Արդշինբանկի «Ալավերդի» և «Ստեփանավան» մասնաճյուղերն արդեն գործում են վերանորոգված ժամանակակից գրասենյակներում

Արմինֆո. Հունվարի 24-ին Ալավերդի և Ստեփանավան քաղաքներում տեղի ունեցավ Արդշինբանկի տարածքային մասնաճյուղերի վերանորոգված գրասենյակների հանդիսավոր բացումը, որին ներկա էին Լոռու մարզպետ Արթուր Նալբանդյանը և այլ պաշտոնատար անձիք: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, Լոռու Մարզպետ Արթուր Նալբանդյանը բոլորին շնորհավորեց նշանակալից իրադարձության կապակցությամբ և շնորհակալություն հայտնեց Արդշինբանկին` ի շահ մարզի բնակիչների կատարած աշխատանքի համար։

«Ներկայումս բանկային սեկտորում առկա են ազատ միջոցներ, որոնք բանկերն ուղղում են երկրի տնտեսության և, մասնավորապես, մեր տարածաշրջանի զարգացմանը։ Համոզված եմ՝ Արդշինբանկի կողմից ստեղծված նոր և հարմարավետ պայմանները, անշուշտ, կնպաստեն սպասարկման մակարդակի և որակի բարձրացմանը։ Մենք միայն ողջունում ենք նման նախաձեռնությունները», նշեց մարզպետը։

Արդշինբանկի Ռազմավարական զարգացման տնօրեն Արմեն Գասպարյանը նշեց, որ Արդշինբանկը մեծ ուշադրություն է դարձնում իր, բանկային համակարգում խոշորագույնը հանդիսացող, մասնաճյուղային ցանցի զարգացմանը մարզերում և շահագրգռված է նրանում, որպեսզի այդ մասնաճյուղերը լինեն նույնպես հարմարավետ, ինչպես մայրաքաղաքի մասնաճյուղերը։ «Ժամանակակից պահանջներին համապատասխան մասնաճյուղերի վերազինմանն ուղղված մեր քաղաքականությունը, առաջին հերթին, թելադրված է հաճախորդների շահերով, որոնց համար մենք փորձում ենք ստեղծել ավելի հարմարավետ և ժամանակակից սպասարկման պայմաններ՝ կիրառելով նոր բանկային տեխնոլոգիաներ և ստանդարտներ», - ընդգծեց Ա.Գասպարյանը։

Եզրափակելով  հանդիպումը, Արդշինբանկի Ֆինանսական տնօրեն Դավիթ Սարգսյանը շնորհակալություն հայտնեց Լոռու մարզի ղեկավարությանը և անձամբ մարզպետին` Արդշինբանկին ցուցաբերած մեծ վստահության համար և հավաստիացրեց, որ բանկն ուշադրության կենտրոնում է պահելու տարածաշրջանային զարգացմանը։

«2017 թվականին Արդշինբանկի ակտիվները գերազանցել են մեկ միլիարդ ԱՄՆ դոլարը՝ այդպիսով դառնալով Հայաստանի խոշորագույն բանկը, այդ թվում՝ իր մասնաճյուղային ցանցով։ Քաջ գիտակցելով պատասխանատվության դերը հաճախորդների և երկրի նկատմամբ՝ մեր բոլոր ջանքերը կուղղենք կյանքի որակի բարելավմանը ոչ միայն մեծ քաղաքներում, այլև հանրապետության ամբողջ տարածքով, որտեղ գործում են մեր սպասարկման կետերը», - ամփոփեց Դ. Սարգսյանը։

Ըստ Արմինֆո գործակալության` Հայաստանի Բանկերի Էքսպրես Ռենկինգի, իր հաշվեկշռային հիմնական ցուցանիշներով Արդշինբանկը գտնվում է Հայաստանի առաջատար բանկերի եռյակում: Բանկի ընդհանուր կապիտալը 2017 թվականի հունվարի 1-ի դրությամբ կազմել է 54 մլրդ դրամ (տարեկան աճը`11,6%), ակտիվները` 504.7 մլրդ դրամ (տարեկան աճը` 26%), վարկային ներդրումները`337.7 մլրդ դրամ (տարեկան աճը` 23%): Բանկի զուտ շահույթը 2016-ին կազմել է 4.6 մլրդ դրամ, տարեկան աճը`2.3 անգամ: «Արդշինբանկ» ՓԲԸ (մինչև 2014 թ. նոյեմբերը - Արդշինինվեստբանկ) հիմնադրվել է 2003 թվականին, ունի 56 մասնաճյուղ և ներկայացուցչություն Փարիզում: Բանկի բաժնետերերն են`«Բիզնես ներդրումների կենտրոն» - 97,52%, Արամ Անդրեասյան - 1.57%, Կարեն Սաֆարյան (ՌԴ) - 0.37%, Ռուդիկ Մկրտումյան և Խաչիկ Զաքարյան - 0.27%, «Մմիջազգային Բիզնես կենտրոն» ՀՁ ՓԲԸ - 0.0005%: