Ալեքսանդր Լապշինը ներողություն է խնդրել Իլհամ Ալիևից

Արմինֆո.Ռուս-իսրայելական բլոգեր Ալեքսանդր Լապշինը, ով ավելի վաղ Մինսկում ձերբակալվել էր Բաքվի պահանջով, գրավոր ներողություն է խնդրել Ադրբեջանի նախագահ Իլհամ Ալիևից: Այդ մասին հաղորդել է Լապշինի պաշտպանության աշխատանքային խմբի ղեկավար Արա Ղազարյանը:

«Նա իրոք դիմել է Ալիևին, նրանից ներողություն է խնդրել, սակայն` միայն այն բանի համար, որ նրան անձնական վիրավորանք է հասցրել: Հայաստանն ու Լեռնային Ղարաբաղը նամակում չեն հիշատակվում», - ասել է Ղազարյանը, հաղորդում է «ՌԻԱ Նովոստին»:

Մինչդեռ Բելառուսում Իսրայելի հյուպատոս Յուլիա Ռաչինսկի-Սպիվակովան հաղորդել է, որ Լապշինն իր ներկայությամբ ստորագրել է «Ադրբեջանի նախագահին ուղղված նամակը, որում ներողություն է խնդրում իր գործողությունների համար»: Ընդ որում, հյուպատոսը նշել է, որ Իսրայելի դիվանագիտական ներկայացուցչությունը բոլոր գործողություները համակարգում է Ռուսաստանի դեսպանության հետ, քանի որ Լապշինը նաև Ռուսաստանի քաղաքացի է: Հյուպատոսի ասելով, Իսրայելի պաշտոնական դիրքորոշումը հետևյալն է. «Մենք դեմ ենք բլոգերի արտահանձնմանը, մենք կարծում ենք, որ նա պետք է ազատ արձակվի»:

Հիշեցնենք, որ հունվարի 20-ին Բելառուսի գլխավոր դատախազի տեղակալ Ալեքսեյ Ստուկը, ուսումնասիրելով Ռուսաստանի և Իսրայելի քաղաքացի, հայտնի բլոգեր Ալեքսանդր Լապշինին քրեական պատասխանատվության ենթարկելու համար արտահանձնելու վերաբերյալ Ադրբեջանի գլխավոր դատախազության խնդրանքը, որոշել էր բավարարել այն: Ռուսաստանի ԱԳՆ-ում ԱրմԻնֆո-ի թղթակցին հաղորդել էին, որ Մինսկում ՌԴ դեսպանությունն օրենսդրությամբ նախատեսված բոլոր միջոցները ձեռնարկում է ռուս-իսրայելական բլոգեր Ալեքսանդր Լապշինի իրավունքներն ու շահերը պաշտպանելու համար:

Դեկտեմբերի կեսին Լապշինը հաղորդել էր, որ Մինսկում իրեն ձերբակալել են Ադրբեջանի հարցմամբ, որտեղ ինքը ներառված է «սև ցուցակում»` ԼՂՀ այցելելու համար, ուստի նրա մուտքն Ադրբեջան արգելված է: Այդուհանդերձ, 2015 թվականի հունիսին Լապշինին հաջողվել էր մուտք գործել Ադրբեջան Վրաստանով` ուկրաինական անձնագրով, որտեղ «Ալեքսանդր» անունը գրված էր «Օլեքսանդր»: Դրանից հետո Ադրբեջանը բլոգերի նկատմամբ միջազգային հետախուզում էր հայտարարել` «պետական սահմանի մասին» օրենքը և երկրի միգրացիոն օրենսգիրքը խախտելու համար:

Հունվարի 17-ին ՌԴ արտգործնախարար Սերգեյ Լավրովը, մեկնաբանելով  ԼՂՀ այցելելու համար Ադրբեջանի հարցմամբ Ալեքսանդր Լապշինի ձերբակալությունը, նշել էր, որ Ռուսաստանը դեմ է լրագրողների կամ, պարզապես, մասնավոր անձանց այս կամ տարածաշրջան այցելության քրեականցմանը:  Նրա հավաստմամբ, ռուսական կողմը նաև դեմ է, որպեսզի որևէ երկրում ձերբակալված ՌԴ քաղաքացիներին արտահանձնեն երրորդ երկրի: Նա նաև հաղորդել էր, որ Լապշինի հետ եղել է հյուպատոսական շփում, և, քանի որ նա նաև Իսրայելի քաղաքացի է, Իսրայելի դիվանագետները նույնպես նրա հետ շփումներ են պահպանում: «Ելնում ենք այն բանից, որ ձեռնակենք բոլոր միջոցները, որպեսզի իրավիճակը կարգավորենք ՌԴ քաղաքացու իրավունքների լիակատար հարգման պայմաններում, ով նաև Իսրայելի քաղաքացի է», - հայտարարել էր Լավրովը:

Մինչդեռ Ադրբեջանի արտգործնախարար Էլմար Մամեդյարովը հայտարարել է, որ բլոգեր Ալեքսանդր Լապշինի գործը դիտարկվում է բացառապես իրավաբանական հարթությունում: