ՀՀ ԱԳՆ և ԱԱԾ չեն մեկնաբանում հայ-ադրբեջանական խաղաղապահության Բաքվի հարթակի շուրջ ստեղծված իրավիճակը

Արմինֆո.ՀՀ արտգործնախարարությունը և Ազգային անվտանգության ծառայությունը չեն մեկնաբանում հայ-ադրբեջանական խաղաղապահության Բաքվի հարթակի շուրջ ստեղծված իրավիճակը, որին միանալու մասին մեկը մյուսի հետևից հայտարարում են ՀՀ քաղաքացիները, որից հետո նրանցից ոմանք հերքում են այդ տեղեկությունը, իսկ մյուսները, հատակառակը, մեծ էնտուզիազմով հաստատում:

Հայ-ադրբեջանական խաղաղապահության Բաքվի հարթակի շուրջ ստեղծված իրավիճակը մեկնաբանելու նպատակով ԱրմԻնֆո գործակալության թղթակցի խնդրանքին ՀՀ ԱԳՆ-ում հայտարարեցին, որ մարազմը չի մեկնաբանվում: Իսկ ԱԱԾ-ում հաղորդեցին, որ ԶԼՄ-ների համար այդ թեմայով տեղեկատվություն դեռ չունեն: Բայց այն, որ ԱԱԾ-ն ուշադիր հետևում է խաղաղապահության Բաքվի հարթակի շուրջ ստեղծված իրավիճակին, ԱրմԻնֆո-ի թղթակցին հայտնեցին այդ կառույցում ունեցած իր աղբյուրները:

Այնուամենայնիվ, ըստ ադրբեջանական ԶԼՄ-ների, արդեն 5-րդ ՀՀ քաղաքացին է միացել այդ հարթակին` Արմեն Վիրաբյանը, և հարթակի աշխատանքներին մասնակցելու նպատակով մտադիր է այցելել Բաքու: Ճիշտ է, այդ տեղեկատվության հրապարակումից հետո սոցիալական ցանցերում հայտնվեց Վիրաբյանի մասնակցությամբ տեսանյութ, որտեղ նա նշում էր, որ իրեն խաբել են այդ հարթակի իսկական նպատակների հետ կապված, իսկ երբ նա պարզել է ողջ ճշմարտությունը, հրաժարվել է դրան մասնակցել, մանավանդ Բաքու այցելելու մտադրությունից: Անհայտ պատճառներով ներկայույմս Գերմանիայում ապրող Վիրաբյանը հավաստում է, որ ինքը Բաքու գնալու մտադրություններ չի ունեցել, որ ինքը պետք է հարթակի աշխատանքներին մասնակցեր երրորդ երկրից: «Այդ ամենը սուտ է, ադրբեջանական ԶԼՄ-ների հնարածներն են»,-հայտարարել է Վիրաբյանը, միաժամանակ հատուկ ընդգծելով, որ կատեգորիկ դեմ է հայկական կողմի հսկողության տակ գտնվող տարածքներն Ադրբեջանին վերադարձնելուն: Նշենք, որ Վիրաբյանը քաղաքացիական ակտիվիստ է և մասնակցել է բողոքի զանազան ակցիաների, իսկ վերջին ժամանակներս ապրում է Գերմանիայում:

Իսկ դրանից մի փոքր առաջ ցանցում տեղեկություն հայտնվեց, որ հարթակին մտադիր է միանալ նախկին սպա Նորայր Մինասյանը, ով նույնիսկ աջակցություն է խնդրել Ադրբեջան անցնելու համար և մտադիր է մամուլի ասուլիս հրավիրել, որպեսզի հրապարակի հայկական ԶՈւ «իսկական դեմքը»: Սակայն, այդ տեղեկատվության հրապարակումից անմիջապես հետո ցանցում հայտնվեց Մինասյանի հարցազրույցը, որտեղ նա հերքում է ադրբեջանական ԶԼՄ-ների այդ տեղեկատվությունը, միաժամանակ հայտարարելով, որ ինքը մտադրաբար է կապի դուրս եկել անցյալ տարի Ադրբեջան անցած Վահան Մարտիրոսյանի հետ, փորձելով շահել նրա վստահությունը, հայտարարելով ադրբեջանական իշխանությունների նկատմամբ իր լոյալության մասին, ինչի դիմաց ստացել է մեծ գումար: Սակայն, ըստ Մինասյանի, իրականում ինքն ուներ մեկ նպատակ – վրեժխնդրությունը: Ինքը, իբր, ստանալով Մարտիրոսյանի վստահությունը, փորձել է նրանից վրեժ լուծել հայրենիքին դավաճանելու համար: Նշենք, որ ներկայումս Մինասյանն ապրում է Դոնի Ռոստովում, նախկինում ծառայել է Հայաստանի զինված ուժերում, ընդ որում, ծառայության ընթացքում երկու անգամ դատվել է:

Իսկ ահա ՀՀ երկու քաղաքացիների`իրեն իրավապաշտպան համարող Վահե Ավետիսյանի և ինքնակոչ լրագրող Սուզան Ջաղինյանի Բաքու այցելելու մասին լուրը ոչ մեկի կողմից չի հերքվել: Ավելին, օրերս Ջաղինյանը սոցցանցերում տեղեկություն էր տարածել, որ սկսել է որպես թղթակից աշխատել Haqqin.az պորտալում: Ի դեպ, Ջաղինյանի քաղաքացիության և կենսագրության հետ կապված իրավիճակը միանշանակ չէ, քանի որ ՀՀ դատարանի 2010 թվականի որոշմամբ նա ճանաչված է մահացած: Բացի այդ, Ջաղինյանը դատվել է խուլիգանության, ինչպես նաև ահաբեկչական ակտի մասին կեղծ հայտարարության համար: Նշենք նաև, որ 2015 թվականին Բաքվին էր հանձնվել ևս մեկ ՀՀ քաղաքացի, քաղաքացիական ակտիվիստ Վահան Մարտիարոսյանը, որը ներկայումս գտնվում է Ուկրաինայում և նույնպես հանդիսանում է Haqqin.az-ի թղթակից: