ՄԱԿ-ում ԱՄՆ դեսպանը խախտել է օսմանյան Թուրքիայում հայերի կոտորածի հարցում «ցեղասպանություն» տերմինի կիրառման Վաշինգտոնի տաբուն

Արմինֆո.ՄԱԿ-ում ԱՄՆ մշտական դեսպան Սամանթա Փաուերը  1915 թվականի իրադարձությունները որակել է ցեղասպանություն, հաղորդում է Associated Press-ը: «Ցեղասպանություն» բառը տևական ժամանակ տաբու է եղել ԱՄՆ պաշտոնյաների, այդ թվում՝ նախագահ Բարաք Օբամայի համար: Սակայն ՄԱԿ-ում ԱՄՆ դեսպանը խախտեց այդ տաբուն», - նշում է Associated Press-ը: Գործակալությունը հաղորդում է, որ Նյու Յորքում Խաղաղության Նոբելյան մրցանակի դափնեկիր Էլի Վիզելի հիշատակին նվիրված արարողության ժամանակ Սամանթա Փաուերը խոսել է  պատմական անարդարությունների մասին` հիշատակելով նաև Հայոց ցեղասպանության ժխտումը: «Փաուերի հինգ բառը կարող են հարուցել Թուրքիայի կատաղությունը, որն ընդդիմանում է Հայոց ցեղասպանության մասին որևէ հիշատակման, և որի ռազմավարական դերը որպես ԱՄՆ գլխավոր գործընկեր և ՆԱՏՕ-ի գծով դաշնակից ԱՄՆ պաշտոնյաներին ստիպում է ծայրահեղ զգուշություն դրսևորել մեկ դար առաջ տեղի ունեցած կոտորածի մասին հիշատակումներում: Փաուերի հայտարարությունն անակնկալ էր, հաշվի առնելով նրա կարգավիճակը, ով ԱՄՆ երկրորդ ամենաբարձրաստիճան դիվանագետն է, և սա կարող է ընկալվել որպես նրա կողմից քննադատություն Օբամայի հասցեին», - նշում է գործակալությունը: «Նախընտրական քարոզարշավի ընթացքում Բարաք Օբաման խոստացել էր հաղթանակի դեպքում ճանաչել Հայոց ցեղասպանությունը, բայց նախագահ ընտրվելուց հետո դա չարեց:

Մինչդեռ,  Սամանթա Փաուերը մինչև պաշտոնն ստանձնելը բավական հաճախ է անդրադարձել ցեղասպանությունների հարցում Միացյալ Նահանգների քաղաքականությանը: Պաշտոնատար անձինք պնդում են, որ կուլիսներում նա հետևողականորեն աշխատել ու համոզել է Օբամայի վարչակազմին պաշտոնապես ճանաչել Հայոց ցեղասպանությունը», - նշվում է հոդվածում: Փաուերի խոսնակ Քուրթիս Քուփերը հայտարարել է, որ ցեղասպանության հիշատակումն արվել է Վիզելի կյանքի մեծարման համատեքստում և պետք է մյուսներին համոզի դեմ հանդես գալ, այլ ոչ թե կողքից նայել անարդարություններին, զանգվածային վայրագություններին ու ցեղասպանությանը: Խոսնակը նշել է որ դեսպանի խոսքերը չեն ենթադրում  վարչակազմի քաղաքականության փոփոխություն: Պետդեպարտամենտի ներկայացուցիչ Մարկ Թոներն, իր հերթին, հայտարարել է, որ ԱՄՆ քաղաքականությունում ոչ մի փոփոխություն չի եղել: «Նախագահն ու վարչակազմի մյուս բարձրաստիճան պաշտոնյաները բազմիցս սգացել են և ճանաչել  մեկուկես միլիոն հայերի սպանության պատմական փաստը Օսմանյան կայսրության անկման շրջանում, ինչպես նաև հայտարարել են, որ փաստերի ամբողջական, անկեղծ ու արդար ճանաչումը բխում է իրենց շահերից», - հայտարարել է Թոները: Գործակալությունը նաև հիշեցրել է, որ ութ տարի առաջ նախընտրական քարոզարշավի ընթացքում Փաուերը հրապարակել էր տեսանյութ, որում ԱՄՆ հայերին կոչ էր անում քվեարկել Օբամայի օգտին, նշելով, որ նա կկատարի իր խոստումը և ազնվորեն կհայտարարի, թե ինչ է տեղի ունեցել: Մայիսի 4-ին հայտնի դարձավ, որ Արևմտյան Վիջինյան դարձավ ԱՄՆ 44-րդ նահանգը, որը ճանաչեց Հայոց ցեղասպանությունը:

Ավելի վաղ «ցեղասպանություն» տերմինի  կիրառման Վաշինգտոնի տաբուն խախտել էր Հայաստանում ԱՄՆ դեսպան Ջոն Էվանսը, ով դրա դիմաց հատուցեց ոչ միայն իր պաշտոնով, այլև` դեսպանի աստիճանով: