Արմինֆո.Հայաստանի պաշտպանության նախարար Վիգեն Սարգսյանը համոզված է, որ ՆԱՏՕ-ի հետ համագործակցությունը խոչընդոտ չէ հայ-ռուսական հարաբերությունների համար։ Այդ մասին նա հայտարարել է lenta.ru-ի հետ հարցազրույցում:
Նախարարը, մասնավորապես, հիշեցրել է, որ Հայաստանը ՆԱՏՕ-ի հետ համագործակցությունն սկսել է 1994 թվականին, երբ Երեւանը միացավ դաշինքի «Գործընկերություն հանուն խաղաղության» ծրագրին։ Նա նշել է, որ հայ զինծառայողները մասնակցում են խաղաղապահ գործողություններին, ինչը զինված ուժերին թույլ է տվել անգնահատելի հմտություններ ձեռք բերել մոլորակի տարբեր կետերում խաղաղության ապահովման գործողությունների պլանավորման եւ անցկացման գործում։ Բացի այդ, նրա ասելով, հայկական կողմը ՀԱՊԿ դաշնակիցների հետ կիսում է ժամանակակից խաղաղապահության ոլորտում ձեռք բերած գիտելիքները, փորձն ու հմտությունները։
«Բոլոր այս տարիների ընթացքում, երբ ՆԱՏՕ հետ մեր հարաբերությունները դրված են եղել պլանային հիմքի վրա, Ռուսաստանի հետ համագործակցությունը միայն ընդլայնվել է, ինչը, մասնավորապես, դրսեւորվել է Հայաստանում ռուսական ռազմակայանի տեղակայման ժամկետների երկարաձգման, ՄԶԽ դերի ամրապնդման, ՀՕՊ միացյալ համակարգի ստեղծման միջոցով։ Ուշադրություն դարձրեք, ղարաբաղյան հակամարտության շուրջ բանակցային գործընթացն այն պլատֆորմերից մեկն է, որտեղ ՀԱՊԿ և ՆԱՏՕ, Ռուսաստանի, ԱՄՆ ու ԵՄ շահերը համընկնում են», - նշել է Սարգսյանը:
Ի պատասխան այն հարցին, թե Հայաստանի պաշտպանական արդյունաբերական համալիրն ինչ կարող է առաջարկել Ռուսաստանին, ՀԱՊԿ-ի դաշնակիցներին եւ արտասահմանյան այլ գործընկերներին, Սարգսյանը նշել է մի շարք ոլորտներ: «Առավել հեռանկարային են համարվում հետախուզության եւ կրակի կառավարման օպտիկաէլեկտրոնային եւ ռադիոտեխնիկական համակարգերի մշակումները, լազերային տեխնիկայի արտադրանքը, շարժական ռադիոտեղորոշիչ եւ թվայնացված ռադիոռելեային կայանքները, տեղեկատվական անվտանգության ապահովման միջոցները, հատուկ նշանակության տեղեկատվավերլուծական եւ ավտոմատացված համակարգերը, գերբարձր հաճախականության հանգույցները եւ ՀՕՊ միջոցների ու ռադիոէլեկտրոնային պայքարի արդիականացման բլոկները, տարբեր նշանակության տրենաժորային համալիրները։ Բացի այդ, Հայաստանի գիտահետազոտական ինստիտուտները եւ ռազմարդյունաբերության համալիրը մշակում եւ զորքեր են ներդնում անօդաչու թռչող սարքերի զանազան տեսակներ, որոնք իրենց բնութագրերով չեն զիջում արտասահմանյան նմուշներին»,- ընդգծել է նախարարը։
Սարգսյանը նաև նշել է, որ հայկական կողմը Ռուսաստանի հետ համագործակցությունը խորացնում և ամրապնդում է երկկողմ մակարդակում և ՀԱՊԿ ու ԱՊՀ ձևաչափերում, ինչպես նաև Հայաստանի համար նոր Համագործակցության շանհայյան կազմակերպության հետ երկխոսության շրջանակում: «Մենք շարունակում ենք անվտանգության խնդիրների շորջ երկխոսությունը ԱՊՀ մի շարք երկրների, ինչպես նաև ԱՄՆ, Չինաստանի և ԵՄ երկրների հետ: Նա հավելել է, որ ռազմավարական զսպման համակարգի շրջանակում հայկական կողմը շարունակում է բանակը զինել բարձր նշանառության միջոցներով` հավանական հակառակորդի ռազմական արկածախնդրությունները կրկնելու գայթակղությունը վերացնելու նպատակվո: «Եվ, վերջապես, խելամիտ պաշտպանության համակարգում մենք իրագործում ենք նորարարական գաղափարներ` մարտական ներուժի պատրաստման, կառավարման և կիրառման ոլորտներում կադրային և ֆինանսական ռեսուրսների կիրառման արդյունավետությունը բարձրացնելու համար», - եզրափակել է նա: