Արմինֆո. Պաշտոնական լիազորություննները գերազանցելու համար բերման է ենթարկվել Սևանի քաղաքապետ Ռուդիկ Ղուկասյանը: Այդ մասին ԱրմԻնֆո-ին հայտնել են ՀՀ ՔԿ Սևանի քննչական բաժնում:
Ղուկասյանի նկատմամբ քրեական գործ է հարուցվել: ԱրմԻնֆո-ի ունեցած տեղեկությունների համաձայն՝ խոսքը, մասնավորապես, վերաբերում է դեռ խորհրդային ժամանակներում անցկացված ոռոգման խողովակների վաճառքին: Ըստ որում՝ գործարքի գումարը, ըստ լուրերի, հասնում է շուրջ $1 մլն-ի: Խողովակների իրական արժեքը, սակայն, կպարզի փորձաքննությունը:
Մինչդեռ, ԱրմԻնֆո-ի աղբյուրների համաձայն, Ղուկասյանն իրավապահ մարմինների ուշադրության կենտրոնում է հայտնվել՝ ոչ այնքան իր կրիմինալ, որքան քաղաքական գործունեության պատճառով: Բանն այն է, որ Ղուկասյանը երկար ժամանակ թշնամական հարաբերությունների մեջ է Գեղարքունիքի մարզպետ Ռաֆիկ Գրիգորյանի հետ: Այդ թշնամանքն իր գագաթնակետին է հասել Սևանի քաղաքապետի պաշտոնի համար նախընտրական արշավի շրջանում: Ղուկասյանը, հակառակ մարզպետի և հարազատ կուսակցության /ՀՀԿ/ ցանկության, կրկին որոշել է իր թեկնածությունն առաջադրել: Մինչդեռ Գրիգորյանը և ՀՀԿ-ն այդ ընտրություններում պաշտպանում են ՙՍևան՚ ազգային պարկի տնօրենի տեղակալ Սարգիս Մուրադյանի թեկնածությունը: Նախընտրական արշավի ընթացքում կողմերի թաքուն թշնամանքը հրապարակային բնույթ է ստացել, բանը հասել է անձնական վիրավորանքներին: Ռուդիկ Ղուկասյանը հայտարարել է, որ մարզպետ Ռաֆիկ Գրիգորյանը ժամանակին իր մոտ գյուղապետ է աշխատել և լուռ կատարել իր բոլոր հրամանները: Ըստ երևույթին, այդ հայտարարության համար Ղուկասյանին չեն ներել: