հավասարազոր է մարդասպան Ռամիլ Սաֆարովի Ադրբեջան արտահանձնման մասին Հունգարիայի որոշմանը: Նա կոչ է արել այսօր իսկ Բելառուսից հետ կանչել Հայաստանի դեսպանին և ձեռնարկել ամենակոշտ դիվանագիտական միջոցներ: Փաշինյանը նաև հաղորդել է, որ այսօր Հայաստանում Բելառուսի դեսպանատան մոտ տեղի կունենա հանրահավաք` ընդդեմ Լապշինի արտահանձնման վերաբերյալ Մինսկի որոշման:

ՀՀԿ պատգամավոր Սամվել Ֆարմանյանն, իր հերթին, հայտարարել է, թե նման որոշումները ստվեր են նետում ՀԱՊԿ և ԵԱՏՄ հեղինակության վրա հայ հասարակայնության աչքին: Նրա կարծիքով,  ստեղծված իրավիճակում Ռուսաստանը պետք է ասի իր ծանրակշիռ խոսքը:

ԲՀԿ խմբակցության ղեկավար Նաիրա Զոհրաբյանն էլ կոչ է արել դադարեցնել Հայաստանի ՀԱՊԿ անդամությունը: Հակադարձելով նրան` նախկին վարչապետ Հրանտ Բագրատյանը հայտարարել է, որ Հայաստանը չպետք է դադարեցնի իր անդամությունը ՀԱՊԿ-ում կամ ԵԱՏՄ-ում, այլ պետք է պահանջի այդ կառույցներից հանել Բելառուսին, ինչպե սնաև հետ կանչի ԵՏՀ ղեկավար Տիգրան Սարգսյանին:

ՀՅԴ խմբակցության քարտուղար Աղվան Վարդանյանը կոչ է արել Լապշինի արտահանձնման վերաբերյալ ընդունլ ՀՀ ԱԺ հայտարարություն, իսկ պատգամավոր Թևան Պողոսյանը նախաձեռնել է արտաքին հարցերի հանձնաժողովի նիստի գումարում` պաշտպանական, արտաքին քաղաքական և այլ իրավասու գերատեսչությունների ղեկավարների մասնակցությամբ` ոչ միայն այդ իրավիճակը, այլև այլ խնդրահարույց հարցեր քննարկելու համար, այդ թվում` Լեռնային Ղարաբաղից ապրանքների ներմուծումն արգելելու Ուկրաինայի որոշումը:

Փետրվարի 7-ին Բելառուսի գերագույն դատարանը հիմնավոր է ճանաչել Մինսկի քաղաքային դատարանի՝ հունվարի 26-ի վճիռը, որով օրինական էր համարվել բլոգեր Ալեքսանդր Լապշինին Ադրբեջանին հանձնելու վերաբերյալ Բելառուսի գլխավոր դատախազության որոշումը: Նույն օրը երեկոյան բլոգերին տեղափոխել են Բաքու:

Ալեքսանդր Լապշինը ձերբակալվել էր դեկտեմբերի կեսին Մինսկում` Ադրբեջանի հարցմամբ, որտեղ նա ներառված է «սև ցուցակում»` ԼՂՀ այցելելու համար, ուստի նրա մուտքն Ադրբեջան արգելված է: Այդուհանդերձ, 2015 թվականի հունիսին Լապշինին հաջողվել էր մուտք գործել Ադրբեջան Վրաստանով` ուկրաինական անձնագրով, որտեղ «Ալեքսանդր» անունը գրված էր «Օլեքսանդր»: Դրանից հետո Ադրբեջանը բլոգերի նկատմամբ միջազգային հետախուզում էր հայտարարել` «պետական սահմանի մասին» օրենքը և երկրի միգրացիոն օրենսգիրքը խախտելու համար:  Հունվարի 17-ին Բելառուսի դատախազությունը բավարարել էր Ալեքսանդր Լապշինի արտահանձնման վերաբերյալ Ադրբեջանի հարցումը: Հունվարի 26-ին Մինսկի քաղաքային դատարանը մերժել էր փաստաբանների բողոքարկումը:

Ավելի վաղ ՌԴ ԱԳՆ ղեկավար Սերգեյ Լավրովը հայտարարել էր, որ Մոսկվան դեմ է Լապշինին Ադրբեջանի իշխանություններին հանձնմանը. «Մենք դեմ ենք այս կամ այն երկրում ձերբակալված ՌԴ քաղաքացիներին երրորդ երկիր արտահանձնմանը»: Մինչդեռ Բելառուսի նախագահ Ալեքսանդր Լուկաշենկոն փետրվարի 3-ին մամուլի ասուլիսի ժամանակ հայտարարել էր, որ Բելառուսը բլոգերին Ադրբեջանին չհանձնելու հիմք չունի, քանի որ Ադրբեջանն այդ հարցով դիմել էր Ինտերպոլ, և Բելառուսում Լապշինին ձերբակալել են՝ Ինտերպալի որոշման համաձայն: