ՎՏԲ-Հայաստան Բանկ. Mastercard և Maestro քարտապանները Ռուսաստանից կարող են էլեկտրոնային դրամային փոխանցումներն ստանալ «VK(ВКонтакте)» ցանցի միջոցով

Արմինֆո.ՎՏԲ-Հայաստան Բանկը տեղեկացնում է, որ Mastercard և Maestro քարտապանները կարող են էլեկտրոնային դրամային փոխանցումները Ռուսաստանից ստանալ պարզ, հարմարավետ և անվտանգ եղանակով՝ «VK(ВКонтакте)» սոցիալական ցանցի միջոցով:

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, ՎՏԲ-Հայաստան Բանկի Mastercard և Maestro քարտապանները հնարավորություն ունեն շուրջօրյա՝ իրական ռեժիմով ՌԴ-ից արագ դրամական փոխանցումներն ստանալ անմիջապես իրենց քարտերին: Նոր հնարավորության շնորհիվ, փոխանցողը, ինչպես նաև ստացողը կխնայեն իրենց ժամանակը և միջոցները, ուղարկելով  և ստանալով փոխանցումներն անկանխիկ եղանակով ցանկացած վայրից և շուրջօրյա, առանց Բանկի մասնաճյուղեր այցելելու:

Աղբյուրի համաձայն, դրամային փոխանցումն ուղարկելու համար անհրաժեշտ է ընտրել փոխանցումն ստացողին «VK(ВКонтакте)» կայքում, մուտք գործել ստացողի էջ և «Հաղորդագրություն» դաշտում նշել փոխանցման գումարը և քարտի համարը, որից պետք է ելքագրվի գումարը: Փոխանցողին անհրաժեշտ չէ իմանալ ստացողի քարտի համարը կամ անուն-ազգանունը: Փոխանցումներն իրականացվում են ՌԴ ռուբլիով: Գործարքի նվազագույն գումարը 100 ռուբլի է, առավելագույնը՝ 75 հազար ռուբլի:

Փոխանցումն ստանալու համար ստացողը պետք է մուտք գործի «VK(ВКонтакте)» կայքի իր էջ, ապա «Հաղորդագրություններ» բաժնում ընտրի փոխանցողի հաղորդագրությունը, սեղմի «Ստանալ փոխանցումը» կոճակը և մուտքագրի իր քարտի համարը և դրա գործողության ժամկետը, որից հետո դրամային փոխանցումը կհաշվեգրվի ստացողի հաշվին: 

Փոխանցումներն ստացողի համար անվճար են, իսկ Mastercard միջազգային վճարային համակարգի մինչև տարեվերջ գործող ակցիայի  շնորհիվ Mastercard և Maestro քարտերից փոխանցումներն անվճար կլինեն նաև ուղարկողի համար: Բացի այդ, յուրաքանչյուր շաբաթ Mastercard և Maestro քարտերի վրա  փոխանցումներ ստանալիս, փոխանցում ստացողը կստանա նվեր` «Ստիկերների» հավաքածու:

Նշենք, որ ՎՏԲ-Հայստան Բանկում գործում են հետևյալ դրամական փոխանցումների համակարգերը`MoneyGram, «Avers», «Յունիսթրիմ», «Բիստրայա պոչտա», «InterExpress», «Intel Express», «Անելիք», «Ria Money Transfer», «Sigue Money Transfer», ինչն, իր հերթին, բանկային ծառայությունների շուկայում բանկին ապահովում է բարձր մրցակցություն:

Ըստ ԱրմԻնֆո գործակալության`«Հայաստանի բանկերը քարտային բիզնեսում» վերլուծական տեղեկագրի, ՎՏԲ-Հայաստան Բանկ պլաստիկ շուկայի առաջատարն է ոչ միայն քարտերի քանակով, այլ նաև գործարքների ծավալներով: Այսպես, 2016 թվականի հոկտեմբերի 1-ի դրությամբ բանկի ակտիվ քարտերի թիվը կազմել է 518 հազար, որի 79% կամ 408 հազարը կազմել են Visa քարտերը, տարեկան աճը`12,1%, հիմնականում MasterCard քարտերի թվի 4,5 անգամ աճի հաշվին, մինչդեռ Visa քարտերի թիվը կրճատվել է 4,5%: Բանկի քարտերով պլաստիկ գործարքների ընդհանուր ծավալը 2016 թվականի 9 ամիսներին կազմել է մոտ 160 մլրդ.դրամ, տարեկան աճը`11,5%, որտեղ բանկոմատների միջոցով գործարքները կազմել են 147 մլրդ.դրամ, տարեկան աճը` 9,1%: 2016 թվականի հոկտեմբերի 1-ի դրությամբ բանկն ուներ 346 սեփալան POS-թերմինալ և 156 բանկոմատ:  որից 78-ը մայրաքաղաքում: Մինչև  2013 թվականը ՎՏԲ-Հայաստան Բանկը թողարկում և սպասարկում էր միայն VISA միջազգային քարտեր, ինչից հետո, նույն տարվա սեպտեմբերից, դառնալով MasterCard Worldwide միջազգային վճարային համակարգի լիիրավ անդամ,  ձեռնամուխ եղավ Cirrus/Maestro, MasterCard Standard և MasterCard Gold քարտերի թողարկմանն ու սպասարկմանը: Դրանից զատ բանկը սպասարկում է նաև ArCa լոկալ քարտեր: Բանկն ունի սեփական պրոոցեսինգ: ՎՏԲ-Հայաստան Բանկը VISA International և MasterCard Worldwide միջազգային վճարային համակարգերի լիիրավ անդամ է:

Հիշեցնենք, որ «ՎՏԲ-Հայաստան Բանկ» ՓԲԸ ՎՏԲ միջազգային ֆինանսական խմբի մասնակից է դարձել 2004թ. ապրիլին: «ՎՏԲ Բանկ» ԲԲԸ հանդիսանում է «ՎՏԲ-Հայաստան Բանկ» ՓԲԸ 100% բաժնետոմսերի փաթեթի միանձնյա բաժնետերը; Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ Բանկն ունի ամենալայն մասնաճյուղային ցանցը ոչ միայն մայրաքաղաքում, այլև երկրի մարզերում: