Արմինֆո. Երեկ Լոս Անջելեսում տեղի է ունեցել «Արդարություն Հայաստանում» նախաձեռնության համաժողովը` Սփյուռքահայ հայտնի գործիչների մասնակցությամբ:
Ինչպես համաժողովում հայտարարել է կանադահայ ռեժիսոր Ատոմ Էգոյանը, Սփյուռքի համար ապրիլյան խորհրդարանական ընտրությունների արդյունքները կանխատեսելի են, սակայն` անընդունելի։ «Մենք պետք է չհամակերպվենք արդյունքների հետ: Մենք պետք է դժգոհենք այն փաստից, որ քաղաքական պատճառներով բանտերում գտնվող մարդիկ կան, մենք պետք է դժգոհ լինենք, որ ճնշումների պատճառով չկա օրինական այլընտրանք»,- հայտարարել է Էգոյանը, ընդգծելով, որ եկել է հայաստանյան կյանքին նոր որակ հաղորդելու, ավելի խորը մասնակցություն ցուցաբերելու ժամանակը: «Փոքր առաջընթացն այն ամենն է, ինչ մենք ակնկալում ենք այս գարնանը։ Եկեք գնանք այնտեղ, եկեք նստենք փողոցներում, եթե դրա կարիքը լինի: Եկեք ասենք, որ մենք սրա մի մասն ենք»,- հայտարարել է Էգոյանը:
"System of a down" ռոք-խմբի մենակատար Սերժ Թանկյանն, իր հերթին, հայտարարել է, որ սփյուռքահայ արվեստագետները որևէ կուսակցության կողքին չեն կանգնելու, այլ պաշտպանելու են քաղաքացիների ընտրությունը։ Նա նաև ընդգծել է, որ չի կարելի թույլ տալ արյունահղութուն Հայաստանում: Թանկյանը նաև հայտարարել է Հայաստանից արտգագաղթը կանխելու անհրաժեշտության մասին, հատկապես` երիտասարդրության շրջանում: «Իրական հարցն այն է, թե ինչպես անենք, որ նրանք չլքեն երկիրը: Այս տեսանկյունից եմ նայում խնդրին։ Ինչպես աջակցենք նրանց, որ հարմար զգան իրենց երկրում, հնարավորություն ունենան լինելու արժանապատիվ քաղաքացի», - նշել է նա
Դերասանուհի Արսինե Խանջյանն, իր հերթին, հայտարարել է, թե կարևոր է նաև այն, որ արտերկրում բնակվող Հայաստանի քաղաքացիները գան ու քվեարկեն։ «Դեռ մի փոքր հույս կա, որ ինչ-որ բան կարող է փոխվել, բայց այդ փոփոխությունը կարող է լինել միայն մեր ներգրավմամբ։ Մենք սփյուռքում պետք է դադարենք մտածել, որ ստատուս քվոն պահպանելու միակ ուղին աջակցությունն է պետությանը, որի կառույցների մեծ մասը վերցված են օլիգարխիայի կողմից և չեն աշխատում մարդկանց կարիքների համար», - հայտարարել է նա:
Սփյուռքահայ հայտնի մտավորականների կողմից ձևավորված «Արդարություն Հայաստանում» նախաձեռնությունն առաջիկա խորհրդարանական ընտրություններին դիտորդական առաքելությամբ հանդես գալու մասին հայտարարել էր անցած տարեվերջին: Սակայն համաժողովի ընթացքում ընդգծվել է, որ նախաձեռնությունը չպետք է բավարարվի միայն դիտորդական առաքելությամբ, այլ պետք է ակտիվ մասնակցություն ունենա հետընտրական գործընթացներին, հաղորդում է «Ազատություն» ռադիոկայանը: