Հյուման Ռայթս Հաուս Երևանը ահազանգում է Լևոն Բարսեղյանի ձերբակալման առնչությամբ, իսկ հասարակական կազմակերպությունները պահանջում են ԱԺ արտահերթ նիստ հրավիրել

Հյուման Ռայթս Հաուս Երևան իրավապաշտպան ցանցը ահազանգում է, որ ցանցի անդամ Ժուռնալիստների «Ասպարեզե ակումբ ՀԿ խորհրդի նախագահ Լևոն Բարսեղյանին հուլիսի 27-ի լույս գիշերը ժամը 3-ի սահմաններում առանց հիմքի բերման են ենթարկել Երևան քաղաքի ոստիկանական վարչության պարեկապահակային ծառայության հատուկ գումարտակի աշխատակիցները (կարմիր բերետները)։

ՙԹեև լրագրողները Լ. Բարսեղյանի որդուն հայտնել էին, թե առավոտյան 6։30-ին նրան ազատ են արձակել՝ նրա գտնվելու վայրի մասին մինչև ժամը 16:00 -ը ո՛չ գործընկերները և ո՛չ էլ հարազատները լուր չունեին։ Ինչպես հետագայում պարզվեց նրան Շենգավիթի ոստիկանական բաժնում պահել են մինչև ժամը 8:30-ը՝ զանցառելով 3 ժամից ազատ արձակելու կամ խափանման միջոցը փոխելու հստակ օրենքը: Հետագայում նրան տեղափոխել են Կումայրի բաժին և կրկին բերել Շենգավիթի քննչական բաժին: Ոստիկանությունը քրեագիտական փորձաքննություն է նշանակել գրպանի ծալովի դանակի առնչությամբ որն ըստ ոստիկանության, գտնվել է  Լ.Բարսեղյանի մոտ: Լ.Բարսեղյանի նկատմամբ նշանակվել է նաև դատաբժշկական փորձաքննություն: Շենգավիթի քննչական բաժնում հարուցվել է քրեական գործ՝ սառը զենք կրելու կասկածանքով: Լևոն Բարսեղյանը ձերբակալվել է:  ՀՀ ՄԻՊ ֆեյսբուքյան էջի հաղորդագրությունից ՀՌՀ Երևանը տեղեկացել է, որ միայն նրանց միջնորդությամբ է կայացել Լևոն Բարսեղյանի և իր փաստաբանի հանդիպումը: ՀՌՀ Երևանը խորը մտահոգություն է հայտնում Լևոն Բարսեղյանի նկատմամբ ոստիկանության՝բազմաթիվ անօրինականություններով ուղեկցված գործողությունների առնչությամբ՝ դրանում նրա հանդեպ քաղաքական հետապնդման միտում տեսնելով: Լևոն Բարսեղյանը վերջին օրերին քաղաքական ակտիվ և հանրային գործունեություն էր ծավալում՝ աջակցելով հուլիսի 17-ին Երևանի ՊՊԾ գունդը գրաված զինյալների նկատմամբ ուժ չկիրառելու հանրային պահանջը և նրանց կողմից առաջ քաշված Սերժ Սարգսյանի հրաժարականի քաղաքական պահանջը: ՀՌՀ Երևանը կոչ է անում տեղական և միջազգային իրավապաշտպան կազմակերպություններին, ինչպես նաև դիվանագիտական կառույցներին իրենց ուշադրության կենտրոնում պահել Լևոն Բարսեղյանի նկատմամբ ոստիկանական գործողությունները և թույլ չտալ քաղաքական հայացքների հիմքով նրա նկատմամբ հետապնդման փորձերը՚, ասվում է կազմակերպության՝ ԱրմԻնֆո ստացված հայտարարության մեջ:  

Միաժամանակ Հայաստանի մի շարք հասարակական կազմակերպություններ հանդես են եկել ՊՊԾ գնդի շենքի զավթման հետ կապված հայտարարությամբ:

ՙՎերջին օրերին հանրապետությունում, հատկապես Երևան քաղաքում, ստեղծվել է ծայրահեղ լարված և անկանխատեսելի հետևանքներով հղի պայթյունավտանգ իրավիճակ՝  պայմանավորված  ս.թ.  հուլիսի 17-ին «Սասնա ծռերե խմբի կողմից ՀՀ ոստիկանության պարեկապահակային ծառայության (ՊՊԾ) գնդի վրա իրականացված զինված հարձակման և դրան հաջորդած իրադարձություններով:  Հազարավոր քաղաքացիներ դուրս եկան փողոց՝ սատարելու «Սասնա ծռերե խմբին և նրանց պահանջները, քանի որ երկրում տիրող համակարգային կոռուպցիան, սոցիալական անարդարութունը, ընտրանքային  արդարադատությունը, անկասելի արտագաղթը և շարունակ կեղծվող ընտրությունները պատրանք են դարձրել դրական փոփոխություններ ակնկալելու բոլոր հույսերը: ՀՀ ոստիկանությունը կիրառել է անհամաչափ ուժ և բռնություն, ինչի արդյունքում քաղաքացիների խաղաղ ինքնաբուխ հավաքները դաժանորեն ցրվել են, հարյուրավոր մարդին բերման են ենթարկվել և շինծու մեղադրանքներ են առաջադրվել առավել ակտիվ քաղաքացիներին:

Լարվածությունը գնալով շիկանում է, մինչդեռ երկրի նախագահը արդեն տասնմեկերորդ օրն է` որևէ ուղերձով չի դիմել ժողովրդին, իսկ Ազգային ժողովը և նրա ազգընտիր պատգամավորները վայելում  են իրենց ամառային հանգիստը:

Սույնով մենք՝ քաղաքացիական հասարակության ներքոստորագրյալ կազմակերպություններս, դատապարտում ենք Ազգային ժողովի աններելի և անթույլատրելի անգործությունը և կոչ ենք անում նրան օգտվել արտահերթ նիստ հրավիրելու իր սահմանադրական իրավունքից՝ Ազգային ժողովի արտահերթ նիստում ստեղծված իրավիճակը քննարկելու և լուծումների խաղաղ ուղիներ գտնելու նպատակով: Եկել է իրական պահը ցույց տալու, որ Ազգային Ժողովը իրապես ներկայացուցչական մարմին է և հիմնավորելու, որ կառավարման խորհրդարանական համակարգը ամենաարդյունավետն է ճգնաժամերի հաղթահարման համար՚,- ասված է հայտարարության մեջ, որի ներքո ստորագրել են՝ Գլոբալիզացիայի և տարածաշրջանային համագործակցության վերլուծական կենտրոն, Եվրասիա համագործակցության հիմնադրամ, Երևանի մամուլի ակումբ, ԷկոԼուր ՀԿ, Ընդդեմ իրավական կամայականության ՀԿ, Թրանփարենսի Ինթերնեշնլ հակակոռուպցիոն կենտրոն ՀԿ, Ժողովրդավարություն  այսօր ՀԿ,

Լրագրողներ Հանուն Մարդու Իրավունքների ՀԿ, Խաղաղության երկխոսություն ՀԿ, Կանանց աջակցման կենտրոն, Մեդիա Նախաձեռնությունների Կենտրոն,

Նոր Սերունդ Մարդասիրական ՀԿ: