Ռիչարդ Միլզ. Ղարաբաղում տեղի ունեցած քառօրյա պատերազմն ակնհայտ դարձրեց կոռուպցիայի քայքայիչ ազդեցությունը Հայաստանի ազգային անվտանգության հարցերում

Արմինֆո.Ղարաբաղում տեղի ունեցած քառօրյա պատերազմն ակնհայտ դարձրեց կոռուպցիայի կործանարար ազդեցությունը Հայաստանի ազգային անվտանգության ապահովման հարցերում: Այս մասին փետրվարի 1-ին հայտարարել է Հայաստանում ԱՄՆ դեսպան Ռիչարդ Միլզը Հայաստանում Ամերիկյան առևտրի պալատում կայացրած իր ելույթում:

Դեսպանը հիշեցրել է, որ 15 ամիս առաջ ՀԱԱՊ-ում ինքը նշեց կոռուպցիայի ու ազգային անվտանգության շփման եզրերի մասին: «Այն ժամանակ շատերը դա զարմանքով ընդունեցին, շատերն ուշադրություն չդարձրեցին: Չեմ ուզում ասել, որ այդ մասին առաջինը ես խոսեցի, սակայն այժմ քաղաքական բանավեճերում այդ հարցին ավելի անկեղծ անդրադարձ է կատարվում, հնչում են կառավարության կողմից լուրջ քայլեր ձեռնարկելու առաջարկներ: Քառօրյա պատերազմի օրերին և հաջորդիվ հանրային բանավեճերում ուրվագծվեց այն քայքայիչ ազդեցությունը, որ կոռուպցիան կարող է ունենալ ազգային անվտանգության հարցերում և հանրության ուշադրությունը բևեռվեց այդ խնդրին»,-հայտարարել է դեսպանը:

Նա նշել է, որ այս 15 ամիսների ընթացքում և, առավելապես, ապրիլյան ողբերգական բախումներից հետո իրեն պարզ դարձավ, թե Լեռնային Ղարաբաղի խաղաղ կարգավորման բացակայության պատճառով ինչքան շատ ռեսուրսներ, թանկարժեք ռեսուրսներ, որոնք ապահովվում են թե՛ հայերի, և թե՛ Հայաստանի միջազգային ու սփյուռքի բարեկամների կողմից, չեն ուղղվում մեր ընդհանուր նպատակներին, և այն գերակա ուղղություններին, որն ինքը և դեսպանատունը սահմանել են: «Օրինակ՝ Լեռնային Ղարաբաղի կարգավորման բացակայությունը սնուցում է կոռուպցիան, քանի որ դրա պատճառով փակ են մնում Հայաստանի սահմանները, իսկ երբ սահմանները փակ են, ազդեցիկ գործարարների և մյուսների համար հեշտ է վերահսկել տնտեսական շուկաներն ու թույլ չտալ մրցակցություն»,-ասել է Միլզը:

Դեսպանը հիշեցրել է, որ իր կողմից առաջին ելույթում հռչակված 4 գերակա ուղղությունների մասին: «Ուզում եմ երկու հարցադրման պատասխանել. ի՞նչ է արված այդ ուղղություններով մեկ տարի անց և ի՞նչ հավելյալ քայլեր կարելի է ձեռնարկել: Դեսպանատան գերակա ուղղությունները բոլորն էլ միտված են երկարաժամկետ հեռանկարին ու մեկ տարում փոխակերպող փոփոխություններ չէին ակնկալվում, ուստի մենք փորձում ենք գտնել փոփոխության այն նշույլները, որոնք թույլ կտան գնահատել մեր ընթացքը և վերհանել առաջընթացը: Իմ առաջին գերակայությունն էր բիզնես և առևտրային կապերի խորացումը մեր երկու երկրների միջև՝ Հայաստանի տնտեսական աճի հեռանկարների խթանման համատեքստում: Սա փաստացի այն ոլորտն է, որտեղ մենք ամենամեծ առաջընթացն ենք տեսել և լիահույս ենք, որ մեր ցանած բազմաթիվ սերմերը ոչ հեռու ապագայում արդեն իսկ պտուղներ կտան»,-նշել է դեսպանը:

Նա նշել է, որ Հայաստանը, իր նոր կառավարության պատրաստակամությամբ ոգեշնչված, պայքարում է կոռուպցիայի դեմ, իսկ ԱՄՆ դեսպանությունն այդ ուղղությամբ հանդես է գալիս հստակ առաջարկներով: Առաջին հերթին, ըստ դեսպանի, անհրաժեշտ է ամրապնդել և բարձրացնել բարձրաստիճան պաշտոնյաների էթիկայի հանձնաժողովի դերը, որպես անկախ մարմնի: Բարձր գնահատելով Վարչական իրավախախտումների և Քրեական օրենսգրքերի փոփոխությունները, որոնք քրեական պատիժներ, ինչպես նաև սահմանափոկումներ են նախատեսում պետական պաշտոնյաների կողմից պաշտոնն ստանձնելիս եկամուտների մասին հռչակագրում սուտ տվյալներ ներկայացնելու համար, դեսպանը նշել է, որ դեռ շատ անելիքներ կան: «Պաշտոնյայի նկատմամբ հետաքննություն նախաձեռնելու համար պարտադիր չէ կաշառք ստանալիս նրա ձեռքը բռնելը: Բավական է ստուգել նրա փաստացի ակտիվները, որոնք տասնապատիկ անգամ գերազանցում են նրա աշխատավարձը, ինչը կարող է հիմնավոր կասկածներ առաջացնել դատախազի մոտ»,-նշել է դեսպանը:

Ամերիկացի դինավագետի ևս մեկ առաջարկը վերաբերվում է լիակատար անկախ հակակոռուպցիոն մարմնի ստեղծմանը, որը կունենա հետաքննություն և քրեական հետապնդումներ կատարելու լիազորություններ: ԱՄՆ դեսպանը գտնում է, որ այժմ դրա համար բարենպաստ պայմաններ են ստեղծված, քանի որ ՀՀ կառավարոթյունը դիտարկում է Հակակոռուպցիոն խորհրդի վերակազմավորման և լիազորությունների ճշգրտման տարբերակները: