Արմինֆո.«Ես ամենա, ամենա, ամենա, ամենան եմ». ո՞վ չի հիշում խորհրդային ժամանակների հայտնի մուլտֆիլմի հմայիչ առյուծիկի կարգախոսը: Ամանորի նախաշեմին ԱրմԻնֆո-ն նախաձեռնել է հարցում 20 ԶԼՄ-ների (հեռուստաընկերությունների, օրաթերթերի, լրատվական գործակալությունների և պորտալների) խորհրդարանական թղթակիցների շրջանում՝ «2016 թվականի ամենա, ամենա», բայց ոչ մուլտհերոսին, այլ ժողովրդի ընտրյալին գտնելու նպատակով:
Հարցման մասնակիցներին տրվել է 8 հարց և առաջարկվել 16 թեկնածու (յուրաքանչյուր խորհրդարանական ուժից և անկախ խորհրդարանականներից տարվա ընթացքում հատկապես աչքի ընկած և ակտիվ մի քանի պատգամավոր): Ընդ որում, հարցման մասնակիցներն իրավունք ունեին յուրաքանչյուր անվանակարգում առաջարկել սեփական թեկնածուին, եթե մեր կողմից թվարկված թեկնածուներն իրենց սրտով չեն:
Եվ այսպես… «ԶԼՄ-ների համար ամենաբաց պատգամավոր» անվանակարգում, ինչպես կասեին ամերիկյան կինոակադեմիայի ժյուրիի անդամները՝ the Oscar goes to… Էդուարդ Շարմազանովին: Լրագրողների մեծամասնության կարծիքով, իրենց համար հենց Ազգային ժողովի փոխխոսնակն է ամենաբաց ժողովրդական ընտրյալը: Նրան հաջորդում է պետաիրավական հարցերի մշտական հանձնաժողովի նախագահ Հովհաննես Սահակյանը, ով, խորհրդարանական թղթակիցների կարծիքով, հայկական պառլամենտարիզմի ցածր մշակույթի պայմաններում, առանձնանում է ԶԼՄ-ների ներկայացուցիչների հետ շփման բարձր մակարդակով:
«Ամենաակտիվ պատգամավոր» անվանակարգում լրագրողները նախապատվությունը տվել են պատգամավոր Նիկոլ Փաշինյանին: ԶԼՄ-ների ներկայացուցիչներին հատկապես ոգևորել է Փաշինյանի՝ կառավարության և իշխող կուսակցության անդամներին հաճախ «փակուղի» մցնող դիպուկ և սրամիտ ելույթները:
Ամենաաշխատասեր պատգամավոր լրագրողները ճանաչել են Հովհաննես Սահակյանին, քանի որ նա, ըստ ԶԼՄ-ների ներկայացուցիչների, աչալուրջ հսկում է, որպեսզի ներկայացված բոլոր օրենսդրական նախաձեռնություններն ամբողջովին համապատասխանեն Սահմանադրության «տառին և ոգուն»:
Ինչպես և սպասվում էր, «Տարվա կոլորիտ» անվանակարգում ձայների մեծ տարբերությամբ հաղթել է Ազգային Ժողովի նախագահ Գալուստ Սահակյանը, որին լրագրողական ասպարեզում անվանում են «Մաեստրո»՝ իր հազվագյուտ և խորը փիլիսոփայական արտահայտությունների համար, որոնք հաճախ հասու չեն միջին վիճակագրական ունակություններով օժտված հասարակ մահկանացուներին:
Նույն «Մաեստրոն» խորհրդարանական լրագրության փորձառու ներկայացուցիչների կողմից ճանաչվել է որպես տարվա ամենասրամիտ պատգամավոր: ԶԼՄ-ների ներկայացուցիչների համաձայն, Սահակյանի ելույթներից և հարցազրույցներից մեջբերումները դառնում են թևավոր արտահայտություններ և հումորային ծրագրերի սյուժեներ:
Ամենաինտելեկտուալ մասնագիտություններից մեկի ներկայացուցիչները մեծ դժվարությամբ են ընտրել ամենաինտելեկտուալ խորհրդարանականին, քանի որ Հայաստանի խորհրդարանում այդպիսիքի ընտրությունը, նրանց կարծիքով, հեշտ խնդիր չէ: Բայց և այնպես, երկար բանավեճից հետո, հաղթող է ճանաչվել պատգամավոր Սամվել Փարմանյանը Հանրապետական կուսակցությունից: Հայկական լրագրության ինտելեկտուալներին հատկապես դուր էին եկել «Ի՞նչ, որտե՞ղ, ե՞րբ» խաղի ժամանակ Փարմանյանի բարձր ինտելեկտուալ պատասխանները:
Խորհրդարանական թղթակիցների համար ամենադժվարը, սակայն, «Միստր հմայք» անվանակարգում ընտրություն կատարելն էր: Մեծամասնությունը համակարծիք էր, որ
հայկական խորհրդարանում հմայիչ պատգամավորներ ընդհանրապես չկան: Ի դեպ, հանուն արդարության, պետք է նշել, որ նման կարծիքի են նաև պատգամավորները լրագրողների մասին, այնպես որ՝ այս անվանակարգում «հաշիվը հավասար է»: Այնուամենայնիվ, այն հազվադեպ պատասխաններից, որտեղ հստակ նշված էին անուններ, մի քանի համընկնման հիման վրա «Միստր հմայք» անվանակարգում հաղթող է ճանաչվել «Ալյանս» կուսակցության նախագահ, պատգամավոր Տիգրան Ուրիխանյանը:
Փոխարենը«Տարվա հակահերոս» անվանակարգի հաղթողն ընտրվել է միանգամից՝ առանց առանձնակի տարաձայնության: Հարցման մասնակիցների գերակշռող մեծամասնության կարծիքով, հակահերոս է ճանաչվել պատգամավոր Ռուբեն Հակոբյանը, ով վերջերս ծեծի էր ենթարկել «Հրապարակ» օրաթերթի լրագրող Վահե Մակարյանին: Եվ սա լրագրողական համերաշխության վառ դրսևորում է, ինչն այդքան պակասում է այլ մասնագիտությունների ներկայացուցիչներին:
Հատկանշական է, որ մեր հարցումն օգնեց գտնել «ամենա, ամենային» ոչ միայն հայ խորհրդարանականների շրջանում, այլ նաև՝ ամենասրամիտներին խորհրդարանական թղթակիցների շրջանում: Խորհրդարանական լրագրության երեք ամենասրամիտ ներկայացուցիչների պատասխանները ներկայացվում են ստորև.
Արմինե Գևորգյան՝ «Ռադիոլուր» լրատվական ծրագրի լրագրող.
1. «ԶԼՄ-ների համար ամենաբաց պատգամավոր»՝ միանշանակ Էդուարդ Շարմազանով. նա միշտ «հասանելի է», իսկ երբ ինչ-ինչ պատճառներով«անհասանելի» է դառնում, նրա փոխարեն բոլոր հարցերին պատասխանում է Շարմազանովի օգնականը՝ Գեղամը: 2. «Ամենաակտիվ պատգամավոր»՝ Զարուհի Փոստանջյան. նրա հուզական պոռթկումներն ԱԺ նիստերին առանձնահատուկ գրավչություն են հաղորդում: 3. «Ամենաաշխատասեր պատգամավոր»՝ Հովհաննես Սահակյան. նրա աշխատասեղանի վրա միշտ կա փաստաթղթերի մեծ կույտ, ինչի պատճառով նույնիսկ չի երևում , թե ով է դրանց հետեևում աշխատում: 4. «Ժողովրդի ամենակոլորիտային ընտրյալ»՝ իհարկե, Սեյրան Սարոյան. 4 տարվա ընթացքում նա ընդամենը 2 անգամ է ամբիոն բարձրացել, սակայն նրա մեջբերումները դարձել են թևավոր խոսքեր, իսկ մտքերը՝ աֆորիզմներ: 5. «Ամենասրամիտ պատգամավոր»՝ դարձյալ Էդուարդ Շարմազանով. նրա միայն «Զառա, քեզ ձայն տալը շառա» արտահայտությունն ինչ ասես արժե, իսկ նա հարյուրավոր նման արտահայտություններ ունի: 6. «Ամենահմայիչ պատգամավոր»՝ Տիգրան Ուրիխանյան. չնայած այն հանգամանքին, որ Ուրիխանյանի խորհրդարանական գործունեությունը շատ հաճախ տրամաբանական վերլուծության չի ենթարկվում, այնուամենայնիվ, նրա հմայիչ լինելու փաստը կասկածի տեղիք չի տալիս: 7. «Տարվա հակահերոս»՝ Ռուբիկ Հակոբյան. 25 տարվա ընթացքում առաջին անգամ հայկական խորհրդարանում «դաստիարակչական նկատառումներով» ձեռք է բարձրացվել լրագրողի վրա: 8. «Խորհրդարանական մտքի ինտելեկտուալ»՝ նրանք այնքան շատ են, որին նշես, որին թողնես ՝ Առաքել Մովսիսյան, Նահապետ Գևորգյան, Մհեր Սեդրակյան… Իսկ եթե լուրջ, ապա Արամ Մանուկյան, ով իր ամեն ելույթի ժամանակ հայոց լեզվի անվճար դաընթացներ է անցկացնում իր պաշտոնակիցների համար:
Մարիա Ասատրյան՝ News.am-ի քաղաքական տեսաբան
1. «ԶԼՄ-ների համար ամենաբաց պատգամավոր»՝Էդուարդ Շարմազանով. օրվա ցանկացած ժամին նա «հասանելի է» լրագրողների համար, իսկ եթե լրագրողներն են նրա համար «անհասանելի», միևնույն է, որտեղից էլ լինի կգտնի և ուզես թե չուզես «կմեկնաբանի»: 2. «Ամենաակտիվ պատգամավոր»՝ Նիկոլ Փաշինյան. իրականում բոլորն են ըստ անհրաժետության ակտիվ, բայց Փաշինյանի «մարտկոցները» երբեք չեն նստում: 3. «Ամենաաշխատասեր պատգամավոր»՝ Գալուստ Սահակյան. նրա տարիքում նման պաշտոն զբաղեցնել կարող է միայն մեեծ «աշխատասիրության» դրսևորում լինել, և միայն «քրտնաջան աշխատանքի» արդյունքում է հնարավոր շարել այնպիսի մարգարիտներ, որոնք վերծանալիս լրագրողի ուղեղը «կախվում է»: 4. «Ժողովրդի ամենակոլորիտային ընտրյալ»՝ Հովհաննես Մարգարյան. Գյումրու կոլորիտը նրան երբեք չի դավաճանում: 5. «Ամենասրամիտ պատգամավոր»՝ որակյալ հումորը Հայաստանի խորհրդարանում բացակայում է, թեպետ սրամտել փորձում են շատերը: 6.«Ամենահմայիչ պատգամավոր»՝ Տիգրան Ուրիխանյան. համենայն դեպս, նա այդպես է կարծում, իսկ մենք նրան հակառակը չենք փորձի համոզել: 7. «Տարվա հակահերոս»՝ Ռուբիկ Հակոբյան. հակահերոս, որը համախմբեց լրագրողներին: 8. «Խորհրդարանական մտքի ինտելեկտուալ»՝ 131 պատգամավորից տոկոսային հարաբերակցությամբ կարելի առանձնացնել միայն ինտելեկտուալների մեկ- երկու տոկոս: Այնպես որ՝ ցիտելով դասականին, կարելի է նույնիսկ հոդված գրել՝ «Հայ խորհրդարանականների ինտելեկտուալ պերճանքը և թշվառությունը» վերնագրով: Թեպետ հասարակության կողմից ինտելեկտուալության ընկալումը հարաբերական է, և ես ավելի քան համոզված եմ, որ Սեյրան Սարոյանի և Առաքել Մովսիսյանի արտահայտություններն ավելի ընկալելի են, քան որոշ խորհրդարանականների ամպագորգոռ տեքստերը՝ բոլոր ժամանակների և ժողովուրդների ականավոր գործիչների մեջբերումներով համեմված: Ի դեպ, մեր գործընկերն իր կողմից ավելացրել է ևս մեկ անվանակարգ՝ հայ կանանց որոշակի խավի կողմից մեր խորհրդարանում ամենասեքսուալ տղամարդ անվանելով Առաքել Մովսիսյանին:
Աշոտ Սաֆարյան՝ Verelq.am պորտալի քաղաքական տեսաբան
1.«ԶԼՄ-ների համար ամենաբաց պատգամավոր» ՝ Հովհաննես Սահակյան. դեռ ոչ մի անգամ Սահակյանը չի անջատել հեռախոսը: 2. «Ամենաակտիվ պատգամավոր»՝ Նիկոլ Փաշինյան: 3. «Ամենաաշխատասեր պատգամավոր»՝ կրկին Հովհաննես Սահակյան. նա միշտ ներկա է խորհրդարանի նիստերին, նույնիսկ եթե Գալուստ Սահակյանը դա չի նկատում: 4. «Ժողովրդի ամենակոլորիտային ընտրյալ»՝ Էդուարդ Շարմազանով. առաջարկում եմ գրքույկ հրատարակել՝ հին հունական և հին հռոմեական իմաստուններից նրա մեջբերումներով: 5. «Ամենասրամիտ պատգամավոր»՝ Գալուստ Գրիգորիչ. այստեղ մեկնաբանություններն ավելորդ են: 6.«Ամենահմայիչ պատգամավոր»՝ տուուու… 7. «Տարվա հակահերոս»՝ Հեղինե Բիշարյան. նա զզվելի է: 8. «Խորհրդարանական մտքի ինտելեկտուալ»՝ Տաճատ Վարդապետյան. նրան լսելիս հասկանում ես, թե որքան հարուստ և հզոր է հայոց լեզուն՝ «սինլքոր, արյունռուշտ ենիչերի, յաթաղանից մազապուրծ եզած, քոսի նման մեր ազգին կպած….»:
Ի դեպ, բոլոր դափնեկիրները՝ ինչպես խորհրդարանականները, այնպես էլ լրագրողները, իրենց մրցանակները կարող են ստանալ ԱրմԻնֆո-ի խմբագրությունում:
Քաղաքագետ. Թեհրանը ստեղծում է անվտանգության միջավայր, որտեղ Հորմուզի նեղուցում կայուն նավագնացությունը դժվար կլինի պատկերացնել առանց իր անմիջական մասնակցության
Վերլուծաբան․ Հայաստանի խորհրդարանի նոր խոսնակի ելույթի հիմնարար խնդիրը քաղաքական ճգնաժամի պատճառների միակողմանի մեկնաբանությունն է
ԱԺ փոխնախագահի պաշտոնի թեկնածուն կարծում է, որ իր տիկնոջ աշխատավարձը "Հայփոստի" տնօրենի պաշտոնում ամենացածրն է տվյալ ընկերության պատմության մեջ
Ռուսաստանի մշտական ներկայացուցիչ. ՀԱՊԿ-ի և Հայաստանի միջև որևէ հակամարտություն չկա
Մոսկվա․ ՆԱՏՕ-ն ձգտում է Հայաստանը "պոկել" ՀԱՊԿ դաշնակիցներից 
Քաղաքագետ․ Ռուսաստանը հանրաքվեի միջոցով մտադիր է իմանալ, թե որ "ճամբարն" է ընտրելու Հայաստանը 
Հայաստանն ու Ֆրանսիան քննարկել են ռազմավարական գործընկերության հետագա զարգացումը և ԵՄ հետ համագործակցությունը
Քաղաքագետ. Երկրի առջև ծառացած ռիսկերը հաղթահարելու համար Հայաստանը պետք է նվազեցնի ներքին լարվածության մակարդակը
Զատուլին․ Փաշինյանը շատ էր շտապում Ռուսաստան, քանի որ, իրականում, պարտվել է ընտրություններում
Իրավապաշտպան Ռուբեն Մելիքյանը հեռացվել է ԵՊՀ-ից
Զախարովա․ ԵՄ հետ մերձեցման Հայաստանի գիծը ռիսկեր է պարունակում ԵԱՏՄ անդամ երկրների տնտեսական անվտանգության համար
Ժամանակն է, որպեսզի հարավկովկասյան երկրները Հարավային Կովկասի մասին մտածեն որպես մեկ ընդհանուր տարածաշրջանի. Փաշինյան
Փաշինյան․ Հայաստանն ու Ադրբեջանը պետք է հանգիստ թողնեն միմյանց
